4 Tunapande Kulombela ha Byuma Muka?

BANU babangi ngwabo lilombelo lya kutalelako lije libakatumbula lalo ngwabo Lilombelo lya Mwene nambe lilombelo lya Tate Yetu likelyo lilombelo libakalombela manene baka-Kilistu. Kutuzibuka mwamubwa indi obu bunapu busunga indi embwe, oloni tuzibuka ngwetu banu babangi kubazibisisa mwamubwa eli lilombelo. Banu babangi bakelukila-elukila lika kwendeka majwi ali omu mu lilombelo ha litangwa na litangwa. Oloni ebi keti bikebyo byashakele Yesu ngwendi banu balinge. Tuzibuka bati ngoco?

Simbu kanda Yesu alongese bandongesi bendi lilombelo lya kutalelako, wendekele ngwendi: ‘Nga mulombela, keti mwilukile-ilukile kwendeka byuma bya kulifwa.’ (Mateo 6:7) Ngwe Yesu washakele ngwendi banu belukile-elukile kwendeka majwi a mu lilombelo lyalongesele, kuma ngwe wendekele ngwendi keti belukile-elukile kwendeka byuma bya kulifwa omwo balombela ndi? Embwe Yesu wakele na kutulongesa byuma bimo bya seho bitunapande kwaka mu lilombelo na kutukwasa kuzibuka byuma bya seho manene bitunapande kwaka mu biyongola omwo tulombela. Tusimutwiyeni ha byuma byendekele. Eli lilombelo banalisoneka ku mukanda wa Mateo 6:9-13.

‘Tate yetu uli mwilu, lizina lyobe balijelese.’

Yesu walongesele baka-kumukabangeya ngwendi banapande kulombela lika kuli Ishe, Yehova. Mwafwa bika lizina lya Njambi lyapwa lya seho, co mwafwa bika litondeka kulijelesa?

Kushwa lika ku mashangumukilo, Njambi banamubiisa lizina. Satana uje wapwa citozi ca Njambi wendekele ngwendi Yehova wapwa muka-makuli. Ngwendi wapwa Muka-kuyula wa litsita uje kesi na lisesa lya kuyula byuma byanatanga. (Kushangumuka 3:1-6) Co banu babangi banalitombola na Satana. Bali na kulongesa na banu ngwabo Njambi wapwa cikenya wa kuminina mbunge, uje washaka kulinga shambandinga. Bamo bakendeka ngwabo Njambi keti ikeye watangele byuma. Bamoco bali na kulwisa lizina lyendi, banatundisa lizina lya Yehova mu Bimbimbiliya bibananungulula na kubindika banu kulipangesa.

Mbimbiliya imwesa ngwayo Njambi akamanesa byuma byoshe ebi. (Ezekiyele 39:7) Co akamanesa bukalu bwoshe bumuli na kuliwana nabwo na kumyana byoshe bimutonda. Mu ngila muka? Majwi anatako a mu lilombelo lya Yesu atukwasa kuwana cikumbululo.

“Bumwene bwobe bwije.”

Ano matangwa, bantwama ba bulombelo babangi bakalongesa byuma bya kuliseza-seza kutalesa ku Bumwene bwa Njambi. Oloni banu balongesele Yesu bazibukile ngwabo tupolofweto ba Njambi bapolofwetele ngwabo Mesiya, Mwobole yanangula Njambi akayula mu Bumwene buje bukalingisa byuma bipwe byabibwa mu kaye. (Isaya 9:6, 7; Ndanyele 2:44) Obu Bumwene bukamwesa ngwabwo Satana wapwa muka-makuli, co bukamunyongesa hamo na bipangi byendi byoshe. Bumwene bwa Njambi bukamanesa binzita, mishongo, njala na kutsa. (Myaso 46:9; 72:12-16; Isaya 25:8; 33:24) Nga mulombela ngweni Bumwene bwa Njambi bwije, co muli na kulomba ngweni ebi bikulaheso bilishulisilile.

