Yesu Bamukwata

Yesu na tupositolo betile mu Cingulunga ca Kidroni mubakele na kuya ku Munkinda wa Olive. Litangwa lyakele muyehi na kukya, co ngonde yatwile manene ceke. Mubetele mu lihya lya Getisemani, Yesu wabalekele ngwendi: “Tumameni hano, co twaleleleniho kutona.” Kutundaho, Yesu washwenene halutwe kamandondo mu lihya na kutsikama hasi. Washotele manene mbunge na kulishoshomwena, Ngeci walombele kuli Yehova ngwendi: “Kulingiwe cizango cobe.” Co Yehova watumine kangelo kwija na kumutakamesa. Yesu mwelukile wakuwanene Pita, Jemusi na Iwano banalala. Co wabalekele ngwendi: ‘Indukeni, ino keti ikeyo simbu ya kulala. Simbu ya kunjana mu maboko a bitozi bange inete oni.’

Co haje bene Judasi wezile na mbunga yakama ije yambatele bimoko bya mikwale na bimbweti. Wazibukile kwasa kuwana Yesu mwafwa bakele na kuyayaya muje mu lihya. Judasi walekele maswalale ngwendi akabamwesa Yesu. Wasungamene hali Yesu na kwendeka ngwendi: ‘Uli bati, Mulongesi?’ Co wamutsembele. Yesu wamwihwile ngwendi: ‘Judasi, uli na kunjenda bungungu ha kunjitsemba?’

Yesu washwenene ku mbunga ije yezile na Judasi na kuihula ngwendi: “Iya imuli na kutonda?” Yamukumbulwile ngwayo: “Yesu muka-Nazaleta.” Yesu wabalekele ngwendi: “Yange bene,” co baje banalume bashondolokele na kuwila hasi. Wabehwile lalo ngwendi: “Iya imuli na kutonda?” Bamukumbulwile lalo ngwabo: “Yesu muka-Nazaleta.” Yesu wakumbulwile ngwendi: “Njamileke ngwange yange bene. Eceleni aba banalume baye.”

Pita mwamwene byakele na kulingiwa, washomwene moko ya mukwale na kubatula litwi lya Maukasi ndungo ya kapilistu wahakamwa. Oloni Yesu wakwatele ku litwi lya uje munalume na kumukangwisa. Co walekele Pita ngwendi: “Ilwisa moko yobe ya mukwale mu cindalo cayo, mwafwa woshe apangesa moko ya mukwale akanyonga na moko ya mukwale.” Maswalale bakutile Yesu ku maboko, co tupositolo batewele. Kutundaho, bamutwalele kuli kapilistu wakama Anasi. Anasi wehwile Yesu bihula, kutundaho washikile ngwendi bamutwale kuli Kapilistu Wahakamwa Kayafasi. Oloni bika byalingiwile ku tupositolo?