Yesu Akangwisa Munu lya Sabata

Bafalisi bazindile Yesu, co bashakezekele ngila mangana bamuwane na mulonga na kumukuta. Bendekele ngwabo kapandele kukangwisa banu lya Sabata. Ha litangwa limo lya Sabata, Yesu wawanene munalume umo wa kapuputwa uje wakele na kulomba-lomba byuma ku banu mu tapalo. Walekele bandongesi bendi ngwendi: ‘Taleni omwo nzili ya Njambi ikwasela ou munalume.’ Yesu wambatele libu na kulishinga na mate endi na kulikwita ha mesho a uje munalume. Co wamulekele ngwendi: “Ya ukatane mu kalishali ka Silomu.” Uje munalume waile na kutana, co washangumukile kumona lwakulibanga mu kuyoya kwendi.

Banu balikomokelele. Bendekele ngwabo: ‘Ngwetu ou ikeye munalume wakele na kutumama ku tapalo oku ali na kulomba byuma, indi hamo nalifu lika nendi?’ Uje munalume wabakumbulwile ngwendi: ‘Yange bene uje wasemukile kapuputwa.’ Co bamwihwile ngwabo: ‘Bika byakulingisa ushangumuke kumona?’ Mwabalekele byuma byalingiwile, bamutwalele ku Bafalisi.

Uje munalume walekele Bafalisi ngwendi: ‘Yesu nanjikwitile libu ha mesho na kunjileka ngwendi njikatane. Co njinakatanene ku mesho mukemwo hanwoni njili na kumona.’ Bafalisi bendekele ngwabo, ‘Nga akangwisa lya Sabata, co nzili yendi kuyesi na kutunda kuli Njambi.’ Oloni bamo bendekele ngwabo: ‘Nga nzili yendi kuitundu kuli Njambi, co nasa bati kumukangwisa?’

Bafalisi basanene bisemi ba uje munalume na kubehula ngwabo: ‘Bika binalingisa muneni ashangumuke kumona?’ Bisemi bendi bazibile lyoba kwendeka mwafwa Bafalisi bendekele ngwabo woshe akulahela Yesu bamusheka mu sinagogi. Ngeci bendekele ngwabo: ‘Kutuzibuka. Mwihuleni yeni babenya.’ Bafalisi behwile uje munalume bihula byabingi manene co wabalekele ngwendi: ‘Binjinamileke bikebyo binjizibuka. Mushaka njimileke bati oni?’ Bafalisi balubalele, ngeci bamushekele.

Yesu mwawanene uje munalume, wamwihwile ngwendi: ‘Kuma unakulahela Mesiya ndi?’ Wamukumbulwile ngwendi: ‘Ngwe njimuzibuka ngwe njamukulahela.’ Yesu wamulekele ngwendi: ‘Yange bene Mesiya.’ Yesu wamwesele ngozi uje munalume, indi bati? Kamukangwisile lika, oloni wamukwasele lalo akale na likulahelo.