Mwafwa Vika Tunapande Kutwalelelaho ‘Kwima Vushuka Vwavungi’?

1, 2. (a) Yesu walekele vika vandongethi vendi thimbu kanda athse? (Kengeni chikupulo ha liputa 17) (b) Mwafwa vika tunapande kuthzivuka vitukapangela chipangi cha kwambulula? (c) Tuthimutwiya ha vyuma muka?

YESU wathikamene na tupositolo vendi thimbu yailaha ha vuthsiki vwendi vwa mamanethelelo hano hathi, cho wavatakamethele na kuvamwetha ngwendi wavathzema manene. Cho lalo wavatelelele chithimo cha mukolovothzi wa vushuka vwa vinyu chije chitunathimutwiya mu chilongetha chinahu. Yesu wapangethele echi chithimo mu kushongangeya vandongethi vendi vatwaleleho ‘kwima vushuka vwavungi’ nambe ngwetu kutwalelelaho kwambulula muthzimbu wa Vumwene.—Yowa. 15:8.

² Yesu walekele vandongethi vendi vyuma vivapandele kulinga novyo vivapandele kuvilingila. Wavalekele vivapandele kwambulwila. Mwafwa vika tunapande kuthimutwiya ha vyuma evi? Kuthzivithitha mwamuvwa kutulingitha tutwaleleleho kwambulula na kutushongangeya kwana “vukaleho ku miyati yoshe.” (Mateo 24:13, 14) Tuthimutwiyeni ha vyuma viwana vivanendeka mu Vithoneka vije vitushongangeya kwambulula. Kutundoho, tuthimutwiya lalo ha vyuma viwana vyanatwana Yehova vije vitukwatha kutwalelelaho kwima vushuka.

TUKASHANGATHZALA YEHOVA

3. (a) Vyuma muka vivanendeka ku mukanda wa Yowano 15:8 vije vikatushongangeya kwambulula? (b) Vushuka vwa mu chithimo cha Yesu vwimanena vika, cho mwafwa vika echi chithimo chinalitombola na chipangi cha kwambulula?

³ Chuma chakama chikatulingitha tupange chipangi cha kwambulula, chinapu kushangathzala Yehova na kujeletha lithzina lyendi ku mesho a vanu. (Tandeni Yowano 15:1, 8.) Anukeni ngweni Yesu wethekethele Ishe Yehova ku ndimi, muka-kulima mikolovothzi ya vushuka vwa vinyu. Yesu walyethekethele ku mukolovothzi wa vushuka vwa vinyu, vandongethi vendi cho wavethekethele ku minango. (Yowa. 15:5) Ngechi vushuka vunapu muthzimbu wa Vumwene uvakambulula vaka-kukavangeya Kilisitu. Yesu walekele tupositolo vendi ngwendi: “Vumpau vwa Tate vusholoka nga mwima vushuka vwavungi.” Ngwe mwa mukolovothzi uje wima vushuka vwavuvwa mu ukana vumpau kuli uje navulimi, netu tuthingimika Yehova nga twambulula muthzimbu wa vumwene mutwathela mwoshe.—Mateo 25:20-23.

4. (a) Tukajeletha vati lithzina lya Njambi? (b) Mukalithzivi vati ha kumyana chipangi cha kujeletha lithzina lya Njambi?

⁴ Chipangi chetu cha kwambulula chikajeletha vati lithzina lya Njambi? Kethi yetu tulingitha lithzina lya Njambi lijele manene, mwafwa lyapwa laja lya kujela. Oloni kapolofweto Isaya wendekele ngwendi: “Anuka ngechi yange Kalunga muka-ndthzili yoshe, njapwa wa kujela.” (Isaya 8:13) Tukajeletha lithzina lya Njambi mu vingila vikwavo. Ngila imo inapu kulimona kupwa lya kulitila kutuvakana mathzina oshe na kukwatha vakwetu valimone kupwa lya kujela. (Mateo 6:9) Chakumwenako, tujeletha lithzina lya Njambi nga tuleka vanu vifwa vya Yehova vya kulitila na vyuma vyanayongola kukalingila vanu, cho vamona ngwavo Satana wapwa muka-makuli na vungungu. (Kusha. 3:1-5) Cho lalo nga tukwatha vanu va mu chitingitingi chetu vamone ngwavo Yehova nafwila “kutambula vumpau na kathingimiko na ndthzili,” cho tujeletha lithzina lya Njambi. (Kujo. 4:11) Rune uje napu painiya ha myaka 16 wendekele ngwendi: “Kuthzivuka ngwange njapwa nji mukaleho wa Ishamatanga wa vyuma vyoshe, kukanjithzivitha manene kuvwaha ku mbunge. Echi chikanjishongangeya kutwalelelaho kwambulula muthzimbu wauvwa.”

