Biñanda bya Kupangesa mu Mukanda wa Biwano wa Buyoye Bwetu Baka-Kilisitu na Cipangi Cetu
MARCH 4-10
BISIMPI BYA SEHO BYA MU LIJWI LYA NJAMBI | LOMA 12-14
“Kukala na Cizemo ca Busunga Kulumbununa Bika?”
(Loma 12:10) Lizemeni umo na mukwabo ngwe bandolome na bandokazi, co litakameseni na kulisingimika umo na mukwabo.
it-1 55
Cizemo
Lijwi lya Cingiliki lya phi·la·del·phiʹa lilumbununa ‘kulizema umo na mukwabo.’ Bandolome na bandokazi ha kupwa baka-Kilisitu banapande kulimwesa eci cizemo mu cikungulukilo. (Lom 12:10; Hev 13:1, taleni lalo 1 Pe 3:8) Ngeci, umo na umo mu cikungulukilo napande kuzema manene mukwabo ngwe kabushoko kendi mpundu. Nameme bandolome na bandokazi bakamwesa eci cizemo mu cikingulukilo, oloni banapande kubwezelelako mu kulimwesaco.—1 Te 4:9, 10
Lijwi lya Cingiliki lya phi·loʹstor·gos, lije lilumbununa kukala na cizemo, bakalikwasesalyo manene ku banu baje bapwa babusamba bakama. Eli lijwi lya sterʹgo lije lyatunda ha lijwi lya phi·loʹstor·gos bakalipangesa manene kuli baje bali mu nanga imo. Ngeci, kapositolo Paulu washongangeyeye manene baka-Kilisitu bakale na cizemo ca cifwa eci. (Lom 12:10) Paulu wendekele lalo ngwendi mu matangwa a kukotoka banu kubakazibila bakwabo ngozi, co banu ba cifwa eci banapande kutsa.—2 Ti 3:3; Lom 1:31, 32.
(Loma 12:17-19) Nga umo nakubihisila, keti umwilwisile bubi bwendi lalo embwe. Lingeni byabibwa ku mesho a banu boshe. 18 Lingeni byuma byoshe ngwe mumunasela na kuyoya mu kwoloka kuli munu na munu. 19 Basamba bange, keti mulinge shambandinga, oloni eceleni bukalu bwa Njambi bucilinge. Omwo bisoneka byendeka ngwabyo, “Yange njilinga shambandinga, njikabelwisila fweto yabo, mwanendeka Shukulu Kalunga.”
w09 10/15 8 ¶3
“Kuyoya mu Kwoloka Kuli Munu na Munu”
3 Tandeni Loma 12:17. Paulu walumbunwine ngwendi nga batulinga mwamubi, kutwapandele kubelwisila bubi. Maneneni baje bakala hamo na baje kubakulahelele bakebo banapande kupangesa eci cinangulo. Nameme baje banalyambata na baka-kujeneka kukulahela kubapandele kwilwisila bubi mwafwa ya kubalinga mwamubi. Na bubwa buli mukwilwisila bubi bene bwahi. Kwilwisila bubi kwasa kubwezelela lika ku bukalu.
w07 7/1 24-25 ¶12-13
“Nga Umo Nakubihisila Keti Umwilwisile Bubi Bwendi”
12 Paulu watunangwile ngwendi: “Nga umo nakubihisila keti umwilwisile bubi bwendi,” ipwe muka-kukulahela nambe wa kujeneka kukulahela. Awa majwi analitombola na majwi endekele ha kulibanga ngwendi: “Zindeni byuma byoshe byabibi,” mwafwa munu kasa kumwesa ngwendi wazinda byabibi, nga ikeye akelwisila bubi kuli baje banamubihisila. Kulinga ngoco kunaliseze na kukala na cizemo ca busunga. Paulu ngwendi “Lingeni byabibwa ku mesho a banu boshe.” (Lom 12:9, 17) Bika bitulilongesa ku majwi a Paulu?
13 Ha kulibanga, Paulu mwasonekelele baka-Kolinte mukanda, wendekelemo bya mapakeso abaliwanene nawo tupositolo. Wendekele ngwendi, tupositolo bapwile “ngwe kalikengelo ka kaye koshe ka tungelo na banu. . . . Omwo batusinga, co yetu tubezikisa, omwo batuyandesa, co tukakateya, omwo batushaula co tukumbulula na majwi a ngozi.” (1 Ko 4:9-13) Na matangwa ano, banu mu kaye bakamono bitukalingi ha kupwa baka-Kilisitu ba busunga. Ngeci, banu batwatunga nabo nga bamona bilinga byetu byabibwa nameme bali na kutupakesa, basa kutambula muzimbu waubwa.—1 Pe 2:12.