“Cizango cobe bacilinge hano hasi, ngwe omwo bakacilingi mwilu.”

Majwi a Yesu amwesa ngwawo kulutwe, cizango ca Njambi cikalingiwa hano hasi ngwe mucili na kulingiwa mwilu muje mwakala Njambi. Naumo wahi nonowesa cizango ca Njambi kulingiwa mwilu mwafwa Yesu Muna Njambi walwisile Satana na tungelo bendi na kubombila hano hasi. (Kujombolola 12:9-12) Eci cuma camucitatu mu lilombelo lya kutalelako na byuma bibali bya kulibanga, bitukwasa kwaka manene mbunge ku cizango ca Njambi keti ku byuma bitushaka, co eci cikeco cuma ca seho manene. Cizango ca Njambi cikeco casa kunenela byuma byoshe bya kutanga byuma byabibwa. Nameme Yesu uje wapwile wa kulumbunuka walekele Ishe ngwendi: “Kesi ngwe mwaya cizango cange embwe, oloni cizango cobe cilingiwe.”—Luka 22:42.

“Twane kulya kwetu kwa litangwa lya [lelo].”

Yesu wamwesele ngwendi twasa kulomba Njambi byuma bitutonda mu kuyoya. Kukwabihile kulinga ngoco. Oloni kutulingisa tuzibuke ngwetu Yehova “ikeye akana mwonyo na muku na byuma byoshe kuli banu boshe.” (Vilinga 17:25) Mbimbiliya imwesa ngwayo wapwa cisemi wa cizemo uje washaka kwana bana bendi byuma bibatonda. Oloni ngwe mwa cisemi wamubwa, kesi kubana byuma bije kubibakwasa.

“Tusambese ku milonga yetu.”

Kuma kuli bimo bimunabiisila Yehova bene ndi? Kuma mutonda ngweni amikonekele ndi? Banu babangi ano matangwa kubazibuka ngwabo bubi bwapwa buka, co kubazibuka bukalu butunda mu kulinga bubi. Oloni Mbimbiliya imwesa ngwayo bubi bukebwo bunatunenela bukalu mwafwa bukebwo bunanene kutsa. Tubaboshe kutwalumbunukile, co tukabiisa kushwa kumo. Ngeci, kubanga Njambi atukonekele asina tukala na lilabelelo lya kukawana byuma byabibwa kulutwe. (Loma 3:23; 5:12; 6:23) Kuzibuka ngwetu Mbimbiliya imwesa ngwayo: ‘Yehova wapwa wamubwa kuli yetu, co lalo akasambesa,’ kututakamesa.—Myaso 86:5.

‘Tunyungilile kuli muka-bubi.’

Kuma muzibuka ngweni mutonda manene ngweni Njambi aminyungilile ndi? Babangi kubakulahela ngwabo Satana uje wapwa ‘muka-bubi’ kwakala. Oloni Yesu wamwesele ngwendi Satana kwakala, co wamutumbwile ngwendi “muka-kuswana kano kaye.” (Yowano 12:31; 16:11) Satana nongumuna banu ba muno mu kaye kali na kuyula, co ashaka manene kumyungumuna na kumyonowesa kulikuta busamba bwa kukanyama na Ishweni, Yehova. (1 Petulu 5:8) Oloni Yehova ali na nzili yakama manene kutubakana Satana, co ashaka kunyungilila baje bamuzema.

Byuma byabindondo bitunasimutwiya bije bimwesa bisimpi byakama byendekele Yesu mu lilombelo lya kutalelako, keti bikebyo lika bitwasa kulomba kuli Njambi. Anukeni ngweni mukanda wa 1 Yowano 5:14 utuleka ngwawo: “Njambi . . . . atuziba nga tumulomba cuma cimo ngwe ku cizango cendi.” Ngeci, keti mulizibe ngweni bukalu bweni bwabundondo manene, co kumwapandele kubuleka Njambi mu lilombelo.—1 Petulu 5:7.

Kuma mwela kutuli omwo tulombela na simbu itulombela nabyo bya seho ndi?