Yesu Ana Banu Babangi Byakulya

Simbu kanda Paseka ya mu 32 C.E. yete, tupositolo ba Yesu baile na kwambulula. Mubelukile, bajukile, ngeci Yesu waile nabo mu bwato ku Betisaida mangana bakahwime. Oloni mubetele kuyehi na nunda, Yesu wamwene banu babangi baje babakabele. Yesu watambwile baje banu mu cizemo nameme washakele kukala kwa likalyendi na tupositolo bendi. Wakangwisile babezi babo na kushangumuka kubalongesa. Litangwa lyoshe lya mutunu, Yesu walongesele banu bya Bumwene bwa Njambi. Ku mangwezi, tupositolo bendi bezile kuli ikeye na kumuleka ngwabo: ‘Hamo banu banatsi njala. Baleke baye mangana bakatonde byakulya.’

Yesu wendekele ngwendi: ‘Kubapandele kuya. Baneni byakulya kuno bene.’ Tupositolo bamwihwile ngwabo: ‘Kuma utonda ngwobe tuye na kulandela aba banu byakulya ndi?’ Kapositolo Filipu wendekele ngwendi: ‘Nameme ngwe tuli na bimbongo byabingi, kutwasa kulanda makende amangi abasa kulya aba banu boshe.’

Yesu wabehwile ngwendi: ‘Tuli na byakulya bya kupwa muli?’ Andru wakumbulwile ngwendi: ‘Tuli na makende atanu na tubisi tubali twatundondo. Oloni ebi bikani kuli ei mbunga ya kupwa aha?’ Yesu wendekele ngwendi: ‘Njineneleni owo makende na tubisi.’ Co walekele banu batumame ha mwila mu bibunga bya banu ba kupwa 50 na 100. Yesu wambatele aje makende na tubisi, co watalele mwilu na kulombela. Kutundaho, wanene tupositolo bendi byakulya, co bakebo bapangezelele banu bije byakulya. Banalume ba kupwa 5,000 na banakazi na banike boshe balile, co bakutile. Kutundaho, tupositolo bakungulwile byakulya byoshe byasaleleko mangana keti bibihye. Bashulisile bizuma bya kupwa 12 na byakulya bije byasaleleko. Cili bene eci capwile cikomokeso ca kulitila.

Banu babwahelelele manene, co bashakele kumupwisa mwene. Oloni Yesu wazibukile ngwendi ije kuyapwile simbu ya Yehova ya kumupwisa mwene. Ngeci, walekele mbunga ngwendi ilishandoke, co walekele tupositolo bendi bakobele mu bwato mangana baye musambwa lya Kalunga-ndonga wa Galileya. Tupositolo bendi mubakobelele mu bwato, Yesu wakandukile ha munkinda likalyendi. Mwafwa bika? Mwafwa washakele kuwana simbu ya kulombela kuli Ishe. Nameme Yesu wakele na kuzezama, wakele na kuwana simbu ya kulombela.