(Loma 12:20, 21) Oloni, ngwe mubyendeka bisoneka ngwabyo, “Nga muka-ñole yobe ali na njala, mwane byakulya, nga ali na lihwila, mwane mema anwe, omwo ha kulinga eci uli na kumulingisa ngeci azibe shwamwa.” 21 Keti mutabe bubi bumihyane, oloni hyaneni bubi na bubwa.
w12 11/15 29 ¶13
Lisambeseni umo na Mukwabo
13 Simbu imo munasa kushaka kukwasa banu baje bamilingile mwamubi bazibuke busunga bwa mu Mbimbiliya. Kapositolo Paulu wendekele ngwendi: “‘Nga muka-ñole yobe ali na njala, mwane byakulya, nga ali na lihwila, mwane mema anwe, omwo ha kulinga eci uli na kumulingisa ngeci azibe shwamwa.’ Keti mutabe bubi bumihyane, oloni hyaneni bubi na bubwa.” (Lom 12:20, 21) Nga mukumbulula mwamubwa nameme banamilubalesa, co mwasa kukwasa banu ba bilinga byabibi kukala na bilinga byabibwa. Kuzibila ngozi baje banamibulumwina kwasa kubakwasa bakale na lishungu lya kulilongesa busunga bwa mu Mbimbiliya. Nga mukumbulula mwamubwa, co mukwasa banu basinganyekesese ha bilinga byeni byabibwa.—1 Pe 2:12; 3:16.
Kutondesesa Bisimpi bya Seho
(Loma 12:1) Ngeci bene, bakwetu, omwo mema ku mbunge a Njambi akama manene kuli yetu, njimilambelela ngwange, lilambuleni yeni babenya kuli Njambi ngwe ñombelo ya kuyoya, likundikeni ku bipangi byendi na kumubwahelelesa. Oku kukekwo kulemesa kwa busunga kuje munapande kulinga.
Mwakwangwila Mwamubwa Byuma bya Senga
5 Byoshe bimulinga mu kuyoya kweni binakundama ku kulemesa Yehova. Paulu wendekele majwi a nzili mu mukanda wasonekelele baka-Kilisitu ba ku Loma. Wabakanyamesele ngwendi: “[Lambuleni mibila yeni] babenya kuli Njambi ngwe ñombelo ya kuyoya, likundikeni ku bipangi byendi na kumubwahelelesa. Oku kukekwo kulemesa kwa busunga kuje munapande kulinga.” (Lom 12:1) Mibila yeni inambateselela mana na mbunge na nzili yeni yoshe. Pangeseni byoshe ebi mu kupangela Njambi. (Mak 12:30) Paulu wendekele ngwendi kupangela Njambi na mwonyo wetu woshe kunapu ngwe ñombelo. Awa majwi anapu a kutunangula. Mashiko a Mosesa amwesele ngwawo Njambi wabyanene kumwana cimuna uje wakele na kapenga. (Lev 22:18-20) Mu cifwa cimo lika, nga muka-Kilisitu apangela Njambi na kapenga, Njambi kasa kutambula bwana bwendi. Eci casa kulingiwa bati?
6 Paulu wanangwile baka-Kilisitu ba ku Loma ngwendi: “Bilyo byeni kesi mu byecele ku bubi.” Wabalekele lalo ngwendi: “Mutsiye bilinga byeni byabibi.” (Lom 6:12-14; 8:13) Ku mashangumukilo a mukanda wendi, watumbwile ebi ‘bilinga byabibi.’ Mbimbiliya yendeka hali baka-bubi ngwayo: “Endekesi yabo inashulu na bisingo. Bazambula kubulumuna na kutsiya. Kubalilongesele kukomoka Njambi.” (Lom 3:13-18) Nga muka-Kilisitu apangesa “bilyo” byendi bya mubila mu kulinga bubi, co ajwalesa mubila wendi. Cakumwenako, muka-Kilisitu nga atala bikupulo bya mushelengwa, nambe kutala mafilimu a lwozi, co ali na ‘kwecelela [mesho endi] ku bubi’ na kujwalesa mubila wendi woshe. Ngeci bipangi byoshe byapangela Njambi bipwa bya kujwala, co kasa kubizibila kubwaha. (Kwi 15:21;1 Pe 1:14-16; 2 Pe 3:11) Cipwa kubindama nga twangula byuma bya senga byabibi.
(Loma 13:1, NWT) Munu na munu alyake kwisi ya baka-kushika; mwafwa baka-kushika boshe Njambi ikeye nabatabesa; baka-kushika baje baliko, bali mu myela yabo ya kulisezaseza ije yanatabesa Njambi.
w08 6/15 31 ¶4
Bisimpi bya Kulitila bya mu Mukanda wa Loma
13:1—Njambi naka bati baka-kushika “mu myela yabo”? Baka-kushika baje baliko, “bali mu myela yabo ya kulisezaseza ije yanatabesa Njambi, mwafwa nabatabesa kuyula, co lalo simbu imo akamwena kulutwe baje bakayula. Mu Mbimbiliya muli bukaleho buje bumwesa ngwabo Njambi akazibukila cimweja baje bakayula.
