Yesu Alinga Bikomokeso Byabingi

Yesu wezile hano hasi na kwambulula bya Bumwene bwa Njambi. Yesu wamwesele byuma byakalinga mwakapwa Mwene mwalingile bikomokeso kupangesa sipilitu ya kujela yamwanene Yehova. Wakangwisile banu babinjile mabezi oshe-oshe. Co baka-kubinja bakele na kukaba Yesu kwoshe-kwoshe kwakele na kuya mangana abakwase, co wabakangwisile. Tupuputwa bakele na kumona, tusinda matwi bakele na kuziba, biyanga bakele na kwenda, baje bakele na madimona bapatukile. Banu basele kukanguka nameme mubakwatele lika ku mukundwiyo wa cikobelo cendi. Banu bakabele Yesu kwoshe-kwoshe kwakele na kuya. Yesu kashekele banu ha simbu yatondele kukala likalyendi.

Simbu imo, banu banenele munalume uje wakele na kalepa ku njibo kuje kwakele na kukala Yesu. Oloni kwakele banu babangi manene, co kubasele kukobela mukati. Ngeci batubile mbengwa ha ciluli, co bakobeleselelemo uje munalume na kumutwala kuli Yesu. Co Yesu walekele uje munalume ngwendi: ‘Induka ulyendele.’ Mwendukile na kwenda, banu balikomokelele manene.

Litangwa limo, Yesu wakobelele mu limbo, co banalume 10 baje bakele na mbumba bemanene kulako nendi, co batambekele kuli ikeye ngwabo: ‘Yesu, tukwase!’ Ha simbu ije, baka-mbumba kubabatabesele kushwena ku banu. Yesu walekele baje banalume baye ku tempele, ngwe mulyendekelele Lishiko lya Yehova kutalesa ku byuma bibapandele kulinga baka-mbumba munima ya kukanguka. Bakangukilile mu ngila mubakele na kuya ku tempele. Hali baje baka-mbumba, umo mwanangukile ngwendi nakanguka, waile na kukandelela kuli Yesu, co lalo washangazalele Njambi. Hali baje banalume 10, umolika ikeye waile na kukakandelela kuli Yesu.

Munakazi uje wabinjile mushongo wakama ha myaka 12, walifwitile kutonda bukwasi mangana akanguke. Walibembelele kunima ya Yesu mukati ka mbunga na kukakwata ku mukundwiyo wa cikobelo cendi ca helu. Haje bene wakangukile. Co Yesu wehwile ngwendi: “Iya nanjikwata?” Uje munakazi wazibile manene lyoba, nameme ngoco washwenene kuli Yesu na kukamuleka busunga. Yesu wamuzembelekele ha kwendeka ngwendi: ‘Munange, ya mu kwoloka.’

Jailosi muka-kushika maswalale, walombele Yesu ngwendi: ‘Ija ku njibo yange! Munange wa mumbanda ali na kubinja manene.’ Uje mumbanda watsile simbu kanda Yesu ete ku njibo ya ishe. Yesu mwetele, wawanene banu babangi baneja ku njibo ya butsi. Yesu wabalekele ngwendi: ‘Keti mulile; mwafwa nalala lika tulo.’ Co wakwatele liboko lya uje mumbanda na kwendeka ngwendi: “Mwanike, induka!” Haje bene wendukile na kutumama, co Yesu walekele bisemi bendi ngwendi bamwane byakulya. Acisinganyekeni kubwaha kubazibile bisemi bendi.