MUTHZIMBU WA MU KUYOYA

Kupwa Kaveveve Kukwanjonowethele Kulongetha Vakwetu

Vawambulula Kuli Walter Markin

Vanjimbwitikile mu 1941 te njili na myaka 12. Oloni njakuthzivithithile mwamuvwa vuthunga vwa mu Mbimbiliya mu 1946. Kwethzile vati ngocho? Vandameneni njimileke muthzimbu wange.

MU 1910, vithemi vange vatundile ku Tbilisi mu Georgia, kuya ku Canada. Vakakele kuyehi na Pelly, mu Saskatchewan, ku kangombe ka yambi mu Canada. Njathemukile mu 1928, cho yange mutinikila wa vana va kupwa 6. Vatate vathsile te kanda njithemuke. Vanana cho, vathsile, te njichili njimwanike. Ndokathzi yange wa mukulunu Lucy nendi wathsile te ali na myaka 17. Kutundoho, vanananu va Nick vanjambatele hamo lika na vandokathzi vange na kukakala netu.

Litangwa limo vaka-nanga yange vanjimwene te njikoka ku mukila wa kavalu wa nkomba uje wakele mu lihya. Vanjiyalumukilile, mwafwa vathinganyekele ngwavo anjivulumuna. Kunjathzivile vivakele na kunjileka, mwafwa njavakengethele nima, cho njatwaleleleho kukoka ku mukila. Uje kavalu kanjivulumwine, oloni hakeho havanangukilile vaka-nanga yange ngwavo njikaveveve.

Kavuthamba ka vanananu va Nick, wavalekele ngwendi vanjithonekethe ku sikola ya tuveveve ije yakele ku Saskatoon, mu Saskatchewan, cho valingile vene ngocho. Njakele na kulithziva vuli kuje ku sikola kuvanjitwalele, mwafwa yakele kulako na vaka-nanga yange, cho njakele lika na myaka itanu. Njakele na kwendela vaka-nanga yange mu vithimbu vya kuhwima na mu vithimbu vya kushoka masikola. Mu kwita kwa thimbu, njalilongethele ndaka ya tuveveve na kushangumuka kweha na vakwetu tuveveve.

KULILONGETHA VUTHUNGA VWA MU MBIMBILIYA

Mu 1939, ndokathzi yange wa mukulunu, Marion washombokele kuli Bill Danylchuck, cho watwambatele na yayange Frances na kukakala netu. Vakevo valivangele kuliwana na Vakaleho va Yehova mu nanga yetu. Ha thimbu ya kushoka masikola, vakele na kunjileka vyuma vivalilongethele mu Mbimbiliya. Kwakaluwile kuthimutwiya navo mwafwa kuvathzivukile ndaka ya tuveveve. Oloni vamwene ngwavo njakele na lishungu lya kulilongetha vyuma vya ku sipilitu. Njanangukile ngwange vakele na kupangetha vyuma viyendeka Mbimbiliya, cho njakele na kuya navo mu lihya. Kutundoho, njashakele ngwange vanjimbwitike, cho lya September 5, 1941, Bill wanjimbwitikile mu mungomo wa mema avatekwile mu lithima. Aje mema atonwele manene.

Walter Markin ali ha chivunga cha tuveveve ku chiwano cha mutambela ku Cleveland, mu Ohio, mu 1946 — Njili ha chivunga cha vakwetu tuveveve ku chiwano cha mutambela ku Cleveland, mu Ohio, mu 1946

Omwo njaile kwimbo mu 1946, ha thimbu ya kushoka masikola, twakakele ku chiwano cha mutambela ku Cleveland mu Ohio, ku U.S.A. Ha litangwa lya kulivanga lya chiwano, vandokathzi vange vanjithonekelele vithimpi ha mapapelo mangana njikavangeye mwamuvwa vilongetha. Oloni ha litangwa lya mu chivali njakathamene omwo vanjilekele ngwavo kuli chivunga cha tuveveve na muka-kuvalumbunwina. Ha thimbu oyo, njalikuwile vilongetha na kuthzivithitha mwamuvwa vuthunga vwa mu Mbimbiliya.