Kutanda Mbimbiliya
(Loma 13:1-14) Munu woshe napande kwononoka kuli baka-kuswana, omwo naumo wahi ashika kubanga Njambi namwangula, co baka-kuswana baje baliko Njambi ikeye nabemika. 2 Ngeci bene, woshe uje alinga bimata na baka-kuswana alinga bimata na bije byanashiki Njambi, co woshe uje alinga ebi alinenela cihiso ikeye babenya. 3 Omwo baka-kulinga mwamubwa kubasa kuzibila lyoba baka-kuswana, oloni kubanga baje balinga mwamubi. Yobe kuzibila lyoba munu uje ali na kuswana ndi? Ngeci bene, linga mwamubwa, co ikeye akakushangazala, 4 omwo napu ngamba ya Njambi ngeci akulingile bubwa. Oloni nga ulinga mwamubi, co muzibile lyoba, omwo nzili yendi ya kukunyanyamesa inapu ya busunga. Ikeye napu ngamba ya Njambi, co ali na kunena kunyanyamesa kwa Njambi kuli baje balinga mwamubi. 5 Ngeci bene, ha cuma eci munapande kwononoka kuli baka-kuswana, keti ngwe omwo ha kunyanyamesa kwa Njambi lika embwe, oloni omwo lalo ha citakutaku. 6 Omwo eci cikeco lalo muli na kufwetela lisimu, omwo baka-kuswana bali na kupangela Njambi omwo bashulisa bipangi byabo. 7 Fweteni bije binapu byabo, bafweteni lisimu lyeni na lisimu lya ku bufuko bweni, co mweseni kasingimiko kuli boshe aba.8 Keti mukale na likongo kuli umo, likongo munapande kukala nalyo linapande kupwa lya kulizema lika umo na mukwabo. Woshe uje azema mukwabo nononoka Lishiko. 9 Mashiko ngwawo, “Keti ulinge bupangala, keti utsiye, keti wibe, keti ulibeyele cuma ca mukweni”, co byoshe ebi, na byeka lalo, banabipwisa lishiko limo lika ngwabo, “Zema mukweni ngwe muwalizema yobe babenya.” 10 Nga uzema mukweni, co kukasa kumulinga mwamubi embwe, ngeci bene, kuzema kukekwo kwononoka Lishiko lyoshe. 11 Yeni munapande kulinga ngacije, omwo mwazibuka ngweni simbu inete ngeci mwinduke mu tulo. Omwo simbu yakutwamena ili kuyehi kutubakana muje muyakele omwo twakulahelele ha kulibanga. 12 Butsiki ololo bukya, litangwa ololo lituhuka. Tulikeleni kulinga byuma bije byakundama ku lisusulungu, co twambateni bitwa bya kulwa nabyo mu mutanya. 13 Twendeni mwamubwa, ngwe banu baje bali na kuyoya mu ceke ca mutanya, keti kulinga kalwa ka ku biwano nambe kupenda, nambe kulinga bupangala nambe kukezima, nambe kulinga lwozi nambe lifuwa. 14 Oloni zaleni bitwa bya Mwene Yesu Kilisitu, keti mwanuke lalo cifwa ceni ca busitu na kukabangeya mashungu aco embwe.
MARCH 11-17
BISIMPI BYA SEHO BYA MU LIJWI LYA NJAMBI | LOMA 15-16
“Lombeni Yehova Amitakamese na Kumizembeleka”
(Loma 15:4) Byuma byoshe bije bibasonekele mu Bisoneka babisonekele mukutulongesa, ngeci tukale na [lilabelelo] lya kutunda ku lukakateya na kukutakamesa kuje kutunda mu Bisoneka.
“Lileni na Baje Bali na Kulila”
11 Ñanda ya kutsa kwa Lazalu na busiwa bwalizibile Yesu ha simbu oyo, inapuko imo ya biñanda bije byakala mu Lijwi lya Njambi bije bikatuzembeleka. Oku kwalitombola na majwi akwendeka ngwawo ‘byuma byoshe bibasonekele mu Bisoneka babisonekele mu kutulongesa, ngeci tukale na lilabelelo lya kutunda ku lukakateya na ku kutakamesa kuje kutunda ku Bisoneka.’ (Lom 15:4) Nga muli mu busiwa, co ebi bisoneka binatako byasa kumizembeleka:
▪ “Shukulu Kalunga ali muyehi na baje banazeye mu bimbunge, ikeye amena baje banajeneka [lilabelelo].”—Mya 34:18, 19.
▪ ‘Omwo biyongola mu mbunge yange byatumine, oloni yobe [Yehova] wanjizembelekele na kunjizibisa kubwaha.’—Mya 94:19.
▪ ‘Mwene yetu Yesu Kilisitu babenya, na Njambi Tate yetu, uje watuzemene na mu kutetela kwendi watwanene kutakama kuje kukwesi kutenguluka na [lilabelo] lya kukola, amitakamese na kumikolesa.’ —2 Te 2:16, 17.
(Loma 15:5) Co Njambi, nsina ya lukakateya na kutakamesa, amyasese kukala mu biyongola bimo hakati keni ha kukaba na kutembunwina Kilisitu Yesu,
“Lukakateya Lweni Lumyetese na Kushongo”
5 Lombeni nzili kuli Yehova. Yehova Njambi wapwa “nsina ya lukakateya.” (Lom 15:5) Ikeye lika azibuka bukalu bwetu, nomwo mutukalizibila, nokwo kutwatunda. Ngeci azibuka byuma byasa kutukanyamesa. Mbimbiliya ngwayo: “Ikeye akutisa bizango byabaje bamukomoka, aziba mitambi yabo, co abaamena.” (Mya 145:19) Oloni Njambi atukumbulula bati omwo tumulomba nzili?
