Ngila Yaivwa Imwatha Kwethekethelamo

MU KALIMONO kupwa muka-Kilisitu ndi? Nga ngocho, cho mwapwa mukati ka vanu va kutuvakana 2 billion vaje valitavela kupwa vaka-kukavangeya Yesu. Kakangi mukati ka vanu vatatu, kuvanga kukale umo angula kukavangeya Yesu. Ano matangwa, kuli vulombelo vwavungi vuje vukalishasha kupwa vwa vaka-Kilisitu, oloni vilongetha vyavo na vyuma vivatava vyalithethza. Mukemwo neni vyuma vimwatava hamo vyalithethza na vyuma vivatava vaka-Kilisitu vakwavo. Kuma kwapwa kwa theho kwilula vyuma vimwatava ndi? Eyo, kwapwa kwa theho, maneneni nga mushaka kukavangeya kulemetha kuvanamwetha mu Mbimbiliya.

Vaka-kukavangeya Yesu va kulivanga vavatumbwile ngwavo “vaka-Yesu” nambe ngwetu vaka-Kilisitu. (Vilinga 11:26) Kukwakele theho ya kuvaluka mathzina eka, mwafwa vaka-Kilisitu voshe vakulahelele vyuma vimo lika. Vaka-Kilisitu valikwatathenene mu kukavangeya vilongetha vya Yesu Kilisitu uje Washangumukile kukulahela kwa vaka-Kilisitu. Vati cho ku vulombelo vweni? Mwatava ngweni vukalongetha vyalongethele Kilisitu na vyuma vivakulahelele vaka-kumukavangeya va kulivanga ndi? Mwatha kuthzivuka vati chikumbululo? Kupangetha Mbimbiliya ikeyo lika ngila yatha kumikwatha.

Thinganyekeni ha chuma echi: Yesu Kilisitu wathingimikile manene Vithoneka ha kupwa Lijwi lya Njambi. Kashakele vanu vaje vakele na kwombwanetha Mbimbiliya na kutwameka vithemwa vyavo kulutwe. (Mako 7:9-13) Ngechi twatha kutava ngwetu vaka-kukavangeya Yesu va vuthunga vanapande kukulahela vyuma viyalongetha Mbimbiliya. Mukemwo muka-Kilisitu woshe napande kulihula ngwendi: ‘Vulombelo vwange vukalongetha vyuma viyalongetha Mbimbiliya ndi? Mwatha kukumbulula echi chihula nga mwetheketha vivwalongetha vulombelo vweni na vyuma viyalongetha Mbimbiliya.

Yesu wendekele ngwendi tunapande kulemetha Njambi mu vuthunga vuje vuli mu Mbimbiliya. (Yowano 4:24; 17:17) Kapositolo Paulu nendi wendekele ngwendi kwovoka kwetu kunemana ha “kuthzivuka vuthunga.” (1 Timateo 2:4) Ngechi kunapu kwa theho kukulahela vuthunga vwa mu Mbimbiliya. Nga tulingamo, cho tukovoka.

MWAKWETHEKETHELAMO VYUMA VITWAKULAHELA NA MBIMBILIYA

Tumilanya mutande vihula 6 vinakavangeyaho na kumona omwo Mbimbiliya inavikumbulwilamo. Tandeni mikanda ya mu Mbimbiliya ivanamwetha, cho thinganyekeni ha vikumbululo. Cho lihuleni ngweni: ‘Vyuma vivakalongetha ku vulombelo vwange vyalitombola na vyuma viyendeka Mbimbiliya ndi?’

Evi vihula na vikumbululo vimikwatha mwilule vulombelo vweni mu ngila yeka. Mushaka kwetheketha vilongetha vikwavo vya ku vulombelo vweni na vyuma viyalongetha Mbimbiliya ndi? Vakaleho va Yehova vavwahelela manene kumikwatha muthzivuke mwamuvwa vuthunga vwa mu Mbimbiliya. Mwatha kulomba Mukaleho wa Yehova umo mangana alilongethe neni Mbimbiliya, nambe mwatha kuya ha wembusaiti yetu ya jw.org.

1 CHIHULA: Njambi ikeye iya?

CHIKUMBULULO: Yehova, Ishe ya Yesu, ikeye Njambi wa myaka yoshe, cho ikeye Ishamatanga wa vyuma vyoshe.

