Ñanda ya ha Munkinda

Munima ya kwangula tupositolo ba kupwa 12, Yesu wasikumukile kutunda ha munkinda na kuya ku mwela kuje kwalikungulwilile mbunga yakama. Baje banu batundile ku Galileya, Judeya, Tile, Sidoni, Siria na musambwa lya Jodani. Bamunenelele banu baje bakele na kubinja na baje bakele na badimona. Yesu wabakangwisile boshe. Kutundaho, wakatumamene kumukulo wa munkinda na kushangumuka kwendeka. Walumbunwine byuma bitunapande kulinga mangana tupwe babusamba ba Njambi. Tunapande kunanguka ngwetu tutonda Yehova, co lalo tunapande kumuzema. Oloni kutwasa kuzema Njambi nga kutwazemene bakwetu. Tunapande kumwesa ngozi na kulinga mwamubwa banu boshe nameme bitozi betu.

Yesu wendekele ngwendi: ‘Kumwapandele kuzema lika babusamba beni, oloni munapande kuzema na bitozi beni na kukonekela banu kutundilila kwisi ya mbunge. Nga kuli umo nakulubalela, co ya kuli ikeye oho bene na kulomba likonekelo. Lingeni bakweni ngwe mumutondela ngweni bamilinge.’

Yesu wanangwile lalo banu ha byuma bya ku mubila. Wendekele ngwendi: ‘Kwapwa kwa seho manene kupwa kabusamba ka Yehova kutubakana kukala na bimbongo byabingi. Mwizi nasa kwiba bimbongo byobe, oloni naumo wahi asa kwiba busamba bwobe na Yehova. Likeleni kulishoshomwena ha byakulya, byakunwa nambe bizalo. Taleni tuzila. Njambi akabana byakulya simbu yoshe. Kulishoshomwena kukwasa kubwezelela ku matangwa eni a kuyoya. Anukeni ngweni, Yehova azibuka byoshe bimutonda.’

Banu baje bakungulukile kubazibileho laja munu alongesa ngwe Yesu. Bakulunu ba bulombelo bwabo kubabalongesele byuma bya cifweci. Mwafwa bika Yesu wapwile mulongesi wamubwa? Mwafwa byuma byoshe byalongesele byatundile kuli Yehova.