(Loma 15:13) Co Njambi, nsina ya [lilabelelo], amishulise na kubwahelela kwoshe na kwoloka omwo ha kukulahela kweni, ngeci [lilabelelo] lyeni likole mu nzili ya Munzinzime wa Kujela.
w14 6/15 14 ¶11
“Zema Shukulu Kalunga Njambi Yobe”
11 Njambi ikeye ‘nsina ya [lilabelelo] lije litushulisa na kubwahelela kwoshe na kwoloka.’ (Lom 15:13) Eli lilabelelo lyanatwana Njambi likatukwasa tukanyamene byeseko. Bakubwabesa baje batwalelelaho kupwa ‘ba kulongwa noho kutsa kwabo, bakabana cilongo ca mwonyo mwilu.’ (Kuj 2:10) Banu baje bali na lilabelelo lya kukayoya hano hasi, baje batwalelaho kupwa ba kulongwa, bakayoya myaka yoshe mu Palandaisi. (Luk 23:43) Tuliziba bati ha bibezikiso byanatukulahesa Njambi? Bibezikiso bya Njambi uje ali na “cashu coshe cacibwa na bwana boshe bwabubwa bitulingisa tupwe ba kubwahelela na kukala mu kwoloka.—Yak 1:17.
Kutondesesa Bisimpi bya Seho
(Loma 15:27) Bakebo babenya bayongwele kulinga ngeci, oloni ha ñanda eyi, bakebo bali na likongo ngeci babakwase. Omwo Bayunda baneneko bibezikiso byabo bya munzinzime kuli baje keti Bayunda, co baje keti Bayunda banapande kupangesa bibezikiso byabo bya bufuko mu kukwasa Bayunda.
w89 12/1 24 ¶3
“Kumwesa Cizemo ca Busunga”
Bandolome babo baje kubapwile Bayunda bakwasele baje bapwile Bayunda. Balizibile kukala na likongo ku Bayunda ba mu Yelusalema, mwafwa bakebo babalongesele busunga. Paulu wendekele ngwendi: “Omwo Bayunda bananeneko bibezikiso byabo bya munzinzime kuli baje keti Bayunda, co baje keti Bayunda banapande kupangesa bibezikiso byabo bya bufuko mukukwasa Bayunda.”—Lom 15:27.
(Loma 16:25) Bumpau bukale kuli Njambi. Ikeye asa kumilingisa ngeci mwimane mbe mu kukulahela kweni, ngwe ku Biñanda Byabibwa binjikambulula bya Mwene Yesu Kilisitu, ngwe lalo ku kujomboloka kwa busunga bwa kushweka buje bubashwekele tunde ku sañulu.
it-1 858 ¶5
Kuzibukila Cimweja bya Kulutwe, Kwangwila Cimweja
Mesiya nambe ngwetu Kilisitu ikeye mbuto ibakulahesele, co banu boshe ba kulongwa ba hano hasi bakawana bibezikiso kwitila muli ikeye. (Nga 3:8, 14) Njambi wakulahesele bya ije “mbuto” munima ya kumutengulukila mu lihya lya Endeni, simbu kanda Abele asemuke. (Kus 3:15) Njambi wakujombolwele obu “busunga bwa kushwekesa” munima ya myaka 4,000, kumwesa ngwabo Yesu ikeye ije mbuto ibakulahesele. Ngeci, obu busunga ‘babushwekesele tunde ku sañulu.’—Lom 16:25-27; Efe 1:8-10; 3:4-11.
Kutanda Mbimbiliya
(Loma 15:1-16) Yetu tunakolo mu kukulahela tunapande kukwasa baje kanda bakole mu kukulahela kwabo ngeci bambate bitele byabo. Kutwapandele kulibwahelelesa yetu babenya embwe. 2 Oloni tubaboshe tunapande kubwahelelesa bakwetu mu kubalingila byabibwa, ngeci bakole mu kukulahela. 3 Omwo Kilisitu kalibwahelelesele ikeye babenya embwe. Oloni ngwe mubyendeka bisoneka ngwabyo, “Kushaula kuje kubamishawile kunaija hali yange.” 4 Byuma byoshe bije bibasonekele mu Bisoneka babisonekele mu kutulongesa, ngeci tukale na [lilabelelo] lya kutunda ku lukakateya na kukutakamesa kuje kutunda mu Bisoneka. 5 Co Njambi, nsina ya lukakateya na kutakamesa, amyasese kukala mu biyongola bimo hakati keni ha kukaba na kutembunwina Kilisitu Yesu, 6 ngeci yeni boshe mukashangazale Njambi ikeye Ishe ya Mwene yetu Yesu Kilisitu na lijwi limo.7 Ngeci bene, litambuleni umo na mukwabo, ngwe mwanamitambula Kilisitu, ngeci mwane bumpau kuli Njambi. 8 Omwo njimileka ngwange Kilisitu bamupwisile muka-kupangela Bayunda, mu kusholola ngeci Njambi wapwa muka-busunga, mu kulingisa bikulaheso byendi kuli bakukulwila babo ngeci bipwe bya busunga, 9 co ngeci, nameme baje keti Bayunda bashangale Njambi omwo mema ku mbunge endi. Ngwe mubyendeka bisoneka ngwabyo, “Ngeci bene, njikakushangazala hakati ka baje keti Bayunda, njikaimba na kukushangazala.”10 Co lalo bisoneka byendeka ngwabyo, “Yeni boshe keti Bayunda, joleleni hamo na banu ba Njambi.” 11 Co bisoneka byendeka ngwabyo, “Shangazaleni Shukulu Kalunga yeni boshe keti Bayunda, mushangazaleni yeni boshe banu.” 12 Co lalo Isaya endeka ngwendi, “Mutekulwila wa Njesi akasholoka, akaija mu kuswana baje keti Bayunda, co bakaaka [lilabelo] lyabo muli ikeye.” 13 Co Njambi, nsina ya [lilabelelo], amishulise na kubwahelela kwoshe na kwoloka omwo ha kukulahela kweni, ngeci [lilabelelo] lyeni likole mu nzili ya Munzinzime wa Kujela. 14 Bakwetu, njamono ngwange mwa busunga yeni munashulu na bubwa, munazibisisa manene, co mwasa kulilongesa umo na mukwabo. 15 Oloni mu mukanda ou njinasimpi ha kusoneka byuma bimo binjamyanukisa. Njinasimpi omwo ha kutetela kuje kwananjana Njambi 16 ha kupwa ngamba ya Kilisitu Yesu ha kupangela baje keti Bayunda. Njili na kupanga ngwe muka-kukombelela mu kwambulula Biñanda Byabibwa bya Njambi, ngeci ñombelo ya baje keti Bayunda, Njambi aitambule, ije Munzinzime wa Kujela na kundika kuli ikeye.