TWATHZEMA YEHOVA NA MUNENDI

5. (a) Vyuma muka vivanendeka ku mukanda wa Yowano 15:9, 10 vije vikatulingitha twambulule? (b) Yesu wamwethele vati theho ya kukakateya?

⁵ Tandeni Yowano 15:9, 10. Cho lalo tukambulula vya Vumwene, mwafwa twathzema Yehova na Yesu kutundilila kwithi ya vimbunge. Echi chikecho chuma chakama chikatulingitha twambulule. (Mako 12:30; Yowa. 14:15) Yesu walekele vandongethi vendi ngwendi vatwaleleleho ‘kukala mu chithzemo chendi’ thimbu yoshe. Mwafwa vika? Mwafwa kutwalelelaho kupwa vandongethi va Kilisitu va kulongwa kwatonda kulikoletha. Yesu wamwethele theho ya kukakateya nambe ngwetu kulikoletha omwo wapangethele manene lijwi lya ‘kukala,’ mu viñanda vyavindondo vije vili ku Yowano 15:4-10.

6. Twatha kumwetha vati ngwetu tushaka kutwalelelaho kukala mu chithzemo cha Kilisitu?

⁶ Twatha kumwetha vati ngwetu tushaka kukala mu chithzemo cha Kilisitu na kumuthzivitha kuvwaha ku mbunge? Twatha kulinga ngocho nga twononoka mashiko endi. Yesu ali na kutuleka ngwendi tulinge vyuma vyalingile ikeye. Ngechi wendekekele ngwendi: “Ngwe omwo njononoka mashiko a Tate, cho njili mu chithzemo chendi.” Yesu natwakela mwanja.—Yowa. 13:15.

7. Kwononoka na chithzemo vyalitombola vati?

⁷ Yesu wamwethele kulitombola kuli mukati ka kwononoka na chithzemo, omwo wendekele ngwendi: “Woshe uje atambula mashiko ange na kuwononoka ikeye uje anjithzema.” (Yowa. 14:21) Cho lalo nga twononoka lishiko lya Yesu, lya kuya na kwambulula, tumwetha ngwetu twathzema Njambi mwafwa Yesu wendekele mashiko akutunda kuli Ishe. (Mateo 17:5; Yowa. 8:28) Nga tuthzema Yehova na Yesu, cho navo vatuthzema.

TUKANANGULA VANU

8, 9. (a) Vyuma muka vikwavo vikatushongangeya kwambulula? (b) Mwafwa vika majwi a Yehova aje ali ku mukanda wa Ezekiyele 3:18, 19 na 18:23 akatushongangeya kutwalelelaho kwambukula?

⁸ Kuli vyuma vikwavo vikatulingitha tukakateye mu chipangi cha kwambulula. Tukambulwila vanu mangana tuvanangule. Mbimbiliya yamwetha ngwayo Nowa wapwile ‘muka-kwambulula.’ (Tandeni 2 Petulu 2:5.) Omwo wakele na kwambulula, wanangwile vanu vya Livathzi lije lyethzile na kunyongetha kaye koshe. Vika twendekela ngocho? Yesu wendekele ngwendi: “Ha matangwa aje omwo Livathzi kanda lyete, vanu valile, vanwile, vambatele, na kushombwetha, noho ha litangwa lije omwo Nowa wakovelele mu vwato, oloni kuvathzivukile chuma muka chikalingiwa noho Livathzi lyethzile, cho voshe vanyongele. Mukemwo muchikapwa omwo Muna Munu akaija.” (Mateo 24:38, 39) Nameme vanu kuvakele na kutambula muthzimbu wa Njambi, Nowa wapangele chije chipangi cha kwambulula chivamwanene.

