Mbimbiliya Ikatengulula Buyoye Bwa Banu
“Njiliziba Ngwange Njajele, Njili na Kuyoya, Co Lalo Njashubuluka.”——VICTORIA TONG
MWAKA WA KUSEMUKA: 1957
LIFUTI KWANASEMUKILA: AUSTRALIA
YOYESI YENDI YA LAJA: WALIWANENE NA BYUMA BYABIBI KU BWANIKE
BUYOYE BWANGE BWA KUNIMA:
Njakolelele mu mbongi ya Newcastle, mu New South Wales. Twapa tu ba 7 mu naanga yetu, co yange ntwantwa. Batate bapwile bitakwa, co lalo bakele na butenu. Banana nabo bakele na butenu. Banana bakele na kunjilinga mwamubi na kunjendeka mwamubi. Bakele na kunjileka kushwa kumo ngwabo nji munu wamubi, co Njambi akanjenyeka mu litende lya tuhya. Njazibile manene lyoba.
Banana bakele na kunjipupanga, co bisimbu bimo kunjakele na kuya ku sikola. Munjakele na myaka 11, baka-fulumende banjitundisile ku bisemi bange na kushangumuka kunjinyunga, co mu kwita kwa simbu banjitwalele ku njibo ya masisita. Oloni munjakele na myaka 14, njateweleko. Kunjashakele kwiluka ku njibo. Ngeci, njashangumukile kuyoya mu bitapalo bya mu Kings Cross, mu nganda ya Sydney.
Munjakele na kuyoya mu bitapalo, njashangumukile kupangesa bumbanda bwa kupendesa, kunwa bwala, kuyongola bikupulo bya bukwizi, na kulinga bukwizi. Litangwa limo, kwalingiwile byuma bije byanjitewesele manene. Njakele na kukala mu njibo ya munalume umo uje wakele na cintolo ca kunwila bwala butsiki. Litangwa limo mangwezi, banalume babali bezile ku njibo yendi. Wanjilekele ngwendi njiye mu mulili wa kulala, oloni njakele na kuziba bibakele na kusimutwiya. Owo munalume washakele kunjilandesa kuli obo banalume babali. Bashakele ngwabo banjishweke mu mbapolo ya bitenga na kunjitwala ku Japan mangana njikapange mu cintolo ca kulandesela bwala. Njazibile manene lyoba, co njajombokelele ha njanena na kutewa.
Njawanene munalume umo uje wezile na kusikama mu nganda ya Sydney, co njamulekele bukalu bwange. Njasinganyekele ngwange anjanako bimbongo. Oloni ikeye wanjilanyele ku njibo kwakele na kukala mangana njikajwele na kulyako kamo. Njatwaleleleho kukala nendi, co munima ya mwaka umo twalyambatele.
MBIMBILIYA MUYATENGULWILILE BUYOYE BWANGE:
Munjashangumukile kulilongesa Mbimbiliya na Bakaleho ba Yehova, byuma bimo binjakele na kulilongesa byanjilubalesele, bimoco byanjizeyesele, co bikwabo byanjizibisile kubwaha. Njalubalele manene munjalilongesele ngwange Satana ikeye akanene byuma byabibi, mwafwa kunima banjilongesele ngwabo Njambi ikeye akatunenela tuyando. Njalizibile manene kushubuluka munjalilongesele ngwange Njambi kesi kwenyeka banu mu litende lya tuhya, mwafwa eci cilongesa cakele na kuzibisa manene lyoba kushwa lika hanjacinjizibukilile.
Njabwahelelele manene kumona Bakaleho oku batabesa binangulo bya mu Mbimbiliya bibatwamenene mu byuma byoshe bibangula kulinga. Bakakabangeya byuma bibakulahela. Njapwile munu wa mukalu, oloni Bakaleho banjimwesele cizemo na kasingimiko simbu yoshe, nameme munjakele na kulinga nambe kwendeka byuma bije kubyapandele.
Njalifwitile manene na biyongola bya kuliziba ngwe keti nji wa seho. Njakele na kuliziba ngwe nji munu wamubi manene, co njatwaleleleho kuliziba ngoco nameme munima ya kunjimbwitika na kupwa Mukaleho wa Yehova. Njazibukile ngwange njazema Yehova, oloni njakele na kuliziba ngwange kasa kuzema munu wa kufwa ngwe yange.
Biyongola byange byatengulukile munima ya myaka ya kweta ku 15 kutunda habanjimbwitikilile. Mu ñanda yendekele ndolome umo ku Njibo ya Bumwene ya Bakaleho ba Yehova, wapangesele mukanda wa Yakomba 1:23, 24. Awa mavesi anesekesa Lijwi lya Njambi ku ciponi cije casa kutukwasa kulimona mwatumwena Yehova. Njashangumukile kulihula indi munjalimwena kunaliseze nomu mwanjimwena Yehova. Ha kulibanga, njabyanene ebi biyongola. Njatwaleleleho kuliziba ngwange Njambi kasa kunjizema.
Munima ya matangwa amandondo, njatandele mukanda uje watengulwile buyoye bwange. Njatandele mukanda wa Isaya 1:18, kuje kwanendeka Yehova ngwendi: “Ijeni tulizibasane. Nambe bubi bweni bubenga ngengu, oloni bukatoka too ngwe mema a kukonda.” Njalizibile ngwe Yehova wakele na kunjileka ngwendi: “Victoria ija tulizibasane. Njikuzibuka mwamubwa, njizibuka bubi buunalingi, njizibuka mbunge yobe, co njakuzema.”
Na tulo kunjatumwene olyo litangwa. Oloni anga njalizibile ngwange Yehova kasa kunjizema. Nameme ngoco, njashangumukile kusinganyekesesa ha ndando ya kupatula ya Yesu. Co kukapwa muje, njanangukile ngwange Yehova natwalelelelaho kukwata mbunge na kunjimwesa cizemo mu bingila byabingi. Oloni yange kwapwile lika ngwe njakele na kumuleka ngwange: “Cizemo cobe kuli yange cacindondo manene. Mulambu wa Munobe kuwasa kumanesa bubi bwange.” Kwapwile lika ngwe njakele na kubyana ndando ya kupatula. Oloni kusinganyekesesa ha bwana bwa ndando ya kupatula kwanjilingisile njilizibe ngwange Yehova wanjizema manene.
BUKWASI BUNJINAWANA:
Njiliziba ngwange njajele, njili na kuyoya, co lalo njashubuluka. Bulo bwetu bunakanyama, co njabwahelela kukwasa bakwetu ha kubalekako byuma binjaliwana nabyo. Njili na kuliziba kushwenya manene muyehi na Yehova.