KULONGETHA VUTHUNGA

Ndthzita ya Kaye ya mu Chivali muyahwile, vanu vashangumukile kuthzema manene lifuti lyavo. Munjatundile ku chiwano cha mutambela, njalyangwilile kulwila likulahelo lyange ku sikola. Ngechi, njalikelele kulemetha pandelo na kwimba mwatho wa lifuti. Cho njalikelele lalo na kulikoveletha mu vilika vya matangwa a kuhwima nevi vya vichechi. Valongethi va sikola valuvalele manene, cho vanjishendumwine na kwendeka vyuma vya makuli hali yange mangana vatengulule vithinganyeka vyange. Echi chanenethele ngwavo na vakwetu vana va sikola vanjithzinde, oloni yapwile thimbu yaivwa ya kwana vukaleho. Vakwetu mutwakovelelele hamo sikola va Larry Androsoff na Norman Dittrick na Emil Schneider navo valilongethele vuthunga, cho vali na kupangela Yehova mu kulongwa ano matangwa.

Njambulwilile vakwetu tuveveve munjakele na kuya ku vinganda vyeka. Chakumwenako, njambulwilile mukwenje Eddie Tager ku Montreal, uje wapwile chikenya, ku mwela uvakalikungulwila tuveveve. Walikwatathanene na chikungulukilo chije chikalikwathetha ndaka ya tuveveve ku Laval, mu Quebec, kweta na ha kuthsa kwendi mwakawali. Njaliwanene lalo na Juan Ardanez, uje wapwile muka-kutondethetha mangana athzivuke indi vyuma vyanalilongetha mu Mbimbiliya vyapwile vya vuthunga ngwe mu vakele na kulingila vaka-Mbeleya. (Vili. 17:10, 11) Nendi walilongethele vuthunga, cho wapangelele Njambi mu kulongwa na kupwa mukulunu ku Ottawa, mu Ontario, kweta na ha kuthsa kwendi.

Walter Markin ali na kwambulwila mu tapalo mu 1950 — Tuli na kwambulwila mu tapalo, mu 1950

Njajalukilile ku Vancouver mu 1950. Nameme njikalikuwu kwambulwila vakwetu tuveveve, oloni kuli chuma chimo chalingiwile, chije kunjikevala. Njambulwilile Chris Spicer uje kapwile kaveveve, injaliwanene nendi mu tapalo. Watambwile mangazini injamwanene na kunjileka ngwendi njikalimone na munalume wendi Gary. Njaile ku njuvo yavo, cho twakathimutwiyiye vyuma vyavingi kupangetha vithona. Eyi ikeyo lika thimbu injathimutwiyiye navo. Munima ya myaka, njakathamene omwo twakaliwanene ku chiwano cha mutambela ku Toronto, mu Ontario. Gary vamumbwitikile lije vene litangwa litwaliwanene. Vinjaliwanene navyo vyanjilongetha kutwalelelaho kwambulula, mwafwa kutwatha kuthzivuka vyuma vyavivwa vinatha kutundamo.

Kutundoho, njelukile lalo ku Saskatoon. Njakaliwanene na munakathzi uje wanjilombele ngwendi njililongethe Mbimbiliya na vana vendi vavampatha, va tuveveve va Jean na Joan Rothenberger vaje vakele ha sikola hanjakele. Ava vambanda, navo vashangumukile kulongetha vakwavo vana va sikola vyuma vivalilongethele. Kukapwa muje, vana va sikola vatanu vapwile Vakaleho va Yehova. Umo wavo wapwile Eunice Colin. Njalithzivukilile nendi ha sikola ya tuveveve te njiya na kumanetha. Ha thimbu ije wanjanene vyakulya na kunjileka ngwendi tulikute vuthamba. Ikeye wakupwile munu wa theho mu kuyoya kwange, cho twalyambatele.

Walter na Eunice Markin mu 1960 na mu 1989 — Njili na Eunice mu mwaka wa 1960 na 1989

Vaina ya Eunice muvathzivile ngwavo ali na kulilongetha Mbimbiliya, valekele mukulunu wa sikola ngwavo amuvindike. Ou mukulunu wanyekele Eunice mavulu akele na kulilongetha. Oloni, Eunice watwaleleleho kukulahela kuli Yehova. Omwo washakele kumumbwitika, vithemi vendi vamulekele ngwavo: “Nga upwa Mukaleho wa Yehova, cho tukusheka hano ha njuvo.” Chili vene, vamushekele ha njuvo omwo wakele na myaka 17, cho nanga ya Vakaleho yamwambatele na kukakala nendi. Watwaleleleho kulilongetha, cho vamumbwitikile. Omwo twalyambatele mu 1960, vithemi vendi kuvethzile ku chilika chetu cha vulo. Oloni munima ya myaka, vashangumukile kututhingimika mwafwa ya vyuma vitwakulahelele nomwo mutwalelelelemo vana vetu.

