Yesu Angula Tupositolo 12

Munima ya kwambulula ha mwaka umo na hafu, Yesu wangwile kulinga cuma ca seho manene. Beya bangwile mangana apange nabo? Beya bangwile mangana batwamenene cikungulukilo ca baka-Kristu? Yesu watondele manene bukwasi bwa Yehova mangana angule mwamubwa byakulinga. Ngeci waile ku munkinda kuje kwakakele likalyendi, co walombelele butsiki bwoshe. Mulyakile, Yesu wasanene bandongesi bendi bamo, co wangwileho tupositolo 12. Kuma kuli mazina abo amwanuka ndi? Bapwile Pita, Andru, Jemusi, Iwano, Filipu, Batolomeu, Tomasi, Mateu, Jemusi muna Afeyasi, Tadeyasi, Simoni na Judasi Isikalioti.

Aba tupositolo 12 bakele na kwenda na Yesu. Mwamanesele kubalongesa, wabatumine mu kwambulula muzimbu waubwa. Yehova wabanene nzili ya kutundisa badimona na kukangwisa babezi.

Yesu wamwene aba tupositolo 12 kupwa babusamba bendi, co wabakulahelele manene. Bafalisi basinganyekele ngwabo aba tupositolo kubalilongesele. Oloni, Yesu wabalongesele mwakupangela cipangi cabanene. Aba tupositolo bakele na Yesu ha bisimbu bya seho manene mu kuyoya kwendi. Cakumwenako, bakele nendi simbu kanda atse, co lalo bakele nendi mwasangukile. Ngwe mwa Yesu, bwingi bwabo batundile ku Galileya. Bamo babo bambatele.

Tupositolo bapwile ba kujeneka kulumbunuka, co nabo bakele na kusebuka. Bisimbu bimo bakele na kwendeka kwa kujeneka kusinganyekesesa, co kubakele na kwangula mwamubwa byakulinga. Bisimbu bikwaboco kubakele na mbunge ya kubandamena. Co lalo balingile bimata mangana bamone iya wapwile wa seho mukati kabo. Nameme ngoco, bapwile banu bababwa baje bazemene manene Yehova. Ngeci Yesu mwaile mwilu, bapwile lubula lwa cikungulukilo ca baka-Kristu.