MARCH 18-24
BISIMPI BYA SEHO BYA MU LIJWI LYA NJAMBI | 1 KOLINTE 1-3
Mu Banu ba Kuhya ku Sipilitu Indi Embwe?
(1 Kolinte 2:14) Woshe uje kesi na Munzinzime kasa kutambula mabwana aje atunda kuli Munzinzime wa Njambi. Munu wangacije kasa kuwazibisisa, anapu angoco kuli ikeye, omwo seho yawo banaiseteka na munzinzime.
Munu wa Kuhya ku Sipilitu Wafwa Bati?
4 Tucisimutwiyeni ha cifwa ca munu uje kesi na sipilitu ya Njambi. Futisi ya banu babangi mu kaye inabihya. Paulu walumbunwine byuma bili na kulingisa ngoco ngwendi, ‘munzinzime ou ololo uli na kutwamenena banu baje kubesi na kwononoka Njambi.’ (Efe 2:2) Ou munzinzime uli na kushongangeya banu babangi batembwinine lika bije bibalinga mbunga. Kubashaka byuma bya ku sipilitu. Ngeci, banu babangi bakalingi byuma bije bibamona ngwabo bikebyo byabibwa, co shabo kukabangeya mashiko a Njambi. Munu uje kesi na sipilitu ya Njambi washaka lika kutsimana na kufuka manene na kwimanena bije byamona ikeye babenya ngwendi bikebyo binamupande.
5 Byuma muka bikwabo byasa kutukwasa kuzibuka munu uje kesi na sipilitu ya Njambi? Banu baje baka-kulinga “bije bicilinga cisemwa ca bunu,” kubakele na sipilitu ya Njambi. (Nga 5:19-21) Mu mukanda wa kulibanga wasonekelele cikungulukilo ca baka-Kolinte, Paulu wendekele ha bifwa bikwabo lalo bije bibakamwesa banu baje kubesi na sipilitu ya Njambi. Ebi bifwa binapu, kulyangununa, kutwala bakwetu ku binkuta, kujeneka kukandelela ku byuma bibanatulingila bakwetu, kulya manene na kunwa manene. Munu uje kesi na sipilitu ya Njambi kasa kulikolesa nga aliwana na ceseko. (Vit 7:21, 22) Yunda wendekele ha banu ba kujeneka sipilitu ya Njambi ngwendi “bakakabangeya mashungu abo amabi.”—Yun 18, 19.
(1 Kolinte 2:15, 16) Woshe uje ali na Munzinzime asa kuseteka seho ya byuma byoshe, oloni naumo wahi asa kumuhisa. 16 Ngwe mubyendeka bisoneka ngwabyo, “Iyajo azibuka biyongola bya Shukulu Kalunga? Iyajo asa kumunangula?” Yetu nameme ngoco, tuli na biyongola bya Kilisitu.
Munu wa Kuhya ku Sipilitu Wafwa Bati?
6 Munu uje ‘ali na sipilitu’ ya Njambi wafwa bati? Munu wa kuhya ku sipilitu wazema manene Njambi, oloni munu uje kesi na sipilitu ya Njambi kashakele byuma bya bunjambi. Banu baje bazema byuma bya ku sipilitu bakalifwiti ‘kutembwinina Njambi.’ (Efe 5:1) Oku kulumbununa ngwabo bakalifwiti kumona byuma mwakabimwenamo Njambi. Bakulahela manene Njambi. Co bakakabangeya mashiko a Yehova mu byuma byoshe bibalinga. (Mya 119:33; 143:10) Munu wa kuhya ku sipilitu kesi kukabangeya bije bicikalingi cisemwa ca bunu, oloni akalifwiti kumwesa ‘bushuka bwa ku sipilitu.’ (Nga 5:22, 23) Tucisimutwiyeni ha mwanja umo mangana tuzibisise mwamubwa mwafwila munu uje ‘ali na sipilitu’ ya Njambi. Munu uje wazema manene mingoso bakamutumbula ngwabo muka-mingoso. Co na munu uje wazema manene bya bunjambi bakamutumbula ngwabo munu wa kuhya ku sipilitu.
Munu wa Kuhya ku Sipilitu Wafwa Bati?
