Njalilongesele ngwange Yehova wakala na ngozi, co lalo muka-kukonekela

BUYOYE BWANGE BWA KUNIMA:

Njakolelele mu nganda ya Montreal kumutambela kuje kwakele manene buhutu. Munjakele na bingonde 6 bya kusemuka, batate batokele co banana bakebo bakele na kunyunga naanga. Twasemukile tuba 8, co yange njapwa mutinikila.

Munjakele na kukola njapangesele manene mambanda a kupendesa, kulinga bweho bwa linyanyamena, lwozi na kulikwatasana na bikenya. Munjakele na myaka 10, njashangumukile kupangela bikwizi na baka-kukolotesa banu bimbongo. Njakele na kukwisa simbu yoshe, ngeci banu bakele na kutaba binjibaleka. Kapwile kalingo-lingo kange.

Munjakele na myaka 14, njazibukile bingila byabingi byakukwisilamo banu. Cakumwenako, njakele na kulanda biwaci, maseka na tunzeya bya ndando ya kwisi na kubilingisa bimoneke ngwe byandando ya helu manene na kubilandesa ku banu. Njashakele manene kuwana bimbongo kupangesa bingila byabyasi. Simbu imo njawanene bimbongo byabingi manene ha litangwa limolika.

Munjakele na myaka 15, banjishekele ku sikola ije ikatengulula futisi ya banike, ngeci kunjakele noku kwakukala. Njashangumukile kulala mu bitapalo, mu myela ya kulishubulwisila na ku binjibo bya babusamba bange.

Mwafwa ya bilinga byange bya linyanyamena, kakangi tupokola bakele na kunjikwata. Kubanjakele mu kamenga mwafwa byuma binjakele na kulandesa kubyapwile bya kwiba. Nameme ngoco, bakele na kunjifwetesa bimbongo byabingi mwafwa ya bilinga byange bya linyanyamena. Njakele na kwambatelako baka-kukolotesa bimbongo byabo ku banu babakolotesele, mwafwa kunjakele na lyoba. Kukwapwile kwakwasi kulinga ngoco, ngeci bisimbu bimo njakele na kwambata buta. Bisimbu bimo njakele na kupangela hamo na bibunga bya bikenya.

MBIMBILIYA MUYATENGULWILILE BUYOYE BWANGE:

Njazibile bya Bakaleho ba Yehova lwakulibanga munjakele na myaka 17. Lipangala injakele na kukala hamo nendi washangumukile kulilongesa Mbimbiliya na Bakaleho ba Yehova. Ngeci, njamusezele na kukakala na lipangala lyange weka, mwafwa byuma byakele na kulilongesa mu Mbimbiliya kubyalitombwele na futisi yange.

Lipangala lyange wamucibali mwashangumukile kulilongesa Mbimbiliya na Bakaleho, byuma byatengulukile. Watengulwile futisi yendi, co wanjizibisile kubwaha. Washangumukile kukala na bifwa byabibwa bwa kufwa ngwe ngozi na mbunge ya kubandamena. Wanjilanyele kuya ku Njibo ya Bumwene ya Bakaleho ba Yehova, co njatabele. Banjitambwile na nzanzu. Balisezele manene na banu banjakele na kulikwatasa nabo. Naanga yange kuyanjimwesele cizemo, njalibizibile ngwe banjiyengwile tunde ku bwanike bwange. Bakaleho ba Yehova banjimwesele cizemo cije kubanjimwesele baka-naanga yange. Ngeci njatabele kulilongesa nabo Mbimbiliya.

Byuma binjakele na kulilongesa mu Mbimbiliya byanyungililile buyoye bwange. Nange na babusamba bange babali twayongwele kwiba bimbongo, mwafwa njakele na mikuli yaingi manene. Kubezika kunjatwaleleleleho na bije biyongola byabibi. Oloni babusamba bange bakebo batwaleleleleho na bije biyongola. Umo bamukutile mukwaboco bamutsiile.

Omwo njatwaleleho kulilongesa Mbimbiliya njanangukile ngwange njapandele kutengululako byuma byabingi kutalesa ku futisi yange. Cakumwenako, njalilongesele biyendeka Mbimbiliya ku mukanda wa 1 Kolinte 6:10 ngwayo: “Baka-kwiba nambe baka-cipululu nambe baka-kupenda nambe baka-kushaula nambe bezi, kubakaswana Bumwene bwa Njambi.” Munjatandele ou mukanda na kusinganyekesesa ha bwingi bwa byuma byabibi binjinalingi, njalilile. Njanangukile ngwange njapandele kutengulula buyoye bwange mu kushula. (Loma 12:2) Njakele manene na lwozi, co lalo tunde ku bwanike njapwile nji muka-kwendeka lika makuli.

Nameme ngoco, munjatwaleleho kulilongesa njanangukile ngwange Yehova wapwa muka-ngozi, co lalo muka-kukonekela. (Isaya 1:18) Njalombelele kuli Yehova kutundilila kwisi ya mbunge mangana anjikwase kutengulula futisi yange yaibi. Wanjikwasele, co mukwita kwa simbu njatengulwile futisi yange. Nange na lipangala lyange twalyambatele, co eci capwile cuma ca seho manene citwalingile.

Twalyambatele te njili na myaka 24 oku tuli laja na bana batatu. Njashangumukile oni kutonda cipangi cije cilitombola na mashiko a mu Mbimbiliya. Oloni kunjalilongesele manene, co kunjakele na satifiketi ya bipangi. Njalombele lalo kuli Yehova kutundilila kwisi ya mbunge. Kutundaho, njaile na kutonda cipangi. Njakele na kuleka banu banjakele na kulomba bipangi ngwange njishaka kutengulula futisi yange na kupanga cipangi mu busunga. Bisimbu bimo njakele na kubalumbunwina ngwange njakele na kulilongesa Mbimbiliya, co njashakele kupwa munu wamubwa. Bwingi bwa banu banjakele na kulomba bipangi bakele na kubyana kunjitambula. Munjaketele kuli munalume umo munima ya kumulumbunwina futisi yange ya kunima wendekele ngwendi: “Kunjizibuka lika, njili na kuliziba ngwe njinapande kukwana cipangi.” Njikulahela ngwange cije capwile cikumbululo ku malombelo ange. Mukwita kwa simbu, nange na munakazi wange batumbwitikile na kupwa Bakaleho ba Yehova.

BUBWA BUNATUNDUMO:

Njili na kuyoya lelo mwafwa ya kupangesa binangulo bya mu Mbimbiliya na kuyoya mu ngila yaibwa ha kupwa muka-Kristu. Njili na naanga yaibwa. Njinakulahela ngwange Yehova nanjikonekela, co njili na citakutaku ca kujela.

Njinapanga cipangi ca simbu yoshe ha myaka 14 mu kukwasa bakwetu balilongese Mbimbiliya, co ololo bene aha munakazi wange nendi nakobela mu cipangi ca simbu yoshe. Ha myaka 30 inahu, njinabwahelela kukwasa bakwetu banjakele na kupanga nabo bashangumuke kupangela Yehova. Na simbu ino njicikai ku bintolo, oloni keti mu kwibila banu ngwe munjakele na kulingila. Kakangi munjikaiko, njikalekeko bakwetu binjakulahela. Njishaka kubakwasa bakale na lilabelelo lya kukayoya mu kaye kakaha muje kumukakala lalo bezi.—Myaso 37:10, 11.