Kulya ca Yesu ca Mangwezi Camamaneselelo

Mwaka na mwaka, baJuda bakele na kulinga cilika ca Paseka lya Nisani 14. Cije cilika cabanukisile mwabapatwilile Yehova mu bundungo mu Ijipiti na kubanena mu Lifuti lya Cikulaheso. Mu mwaka wa 33 C.E., Yesu na tupositolo bendi balingilile cilika ca Paseka mu mulili wa helu mu Jelusalema. Mubakele muyehi na kumanesa kulya, Yesu wendekele ngwendi: ‘Umo weni anjenda bungungu.’ Tupositolo balikomokelele manene, co bamwihwile ngwabo, ‘Iya bene owo?’ Yesu wendekele ngwendi: ‘Woshe injana eli likende, co ikeye bene.’ Ngeci, wanene mbazubwila ya likende kuli Judasi Isikalioti. Haje bene Judasi wakatukile na kutunda mu mulili.

Yesu walombelele, co mwamanesele wamungozwele lije likende na kulyana tupositolo bendi basaleleko. Wabalekele ngwendi: ‘Lyeni eli likende lije limanena mubila wange unjana mwafwa yeni.’ Walombelelele na binyu, co wanene tupositolo bendi. Co wabalekele ngwendi: ‘Nweni ebi binyu bije bimanena maninga ange aje etika mangana base kukonekela bubi. Njimikulahesa ngwange mukapwa bimyene nange mwilu. Twaleleleniho kulinga eci mwaka na mwaka mu kunjanuka.’ Mwaka na mwaka, baka-kukabangeya Yesu bakalikungulwila hamo mangwezi ha litangwa lya kulifwa. Ano matangwa, eci cilika bakacitumbula ngwabo Kulya ca Mwata ca Mangwezi.

Munima ya kulya, tupositolo balikananganene mangana bazibuke wapwile wa seho manene mukati kabo. Oloni Yesu wabalekele ngwendi: ‘Woshe wakama hali yeni napande kulimona kupwa wamundondo manene.’

‘Mu babusamba bange. Njili na kumileka byoshe byatonda Tate ngwendi njimileke. Ololo njiya kuli Tate mwilu. Yeni musala, co banu bakazibuka ngwabo mu bandongesi bange nga mulimwesa cizemo mukati keni. Lizemeni umo na mukwabo ngwe munjinamizemena.’

Co Yesu walombele Yehova anyungilile bandongesi bendi boshe. Walombele Yehova abakwase mangana balikwatasane na kukala mu kwoloka. Walombele lalo ngwendi lizina lya Yehova balijelese. Kutundaho, Yesu na tupositolo bembile myaso ya kushangazala Yehova, co batuhukile hanja. Simbu ya kukwata Yesu yakele muyehi.