15 Twasa kutembwinina bati Kilisitu ha kapandi? Ku mukanda wa 1 Kolinte 2:16, Mbimbiliya itushongangeya kukala na “biyongola bya Kilisitu.” Co lalo ku Loma 15:5, batushongangeya kukala na “biyongola bimo . . . na kutembwinina Kilisitu Yesu.” Nga tushaka kupwa ngwe Kilisitu, tunapande kuzibuka bisinganyeka byendi na bunu bwendi. Co lalo tunapande kukabangeya myanja yendi. Yesu wazemene manene Njambi. Ngeci, nga tukala na biyongola bya Yesu, co tukala na biyongola bya Yehova. Mukemwo kunapu kwa seho manene kulilongesa kukala na biyongola bya Yesu.
Kutondesesa Bisimpi bya Seho
(1 Kolinte 1:20) Ngeci bene, muka-mana ali kuli? Nambe baka-kulilongesa? Nambe muka-bimata wa mutongwe wa hano ha kaye? Njambi namwesa ngeci mana a hano ha kaye anapu a bulema.
it-2 1193 ¶1
Mana
Banu babyanene Kilisitu muna Njambi, ha kumumona bulema. Nameme baka-kuswana babo bakele na mana, oloni ‘bashukikile Mwene wa bumpau.’ (1 Ko 1:18; 2:7, 8) Oloni Njambi wamwene ngwendi mana a baka-kaye anapu bulema, co wabazibisile shwamwa ha kupangesa bije bibamwene ngwabo “bulema bwa Njambi,” na munu uje ibamwene ‘bulema na kuzeya,’ mangana ashulisilile bikulaheso Byendi. (1 Ko 1:19-28) Paulu wanangwile baka-Kilisitu ba ku Kolinte ngwendi “mana aje anakundama muno mu kaye, nambe ku baka-kushwana ba kaye kano” akahwa, mwafwa kuwatundile kuli Njambi. (1 Ko 2:6, 13) Wanangwile baka-Kilisitu ba ku Kolose ngwendi keti babakwise na ‘mana a bunu a makuli, aje atunda ku bilongesa bya banu.”—Kol 2:8; Esekeseni vesi 20-23.
(1 Kolinte 2:3-5) Ngeci bene, omwo njezile kuli yeni, njazeyele na kujaja na lyoba, 4 co kulongesa kwange na muzimbu wange kubyakele na majwi a butongwe a mana a banu, oloni na cizibukiso ca nzili ya Munzinzime wa Njambi. 5 Ngeci bene, kukulahela kweni kesi kukundame ku mana a banu oloni ha nzili ya Njambi.
w08 7/15 27 ¶6
Bisimpi bya Kulitila bya mu Mukanda wa Kolinte
2:3-5. Paulu mwakele na kwambulwila mu Kolinte muje mwalisalele bisemwa bya ba Ngiliki, hamo walishoshomwenene ngwendi kasa kukwasa banu bazibuke busunga. Oloni katabesele lyoba limwonowese kwambulula. Netu kutwapandele kutabesa cuma coshe coshe kutwonwowesa kwambulula muzimbu waubwa wa Bumwene bwa Njambi. Yehova asa kutukwasa kupwa ba kusimpa nga tumulomba ngwe mwalingilile Paulu.
Kutanda Mbimbiliya
(1 Kolinte 1:1-17) Mukanda wa kutunda kuli Paulu, uje ibasanene ku cizango ca Njambi kupwa muluwa wa Kilisitu Yesu, na ndolome yetu Sosetenese. 2 Ku cikungulukilo ca Njambi cije cili mu Kolinte, kuli baje boshe babanasana ngeci bapwe banu ba Njambi ba kujela, baje banakundama kuli ikeye hamo na Kilisitu Yesu, hamo lika na banu boshe kwoshe ikwoshe baje bakalemesa Mwene yetu Yesu Kilisitu, Mwene yabo na Mwene yetu. 3 Njambi Tate yetu na Mwene Yesu Kilisitu bamyane kutetela na kwoloka. 4 Simbu yoshe njikakandelela kuli Njambi omwo yeni, omwo kutetela kuje kwanamyana Njambi hali Kilisitu Yesu. 5 Omwo muli Kilisitu banamipwisa baka-kufuka mu byuma byoshe, kubwezelelako na endekesi yoshe na mana oshe. 6 Lijwi lya Kilisitu banalikolesa na kulitakamesa muli yeni 7 ngeci bene, kumwonwene kutambula cibezikiso cimo, omwo muli na kubandamena kusholoka kwa Mwene yetu Yesu Kilisitu. 8 Ikeye lalo akamikolesa mbe na kushongo, ngeci kesi bakamiwane na mulonga ha Litangwa lya Mwene yetu Yesu Kilisitu. 9 Njambi banapande kumukulahela, Njambi uje wamisanene ngeci mukale mu kulitombola hamo na Munendi Yesu Kilisitu Mwene yetu. 10 Njimilambelela babusamba bange, na moko ya Mwene yetu Yesu Kilisitu ngwange, lizibasaneni mu byoshe bimwendeka, ngeci keti kukakale kulyangunuka hakati keni. Oloni litomboleni mwamubwa, na biyongola bimo na cizango cimo. 11 Omwo banu bamo ba ku naanga ya Koloe bananjileka ngwabo hakati keni babusamba bange hali bimata. 12 Njili na kulumbununa ngwange, hakati keni munu na munu ali na kwendeka byuma bya kulyangunuka. Umo endeka ngwendi, “Yange nji muka-Paulu”, mukwabo ngwendi, “Yange nji muka-Apolo”, weka ngwendi, “Yange nji muka-Petulu”, co weka ngwendi, “Yange nji muka-Kilisitu.” 13 Kuma Kilisitu banamwangununa ndi mu mitambela. Kuma Paulu ikeye wamitsililile ha [citi ca kuyandesela] ndi? Kuma bamimbwitikile mu lizina lya Paulu ndi? 14 Njikandelela Njambi omwo kunjambwitikile umo wa hali yeni kubanga lika Kilisipase na Ngayase. 15 Ngeci bene, naumo wai endeka ngwendi bamimbwitikile kupwa bandongisi bange. 16 (Eyo, kuma njambwitikile lalo Setefanase na naanga yendi, oloni kunjasa kwanuka nga njambwitikile weka lalo.) 17 Omwo Kilisitu kanjitumine mu kumbwitika. Oloni wanjitumine mu kwambulula Biñanda Byabibwa, na kubyambulula kujeneka kupangesa endekesi ya mana a banu, kutewa [citi ca kuyandesela] ca Kilisitu cipwa cangoco.
