Yesu Alongesa Bandongesi Bendi Mwakulombelela

Bafalisi bakele na kulinga byuma mangana banu babashangale. Bakele na kumwesa ngozi mangana banu babananguke na kulombela ha mbunga mangana banu boshe babamone. Bafalisi bakwatele malombelo amalaha mu mutwe, co bakele na kuwelukila-elukila mu masinagogi na ha masambwa-ngila mangana banu babazibe. Ngeci, banu bakomokele Yesu mwabalekele ngwendi: ‘Keti mulombele ngwe Bafalisi mwafwa bakasinganyeka ngwabo Njambi aliziba kubwaha nga bendeka majwi amangi mu malombelo abo. Oloni ikeye kesi kuliziba kubwaha. Kulombela kunapande kukala mukati keni na Yehova. Keti mwilukile-ilukile kwendeka byuma bya kulifwa. Yehova atonda ngwendi mumuleke mwoshe mumuli na kulizibila.’

‘Munapande kulombela ngweni: “Tate yetu uli mwilu, lizina lyobe balijelese. Bumwene bwobe bwije. Cizango cobe cilingiwe hano hasi ngwe mucili na kulingiwa mwilu.”’ Yesu wabalekele lalo ngwendi balombele ha byakulya byabo bya ha litangwa na litangwa na kubakonekela bubi bwabo na ha byuma bikwabo lalo bibatondele.

Yesu wendekele ngwendi: ‘Keti mulikele kulombela. Twaleleleniho kulomba Ishweni Yehova byuma byabibwa. Cisemi woshe akashaka kwana munendi byuma byabibwa. Nga muneni amilomba likende, kuma mumwana limanya ndi? Nga amilomba isi, kuma mumwana linyoka ndi?’

Yesu walumbunwine bibalilongesako ngwendi: ‘Nga yeni muzibuka kwana bana beni bwana bwabubwa, co Tate yeni Yehova amyana manene sipilitu ya kujela. Yeni munapande lika kumulomba.’ Kuma mukapangesa cinangulo ca Yesu ndi? Mukalombela ha byuma muka?