VIYENDEKA MBIMBILIYA:

• “Thimbu yoshe tukakandelela kuli Njambi, Ishe ya Mwene yetu Yesu Kilisitu, omwo tukamilombelela.”—Kolose 1:3.

• “Mwene yetu na Njambi yetu. Yove wafwila kutambula vumpau na kathingimiko na ndthzili. Omwo yove watangele vyuma vyoshe.”—Kujombolola 4:11.

• Kengeni lalo na Loma 10:13; 1 Timateo 1:17.

2 CHIHULA: Yesu Kilisitu ikeye iya?

CHIKUMBULULO: Yesu ikeye Muna Njambi wa ntwatwa. Yesu vamutangele, ngechi ali na vushangumukilo. Yesu wapwa wamundondo kuli Njambi cho akononoka ku chithzango chendi.

VIYENDEKA MBIMBILIYA:

• “Tate wapwa wakama kutuvakana yange.”—Yowano 14:28.

• “Kilisitu ikeye napu chifwa cha Njambi uje kutwatha kumona. Ikeye Mwana wa ntwatwa, mutwe wa vyuma vyoshe vyakutanga.—Kolose 1:15.

• Kengeni lalo na Mateo 26:39; 1 Kolinte 15:28.

3 CHIHULA: Sipilitu ya kujela yapwa ika?

CHIKUMBULULO: Sipilitu ya kujela yapwa ndthzili yakapangetha Njambi mu kushulithilila chithzango chendi. Kuyapwile munu. Munu atha kukala na sipilitu ya kujela, cho yatha kumwana ndthzili.

VIYENDEKA MBIMBILIYA:

• “Omwo Elizaveta wathzivile kwindwitha kwa Maliya, cho mbututu wanyangumukile mwimo lyendi. Cho Elizaveta washulile na mundthzindthzime wa kujela.”—Luka 1:41.

• “Omwo mundthzindthzime wa kujela akaija hali yeni, mukashula na ndthzili.”—Vilinga 1:8.

• Kengeni lalo na Kushangumuka 1:2; Vilinga 2:1-4; 10:38.

4 CHIHULA: Vumwene vwa Njambi vwapwa vuka?

CHIKUMBULULO: Vumwene vwa Njambi yapwa fulumende ya mwilu. Yesu ikeye Mwene wa Vumwene vwa Njambi. Vumwene vwa Njambi ololo vulingitha chithzango cha Njambi chilingiwe hathi hoshe.

VIYENDEKA MBIMBILIYA:

• “Athinoni kangelo wa mu chitanu na vavali wembile lupembo lwendi, cho kwakele majwi akama mwilu endekele ngwawo, ‘Ndthzili ya kushwana kaye ololo inakundama kuli Mwene yetu na Wakuvwavetha wendi, cho akashwana myaka yoshe.’”—Kujombolola 11:15.

• Kengeni lalo na Ndanyele 2:44; Mateo 6:9, 10.

5 CHIHULA: Vanu vavavwa voshe vakai kwilu ndi?

CHIKUMBULULO: Embwe. Vanu vavandondo lika va kulongwa vaje vavatumbula ngwavo “mbunga yaindondo” vakevo vanangula Njambi vaye mwilu. Vakapwa vimyene mwilu, cho vakayula vanu hamo na Yesu.

VIYENDEKA MBIMBILIYA:

• “Kethi muthzive lyova, yeni mbunga yaindondo, omwo Ishweni navwahelela kumyana Vumwene.”—Luka 12:32.

• “Vakapwa vaka-kukombelela va Njambi na Kilisitu, cho vakashwana hamo nendi.”—Kujombolola 20:6.

• Kengeni lalo na Kujombolola 14:1, 3.

6 CHIHULA: Viyongola muka wakala navyo Njambi ha kaye na vanu?

CHIKUMBULULO: Mu Vumwene vwa Njambi, kaye koshe kakapwa palandaisi, cho vanu va kulongwa vakakala na mivila ya kuthungama na kukakala mu kwoloka na kuyoya myaka yoshe.

VIYENDEKA MBIMBILIYA:

• “Vaka-kulikehetha vakashwana mu lifuti, cho vakajolela na kukala mu kwoloka.”—Myatho 37:10, 11.

• “Akathikumuna mithothzi yoshe ku mesho avo. Cho kukukakala kuthsa nambe vuthiwa nambe kulila nambe kukemanga. Omwo vyuma vyalaja vineti.”—Kujombolola 21:3, 4.

• Kengeni lalo na Myatho 37:29; 2 Petulu 3:13.