⁹ Ano matangwa, tukambulula vya Vumwene mangana tukwathe vanu vathzivuke vyuma vyanayongola Njambi kukavalingila kulutwe. Twashaka ngwetu vanu vatambule muthzimbu wauvwa mangana ‘vakayoye,’ mwafwa echi chikecho chithzango cha Njambi. (Ezeki. 18:23) Ngechi, omwo twambulwila vanu ku njuvo na njuvo nambe ku mbunga, tushaka kuvanangula ngwetu Vumwene vwa Njambi vukanyongetha vuvi vwoshe vuli muno mu kaye.—Ndanye. 2:44; Ezeki. 3:18, 19; Kujo. 14:6, 7.

TWATHZEMA VAKWETU

10. (a) Chuma muka chikatushongangeya kwambulula chivanendeka ku Mateo 22:39? (b) Paulu na Silasi vakwathele vati muka-kunyunga kamenga muvakele mu Filipu? Lumbununeni.

¹⁰ Kuli chuma chikwavo chikatulingitha tutwaleleho kwambulula. Tukambulula mwafwa twathzema vakwetu. (Mateo 22:39) Chithzemo chetu chikecho chikatushongangeya tutwaleleleho kwambulula, mwafwa tuthzivuka ngwetu vyuma vimo vikalingiwa mu kuyoya kwa vanu vinatha kutengulula vimbunge vyavo. Tuchithimutwiyeni ha vyuma vyaliwanene navyo kapositolo Paulu na mukwavo Silasi. Omwo vakele mu nganda ya Filipu, vaka-kulwitha vakwatele Paulu na Silasi na kuvaka mu kamenga. Cho mukati ka vuthsiki kwethzile mandunduma akama, aje aningangethele kamenga na kushokolola vikolo. Muka-kunyunga kamenga wathinganyekele ngwendi vindthzinda voshe vanatewe, cho washakele kulithsiya. Oloni Paulu watambekele ngwendi: “Kethi ulivulumune.” Uje Muka-kunyunga kamenga wavehwile ngwendi: “Vikajo njinapande kulinga ngechi njovoke?” Cho vamukumbulwile ngwavo: “Kulahela kuli Mwene Yesu, cho ukovoka.”—Vili. 16:25-34.

11, 12. (a) Ñanda ya muka-kunyunga kamenga itulongetha vika ha chipangi cha kwambulula? (b) Chipangi muka chitunapande kupanga manene?

¹¹ Ñanda ya muka-kunyunga kamenga, itulongetha vika ha chipangi chetu cha kwambulula? Anukeni ngweni muka-kunyunga kamenga watengulwile mbunge yendi na kulomba vukwathi munima ya lindunduma. Mu ngila imo lika, vanu vaje kuvethi na kutambula muthzimbu, vanatha kutengulula vimbunge vyavo na kushakethzeka vukwathi nga valiwana na vukalu. Chakumwenako, vanu vamo va mu chitingitingi mutukambulwila hamo vanathzeye mwafwa ya kuvatunditha chipangi mu kukathumuna. Vakwavo vanathzeye mwafwa ya kuthsa kwa vulo vwavo. Vakwavo lalo vanatha kuthzeya mwafwa ya kuvinja mushongo wakama nambe kupokoka mbunge mwafwa ya kuthsitha munu ivathzema. Vanu muvakaliwana na vukalu vwa chifwa echi, vakalihula vihula vyavingi vya kukundama ku kuyoya, vije kanda valihulevyo laja. Vanatha kulihula ngwavo: ‘Vika vinjinapande kulinga mangana njikovoke?’ Nga twambulwila vanu va chifwa echi, vanatha kutolilila mutuvaleka vyuma vyanayongola kukatulingila Njambi kulutwe.

