Yesu Atsila ku Gologota

Tupilistu bakama batwalele Yesu ku lipela lya ngubulu. Pilato wabehwile ngwendi: ‘Mulonga muka umunamuwana nawo ou munalume?’ Bakumbulwile ngwabo: ‘Ali na kulitumbula ngwendi ikeye mwene.’ Pilato wehwile Yesu ngwendi: “Yobe Mwene wa baJuda ndi?” Yesu wakumbulwile ngwendi: “Bumwene bwange keti bwa muno mu kaye.”

Ngeci, Pilato walekele banu ngwendi batwale Yesu kuli Heloda uje wakele na kuyula mu Galileya mangana akamone indi asa kukamuwana na mulonga. Heloda nendi kamuwanene na mulonga, ngeci wamwilwisile kuli Pilato. Pilato walekele mbunga ngwendi: ‘Nange na Heloda kutwamuwanene na mulonga. Ngeci, njimupatula.’ Oloni ije mbunga yatambekele ngwayo: ‘Mutsiye! Mutsiye!’ Maswalale bapupile Yesu makote na kumujekwila mate. Bamuzikile tepa ya mingonga na kumushendumuna ngwabo: ‘Uli bati obe Mwene wa baJuda?’ Pilato walekele lalo mbunga ngwendi: ‘Ou munalume kunjamuwanene na mulonga.’ Oloni mbunga yatambekele ngwayo: “Mupameye ha citi!” Ngeci, Pilato wabaneneye mangana bamutsiye.

Batwalele Yesu ku mwela ubatumbula ngwabo Gologota, co bamupameyeye ha citi na kucimika. Yesu walombelele ngwendi: ‘Tate, bakonekele mwafwa kubazibuka bibali na kulinga.’ Banu bakele na kumushendumuna ngwabo: ‘Nga u Muna Njambi, shulukoho ha citi tukumone! Lyobole.’

Kumukulo wendi kwakele bikenya, co umo wendekele ngwendi: “Ukanjanuke muukakobela mu Bumwene bwobe.” Yesu wamukulahesele ngwendi: “Ukakala nange mu Paradaisi.” Ku mutanya, kwakele lisusulungu ha lifuti lije lyambatele maola atatu. Bandongesi bendi bamo hamolika na ina Maliya, bemanene kuyehi na citi habamupameyeye. Yesu washikile Iwano ngwendi anyunge Maliya ngwe ina wa kumusema.

Kutundaho, Yesu wendekele ngwendi: “Byuma byoshe binalishulisilila!” Co wazewile mutwe na kutula mwonyo. Ha simbu ije, kwakatukile lindunduma lyakama. Nanga yakama yakele mu tempele ije yangunwine Mwela wa Kujela ku Mwela wa Kujela Manene, yatabukile hakati. Kapitau ka maswalale wendekele ngwendi: ‘Cili bene ou wapwile Muna Njambi.’