MARCH 25-31
BISIMPI BYA SEHO BYA MU LIJWI LYA NJAMBI | 1 KOLINTE 4-6
“Musima Waundondo Wasa Kufutunwisa Mukasha Woshe Wamutunu”
(1 Kolinte 5:1, 2) Ololo kunatsimana ngeci hakati keni hali bupangala bwa kukomokesa buje nambe baka-kujeneka kukulahela kubasa kubulinga. Omwo bananjileka ngwabo munalume umo ali na kulinga bubi na munakazi wa ishe. 2 Ngeci bene, bikajo muli na kulyalesela? Kuma kumwapandele kubilila ndi? Co munu uje nalingi cuma eci mwapande kumutundisa mu cikungulukilo.
(1 Kolinte 5:5-8) Kundikeni ou munalume kuli Satana ngeci mubila wendi ukanyonge, oloni munzinzime wendi ukoboke ha Litangwa lya Mwene Yesu. 6 Kumwapandele kulyalesa embwe. Mwazibuka mubakendeka ngwabo, “Musima waundondo wasa kufutunwisa mukasha woshe wamutunu.” 7 Tundiseni musima walaja wa bubi ngeci mupwe bakujela. Asinoni mupwe mukasha wauha wa kujeneka musima, mwa busunga njizibuka ngeci omu mukemwo mumunafu. Omwo Ciwano cetu ca [Paseka] cinabwaha laja, ololo Kilisitu, muna manga wetu wa [Paseka], banamukombelela laja. 8 Ngeci bene, tulisambeni ciwano cetu, kesi na likende lili na musima wa laja wa bubi na kupenga-penga embwe, oloni na likende lije kulyesi na musima, likende lya kujela na busunga.
(1 Kolinte 5:13) Oloni munapande kusompa baje bali mu cikungulukilo. Ngwe mubyendeka bisoneka ngwabyo, “Tundiseni muka-bubi uje ali hakati keni.”
it-2 230
Musima
Kapositolo Paulu wapangesele cakumwenako ca musima mwashikile baka-Kilisitu ba ku Kolinte ngwendi batundise muka-bubi mu cikungulukilo. Wendekele ngwendi: “Musima waundondo wasa kufutunwisa mukasha woshe wamutunu. Tundiseni musima wa laja wa bubi ngeci mupwe ba kujela. Asinoni mupwe mukasha wauha wa kujeneka musima, mwa busunga njizibuka ngeci omu mukemwo mumunafu. Omwo Ciwano cetu ca [Paseka] cinabwaha laja, ololo Kilisitu, muna manga wetu wa [Paseka], banamukombelela laja.” Co walumbunwine biwemanenene “musima” mwasonekele ngwendi: “Ngeci bene, tulisambeni ciwano cetu, kesi na likende lili na musima wa laja wa bubi na kupenga-penga embwe, oloni na likende lije kulyesi na musima, likende lya kujela na busunga.” (1 Ko 5:6-8) Paulu mwendekele awa majwi, wesekesele ku Ciwano ca Bayunda ca Makende a Kujeneka Musima cije cakabele ciwano ca Paseka. Ngwe mwa musima waundondo muwasa kufutununa mbolo, na cikungulukilo casa kupwa ca kujwala ku mesho a Yehova nga kubatundisilemo munu uje nalingi bubi. Banapande kutundisamo “musima” mu cikungulukilo, ngwe mubalingilile Baisalele. Batundisile misima mu binjubo byabo ha simbu ya cilika.
it-2 869-870
Satana
‘Kukundika munu kuli Satana ngeci mubila wendi ukanyonge’ kulumbununa bika?
