Yesu Enda ha Mema

Yesu kakele lika na nzili ya kukangwisa babezi na kusangula batsi, oloni wakele lalo na nzili ya kwasa kwimika lihunzi na nyonzi. Yesu mwamanesele kulombela ha munkinda, watalele ha Kalunga-ndonga wa Galileya, co wamwene lihunzi lyakama. Tupositolo bendi bakele na kupinda na bwato mwafwa ya mankimba na lihunzi bije byakele na kubanakula. Co Yesu waile kuli bakebo oku ali na kwenda ha kalunga-ndonga. Tupositolo mubamwene munu ali na kwenda ha mema, bazibile manene lyoba. Oloni Yesu wabalekele ngwendi, “Yange, keti muzibe lyoba.”

Pita wendekele ngwendi: ‘Mwata, nga cilibene yobe, njileke njije kuli yobe.’ Co Yesu wamulekele ngwendi: “Ija!” Ngeci, Pita watundile mu bwato omwo lihunzi lyakele na kuhuwa, co waile kuli Yesu oku ali na kwenda ha mema. Oloni mwetele muyehi na Yesu, wamwene lihunzi lyakama, co wazibile lyoba. Washangumukile kumbwitama ngeci watambekele ngwendi: “Mwata, njobole!” Yesu wamukwatele ku liboko na kumwihula ngwendi: ‘Bika biunauwasanena? Likulahelo lyobe lili kuli?’

Yesu na Pita balondele mu bwato, co lihunzi lyakama lyemanene. Acisinganyekeni lika mubalizibilile tupositolo! Bendekele ngwabo: “Cili bene u Muna Njambi.”

Simbu ikwabo lalo, Yesu wemikile lihunzi. Ikeye na tupositolo bendi mubakele na kujabuka kalunga-ndonga, waile na kulala ku mulili wa kwisi mu bwato. Mwaile mu tulo, kwakatukile lihunzi lyakama manene. Mankimba akele na kupupa ha bwato, co bwashulile na mema. Ngeci tupositolo bendwile Yesu na kutambeka ngwabo: ‘Mulongesi, tutsa! Tukwase!’ Co Yesu wendukile na kushika kalunga-ndonga ngwendi: “Oloka kuluu!” Haje bene lihunzi na mankimba byatulile. Yesu wehwile tupositolo ngwendi: ‘Likulahelo lyeni lili kuli?’ Balyendekesele ngwabo: “Nameme lihunzi na kalunga-ndonga bimwononoka.” Tupositolo balilongesele ngwabo kubapandele kutewa cuma coshe-coshe, oloni bapandele kukulahela Yesu na bimbunge byabo byoshe.