Pita Abyana Yesu

Yesu mwakele na tupositolo bendi mu mulili wa helu, wabalekele ngwendi: ‘Mubaboshe munjiseza likalyange lelo butsiki.’ Pita wamulekele ngwendi: ‘Yange kwahi. Nameme bakwetu boshe bakakuseza, yange kunjikakuseze.’ Oloni Yesu wamukumbulwile ngwendi: “Simbu kanda ndemba atambeke, unjibyana lutatu.”

Maswalale mubatwalele Yesu ku njibo ya Kayafasi, bwingi bwa tupositolo batewele. Oloni Pita na kapositolo mukwabo bakabangeyeye Yesu mu mbunga. Wakakobelele mu lilapa lya Kayafasi kapilistu wahakamwa, co waile ku liko na kwota tuhya. Mwafwa ya ceke ca tuhya, ngamba umo wa mumbanda wamumwene ku cihanga, co wendekele ngwendi: ‘Njikuzibuka! Unakala hamo na Yesu!’

Pita wendekele ngwendi: ‘Embwe, keti yange! Kunjizibuka biuli na kwendeka.’ Wakatukile na kuya ku cikolo. Haje bene ngamba mukwabo wa mumbanda wamumwene, co wendekele ngwendi: ‘Ou munalume nakele hamo na Yesu!’ Pita wendekele ngwendi: ‘Owo Yesu imuli na kwendeka kunjimuzibuka!’ Munalume umo wendekele ngwendi: ‘Nobe unapu umo wabo! Mwafwa endekesi yobe izibika ngwe utunda ku Galileya kwatunda Yesu.’ Oloni Pita walisingile ngwendi: “Kunjimuzibuka!”

Co haje bene ndemba watambekele. Pita wamwene Yesu atenguluka na kumutala. Wanukile byamulekele Yesu, ngeci waile hanja na kulila manene.

Ha simbu ya kulifwa, baka-nkuta ya Sanihedrini balikungulwile mu njibo ya Kayafasi mangana basompese Yesu. Te banayongola laja ngwabo batsiye Yesu, co bakele na kutonda lika ngila ya kumwanena mulonga. Oloni kubamuwanene na mulonga. Kayafasi wamwihwile oni mu kubatula ngwendi: ‘Yobe Muna Njambi ndi?’ Yesu wamukumbulwile ngwendi: “Yange bene.” Kayafasi wendekele ngwendi: ‘Byahi lalo bitutondela bukaleho bukwabo. Nashaula Njambi!’ Nkuta yalizibasanene ngwayo: ‘Ou munalume napande kutsa.’ Bapupile Yesu bimbanda na kumujekwila mate na kumufwika ku mesho na kwendeka ngwabo: ‘Oshe u kapolofweto, tumbula nakupupu!’

Mukwakile, batwalele Yesu ku nkuta ya Sanihedrini na kukamwihula lalo ngwabo: ‘Yobe Muna Njambi ndi?’ Wabakumbulwile ngwendi: ‘Yeni muli na kwendeka ngoco.’ Ngeci, bamuwanene na mulonga wa kushaula Njambi. Kutundaho, bamutwalele ku lipela lya Pontiasi Pilato ngubulu wa baLoma. Bika byalingiwile munima yebi? Tuwaneni cikumbululo mu cilongesa cinatako.