¹² Ngechi, nga tutwalelelaho kwambulula, cho muthzimbu wauvwa utwambulula unatha kuthzembeleka vanu vatuwana, vaje vali mu vukalu. (Isaya 61:1) Charlotte uje napanga chipangi cha thimbu yoshe ha myaka 38 wendekele ngwendi: “Vanu ano matangwa vanathzimbala. Tunapande kuvaleka muthzimbu wauvwa.” Ejvor uje napu painiya ha myaka 34 wendekele ngwendi: “Vanu vavangi ano matangwa vakalithzivi manene kuthzeya. Ngechi, njitonda kuvakwatha. Evi vikevyo vikanjishongangeya manene kwambulula.” Kuthzema vakwetu chikecho chuma chakama chikatushongangeya tutwaleleleho kwambulula.

VYUMA VITUKWATHA TUTWALELELEHO KWAMBULULA

13, 14. (a) Chifwa muka chivanendeka ku mukanda wa Yowano 15:11? (b) Vika vitukwatha tupwe va kuvwahelela ngwe Yesu? (c) Kuvwahelela kutukwatha vati mu chipangi cha kwambulula?

¹³ Ha vuthsiki vwa mamanethelelo a kuyoya kwendi kwa hano hathi, Yesu walekele tupositolo vendi vyuma vya kulithethzathethza vije vyavakwathele vatwaleleho kwima vushuka. Vyuma muka vyavalekele, cho vyatha kutukwatha vati?

¹⁴ Kuvwahelela. Kuma kwapwa kwakukalu kwononona lishiko lya Yesu lya kwambulula ndi? Embwe. Omwo wamanethele kuta chithimo cha mukolovothzi wa vushuka vwa vinyu, Yesu wamwethele ngwendi kwambulula vya Vumwene kukatunenela kuvwahelela. (Tandeni Yowano 15:11.) Watukulahethele ngwendi kuvwahelela kwendi kukala muli yetu. Mu ngila muka? Ngwe mutunendekela ku maputukilo, Yesu walyethekethele ku mukolovothzi wa vushuka vwa vinyu, vandongethi vendi cho wavethekethele ku minango. Mema na vya kulya vije vitunda mu livu viketi mu mukolovothzi athinoni vikete ku minango. Cho nga munango unapamuka ku mukolovothzi, kuwatha kutambula vya kulya na mema. Mu ngila imo lika, nga tukavangeya mwamuvwa myanja ya Kilisitu, cho netu tulimwena kuvwahelela kwakakala nakwo ha kulinga chithzango cha Ishe. (Yowa. 4:34; 17:13; 1 Petu. 2:21) Hanne uje napu painiya ha myaka ya kutuvakana 40 wendekele ngwendi: “Kuvwahelela kunjikathzivi ha kulinga chipangi cha kwambulula kukanjishongangeya njitwaleleho kupangela Yehova.” Kupwa va kuvwahelela kutukwatha twambulule nameme mu mitambela muje vanu vavangi kuvethi kutambula muthzimbu wauvwa.—Mateo 5:10-12.

15. (a) Chifwa muka chivanendeka ku mukanda wa Yowano 14:27? (b) Kwoloka kutukwatha vati tutwaleleleho kwima vushuka?

¹⁵ Kwoloka. (Tandeni Yowano 14:27.) Ha vuthsiki vwa mamanethelelo vwa kuyoya kwendi hano hathi, Yesu walekele tupositolo vendi ngwendi: ‘Njili na kumyana kwoloka kwange.’ Kwoloka kwendi kutukwatha vati twime vushuka? Mutukatwalelelaho kwambulula, tukalithzivi kukala mu kwoloka mwafwa ya kuthzivuka ngwetu vituli na kulinga vithzivitha Yehova na munendi Yesu kuvwaha. (Myatho 149:4; Loma 5:3, 4; Kolo. 3:15) Ulf uje napanga chipangi cha thimbu yoshe ha myaka ya kupwa 45 wendekele ngwendi: “Njikajuka munjikakala mu chipangi cha kwambulula, oloni echi chipangi chikanjishuvulwitha mu kuyoya kwange.” Kukala mu kwoloka kunapu kuvethzika kwakama manene.

16. (a) Kuvethzika muka chituli nacho chije chivanendeka ku mukanda wa Yowano 15:15? (b) Vyuma muka vivapandele kulinga tupositolo va Yesu mangana vatwaleleleho kupwa vavuthamba vendi?

