Jenjukeni Evi Vyuma Nga Mutwamenena Chilongetha cha Mbimbiliya

Kwendeka Manene: Kethi mulithzive ngweni munapande kulumbununa vyoshe. Yesu wapangethele vihula mukukwatha vanu vathinganyeke, na kuwana vakevo vavenya vikumbululo. (Mat 17:24-27) Vihula vikanenetha ngwavo chilongetha chende mwamuvwa, na kumikwatha lalo kuthzivuka vyuma vyathzivithitha nevi vyakulahela ndongethi yeni. (be-SK 253 ¶2-3) Nga munehula chihula, cho kwateni mbunge na kuvandamena chikumbululo. Nga ndongethi yeni akumbulula mu kuhenga, cho kethi mu muleke chikumbululo oho vene, munapande kumwihula lalo chihula chije chinenetha ngwavo akumbulule mu kuthungama. (be-SK 238 ¶1-2) Livandekeni kwendeka mangana munu imulongetha athe kuthzivithitha vwino.—be-SK 230 ¶4.

Kukaluwitha Chilongetha: Jenjukeni kwendeka vyuma vyavingivingi vimuthzivuka ha chilongetha. (Yow 16:12) Thimutwiyeni lika ha vithimpi vyakama vili mu palangilafu. (be-SK 226 ¶4-5) Vyuma vyakulova manene vyatha kumbundungiya vithimpi vya theho, nameme vinapu vyavivwa. (be-SK 235 ¶3) Nga ndongethi yeni nathzivithitha thimpi, cho yeni ha palangilafu ikwavo.

Kushaka Kumanetha Vwathi Vilongetha: Tukalilongetha na vanu mangana tuvete ku vimbunge, kethi kushaka kumanetha vwathi livulu. (Luk 24:32) Pangetheni ndthzili ya Lijwi lya Njambi mu kuthimutwiya navo ha vithoneka vije vimwetha vithimpi vyakama vili mu chilongetha. (2Ko 10:4; Hev 4:12; be-SK 144 ¶1-3) Pangetheni vyakumwenako vyavyathi. (be-SK 245 ¶2-4) Thinganyekeni ha vukalu vwa ndongethi yeni na vyuma vyakulahela mangana mukundike chilongetha kuli ikeye. Mwihuleni vihula vyakufwa ngwe evi: “Ulithziva vati ha vyuma viulinakulilongetha?” “Evi vyuma vitulongetha vika hali Yehova?” “Vuvwa muka vuunamono vuli mu kupangetha echi chinangulo?”—be-SK 238 ¶3-5; 259 ¶1.