YEHOVA NANJINYUNGU

Nick na Deborah Markin vali ha Mbetele ya ku London — Munange Nicholas na munakathzi wendi, Deborah, vali na kupangela ha Mbetele ya ku London

Nameme twapwa tutuveveve, oloni tunalele vana vetu va kupwa 7 vaje kuvapwile tuveveve. Echi chapwile chachikalu, oloni twavashongangeyeye ngwetu valilongethe ndaka ya tuveveve mangana tuthimutwiye navo mwamuvwa na kuvalongetha vuthunga. Vandolome na vandokathzi va mu chikungulukilo vanatukwatha manene. Chakumwenako, chithemi umo watuthonekelele ngwendi munetu nakala na kwendeka majwi amavi mu Njuvo ya Vumwene. Twatwaleleleho kukwatha vana vetu ngwetu vapangeleho. Vana vange vawana va, James na Jerry na Nicholas na Steven, vali na kupangela Yehova mu kulongwa hamo lika na vanakathzi vavo na vana vavo. Voshe vawana vapwa vakulunu mu chikungulukilo. Kutundoho, Nicholas na munakathzi, wendi Deborah, vali na kukwatha mu chipangi cha kulumbununa mu ndaka ya tuveveve ku munango wa Britain. Cho Steven na munakathzi wendi, Shannan navo vali na kulumbununa ndaka ya tuveveve ku munango wa United States.

Vana vange va James na Jerry na Steven na vanakathzi vavo vali na kukundwiya mu chipangi cha kwambulula mu ndaka ya tuveveve mu vingila vya kulithethzathethza

Eunice walifwitile na mushongo wa kansa, cho watokele tahi kanda tupwithe myaka 40 mu vulo vwetu. Wapwile wa kuthimpa ha thimbu yavinjile. Likulahelo lyendi mu kuthanguka lyamutakamethele. Njavandamena kukalimona nendi lalo.

Faye na James Markin; Jerry na Evelyn Markin; Shannan na Steve Markin — Faye na James, Jerry na Evelyn, Shannan na Steve

Mu February 2012, njawile na kupokoka nyonga, cho njalombele vukwathi. Ngechi, njajalukile na munange na munakathzi wendi. Ha thimbu ino, tuli na kulikwatathana na chikungulukilo cha Calgary chije chikalikwathetha ndaka ya tuveveve, cho hanga njimukulunu. Olu lukelwo lwapwile lwa kulivanga kukala mu chikungulukilo cha tuveveve. Kushwa mu 1946, njinakala lika mu chikungulukilo cha Vundele. Vika vyanjikwathele njitakame ku sipilitu? Yehova nashulithilila chikulahetho chendi cha kukwatha vithiwa. (Myatho 10:14) Njakandelela kuli voshe vanalifwiti kulilongetha ndaka ya tuveveve na kunjithonekela na kunjinungulwila mu ndaka ya tuveveve.

Walter Markin, ali na myaka 79, na kwata livulu lya vapayiniya na DVD ya mu ndaka ya tuveveve — Ku sikola ya vapayiniya ya mu ndaka ya tuveveve ya ku America te njili na myaka 79

Vithimbu vimo njakele na kulithziva kuvihya ku mbunge na kuthzeya, omwo ya kujeneka kuthziva vivakele na kwendeka vanu. Cho njamwene lalo ngwe tuveveve vavayengwile manene. Ha vithimbu evi, njakele na kwanuka majwi endekele Petulu kuli Yesu ngwendi: “Mwene tuya kuli iyajo lalo? Yove uli na majwi aje ana mwonyo wa myaka yoshe.” (Yowa. 6:66-68) Njalilongetha kuvandamena ngechi muvanalingila vandolome na vandokathzi va tuveveve ha myaka yaingi. Njalilongetha kukulahela kuli Yehova na munga yendi, cho echi chinanjikwatha manene. Hano njili na vyakulya vyavingi vya ku sipilitu, cho njikalikuwu kuthimutwiya na vakwetu ku viwano vya chikungulukilo nevi vya mutambela mu ndaka ya tuveveve ya ku America. Njinawana kuvethzika kwakama mu kuyoya kwange ha kupangela Yehova, Njambi yetu wakama.