Bandongesi Batambula Sipilitu ya Kujela

Mukwetile matangwa 10 kutunda haililile Yesu mwilu, bandongesi bendi batambwile sipilitu ya kujela. Lyapwile lya Pentekosti 33 C.E., co banu batundile ku mitambela ya kulisesa-seza na kuya ku cilika mu Jelusalema. Kwakele bandongesi ba kupwa 120 baje balikungulwilile mu mulili wa helu ya njibo. Co kwalingiwile cuma ca kukomokesa manene. Kwasholokele cuma ca kufwa ngwe mulangi wa tuhya ha mutwe wa umo na umo wa bandongesi, co boshe bashangumukile kwendeka bindaka bya kuliseza-seza. Bazibile miyoyo ya kufwa ngwe lihunzi lyakama mu njibo mubakele.

Bangenzi baje bezile mu Jelusalema mubazibile cije cilumo bashatukilile kuje ku njibo na kukamona byakele na kulingiwa. Bakomokele manene mubazibile bandongesi bendeka bindaka bya kuliseza-seza. Co bendekele ngwabo: ‘Aba banu batunda ku Galileya, co bali na kwasa bati kwendeka bindaka byetu?’

Co Pita na tupositolo bakwabo bemanene halutwe lwa mbunga. Pita walekele mbunga bya kutsa kwa Yesu nomwo Yehova wamusangwilile ku batsi. Wendekele lalo ngwendi: ‘Hano Yesu ali ku liboko lya cilyo lya Njambi, co netila sipilitu ya kujela yakulahesele. Mukemwo munazibi na kumona ebi bikomokeso.’

Majwi endekele Pita abetele manene ku bimbunge, co behwile ngwabo: “Bika bitunapande kulinga?” Wabalekele ngwendi: ‘Tengulukeni ku bubi bweni na kumimbwitika mu lizina lya Yesu, co mutambula bwana bwa sipilitu ya kujela.’ Co ha litangwa lije bene bambwitikile banu ba kweta ku 3,000. Kutunda haje bene, bandongesi batwaleleleleho kulibwezelela mu Jelusalema. Sipilitu ya kujela yakwasele tupositolo bashimbike bikungulukilo byabingi mangana balongese bandongesi byuma byoshe byabashikile Yesu.