¹⁶ Kupwa vavuthamba va Yesu. Omwo wamanethele kwendeka ngwendi kuvwahelela kwa tupositolo vendi kunapande kupwa “kwa mutunu,” cho wavalekele lalo theho ya kumwetha chithzemo chakama manene. (Yowa. 15:11-13) Kutundoho, wendekele ngwendi: ‘Njimitumbula vavuthamba.’ Kunapu kuvethzika kwakama kupwa vavuthamba va Yesu. Vyuma muka vivapandele kulinga tupositolo va Yesu mangana vatwaleleleho kupwa vavuthamba vendi? Vapandele ‘kutwalelelaho kwima vushuka.’ (Tandeni Yowano 15:14-16.) Myaka ivali kunima, Yesu walekele tupositolo vendi ngwendi: “Cho yeni mukambulule ngweni, ‘Vumwene vwa mwilu vuli muyehi.’” (Mateo 10:7) Cho ha vuthsiki vuje vene wavashongangeye ngwendi vakakateye mu chipangi cha kwambulula. (Mateo 24:13; Mako 3:14) Valiwanene na vyetheko mu kwononoka lishiko lya Yesu, oloni vathele kwononoka na kutwalelelaho kupwa vavuthamba vendi. Vika vyavakwathele? Kuli chuma chikwavo chavakwathele.

17, 18. (a) Kuvethzika muka chituli nacho chije chivanendeka ku Yowano 15:16? (b) Echi kuvethzika chakwathele vati vandongethi va Yesu? (c) Vika vyatha kututakametha matangwa ano?

¹⁷ Njambi akakumbulula malombelo etu. Yesu wendekele ngwendi: “Chuma choshe mukalomba kuli Tate mu lithzina lyange ikeye akamyanacho.” (Yowa. 15:16) Echi chikulahetho chatakamethele manene tupositolo va Yesu.a Nameme ha thimbu eyi tupositolo kuvathzivukile mwamuvwa ngwavo Ntwama yavo wakele muyehi na kuthsa. Oloni kuthsa kwendi kukwalumbunwine ngwavo vathala likalyavo kwa kujeneka wa kuvakwatha. Yehova walivwahethelele kuvana vukwathi vwoshe vuvalombele kuli ikeye vwa kukundama ku chipangi cha kwambulula vya Vumwene. Cho valimwenenene mwakakumbulwila Yehova vaje valomba vukwathi kuli ikeye.—Vili. 4:29, 31.

¹⁸ Vikevyo vili na kulingiwa na ano matangwa. Nga tutwalelelaho kwima vushuka tutakametha vuthamba vwetu na Yesu. Cho lalo tukulaheleni ngwetu nga tulombela kuli Yehova, cho atukwatha tuhyane vukalu vutuliwana navwo omwo twambulula muthzimbu wauvwa wa Vumwene. (Fili. 4:13) Twakandelela manene kuli Njambi uje akakumbulula malombelo etu na kuli Yesu uje napu kavuthamba ketu. Evi vyuma vyanatwana Yehova vitukwatha tutwaleleleho kwima vushuka.—Yako. 1:17.

19. (a) Mwafwa vika tunapande kutwalelelaho kwambulula? (b) Vika vitukwatha tumanethe chipangi chanatwana Njambi?

¹⁹ Ngwe mutunathimutwiya muno mu chilongetha, tunalyana mu chipangi cha kwambulula mwafwa tushaka kwana vumpau kuli Yehova na kujeletha lithzina lyendi na kusholola chithzemo chetu kuli Yehova na Yesu, cho lalo tuli na kunangula vanu na kusholola chithzemo chetu kuli vakevo. Kutundoho lalo, kupwa va kuvwahelela na kukala mu kwoloka na kupwa vavuthamba va Yesu, na kulimwena omwo Njambi akakumbulula malombelo etu, kutukwatha tumanethe chipangi chanatwana. Yehova akavwahelela manene mwakamono tuli na kutwalelelaho ‘kwima vushuka vwavungi’ na vimbunge vyetu vyoshe.