Kapositolo Paulu washikile ba mu cikungulukilo ca ku kolinte ngwendi batundise munu uje nalingi bubi bwa kulilala na ina. Wendekele ngwendi: “Kundikeni ou munalume kuli Satana ngeci mubila wendi ukanyonge.” (1 Ko 5:5) Eli lishiko lyalumbunwine kutundisa munu mu cikungulukilo na kujeneka kulikwatasana nendi. (1 Ko 5:13) Munu ibanatundisa mu cikungulukilo nakundama ku kaye, co banamukundika kuli Satana uje wapwa njambi na muka-kuyula kano kaye. Uje munalume napu ngwe mwa “musima waundondo” uje uli mu “mukasha” nambe ngwetu bilinga bya busitu bije bili mu cikungulukilo. Ngeci kumutundisa mu cikungulukilo kunapu ngwe kunyongesa bilinga byendi bya busitu bili mu cikungulukilo. (1 Ko 5:6, 7) Mu ngila imo lika, Paulu wakundikile Haimenease na Alekizanda kuli Satana, mwafwa basezele busunga, co likulahelo lyabo lyahwile.—1 Ti 1:20.
(1 Kolinte 5:9-11) Mu mukanda uje njamisonekelele njamilekele ngwange kesi mulikumbasane na baka-bupangala. 10 Oloni, kunjendekele baka-kujeneka kukulahela baje baka-bupangala, baka-cipululu bakebo lalo bezi, nambe baka-kulemesa tumponya. Ha kulitepa nabo munapande kutunda hano ha kaye. 11 Njatumbwile ngwange kesi mulikumbasane na munu uje alitumbula ngwendi napu muka-kukulahela, oloni napu muka-bupangala, nambe muka-cipululu, nambe muka-kulemesa tumponya, nambe muka-kushaula, nambe muka-kupenda, nambe muka-kwiba. Keti mutumbame na kulya na munu wangacije.
lvs 241, biñanda bya kushongo
Kutundisa Munu mu Cikungulukilo
Nga munu uje nalingi bubi bwakama shendi kutenguluka na kukabangeya mashiko a Yehova, kapandele kulikwatasana na cikungulukilo. Banapande kumutundisa mu cikungulukilo. Nga munu banamutundisa mu cikungulukilo, kutwapandele kulikwatasana nendi, co lalo kutwapandele kumwendekesa. (1 Ko 5:11; 2 Yo 9-11) Kutundisa munu mu cikungulukilo kunyungilila lizina lya Yehova na cikungulukilo. (1 Ko 5:6) Co lalo inapu ngila ya kumunyanyamesa mangana atenguluke na kwiluka kuli Yehova.—Luk 15:17.
▸ Capita 3, palangilafu 19
Kutondesesa Bisimpi bya Seho
(1 Kolinte 4:9) Omwo njamono ngeci Njambi nana mwela wa kumanesela kuli yetu miluwa, ngwe banu baje babanasompela kutsa ku mesho a boshe, ngwe kalikengelo ka kaye koshe ka tungelo na banu.
Tungelo Bapwa Banu ba ku Sipilitu ‘Baje Bakapangela Njambi’
16 Baka-Kilisitu baje bali mu byeseko bapwa ‘kalikengelo ka tungelo.’ (1 Ko 4:9) Tungelo bakabwahelela manene mubakamono bilinga byetu byabibwa na muka-bubi nga natenguluka. (Luk 15:10) Co lalo tungelo bakananguka bilinga byabibwa bya bandokazi. Mbimbiliya ngwayo, “omwo ya tungelo, munakazi napande kufwika ku mutwe wendi.” (1 Ko 11:3, 10) Tungelo bakabwahelela nga bamona bandokazi na bangamba boshe ba Njambi bononoka mashiko a Njambi. Kwononoka kwetu kukanukisa tungelo ngwabo nabo banapande kutwalelelaho kwononoka Njambi.
(1 Kolinte 6:3) Kumuzibuka ngweni tukasompa tungelo ndi? Kuma kutwasa kuhyana mu kusompa byuma bya mwonyo ou ndi?
it-2 211
Mashiko
Mashiko abanana Tungelo. Nameme tungelo bakala na nzili kutubakana banu, oloni bali mwisi ya mashiko a Njambi. (Hev 1:7, 14; Mya 104:4) Yehova ali na nzili ya kubindika citozi cendi Satana. (Yom 1:12; 2:6) Mingeli, kangelo wakama nendi azibuka na kusingimika nzili yakala nayo Yehova ha kupwa lyako Wakama. Mwalikananganene na Liyabolo wendekele ngwendi: ‘Mwene akutenukile.’ (Yun 9; esekeseni na Zak 3:2) Yehova ikeye wanene Yesu Kilisitu nzili ya kupwa ntwama ya tungelo boshe. (Hev 1:6; 1 Pe 3:22; Mat 13:41; 25:31; Fil 2:9-11) Mukemwo Yesu watumine kangelo kuli Yowano. (Kuj 1:1) Oloni ku 1 Kolinte 6:3, kapositolo Paulu wendekele ngwendi bandolome ba Yesu ba ku sipilitu bakasompa tungelo. Bakalinga ngoco mwafwa nabo bakasompa Satana na bandemone bendi.
Kutanda Mbimbiliya
(1 Kolinte 6:1-14) Nga hakati keni hali umo ali na ñanda na mukwabo muka-Yesu, batijo aya kuli baka-kusompa baje baka-kujeneka kukulahela kujeneka kuya ku banu ba Njambi ngeci bakenge ije ñanda? 2 Kuma kumwazibukile ngweni banu ba Njambi bakasompa baka-kaye ndi? Co nga mukasompa baka-kaye, kuma kumwasa kusompa biñanda byabindondo ndi? 3 Kumuzibuka ngweni tukasompa tungelo ndi? Kuma kutwasa kuhyana mukusompa byuma bya mwonyo ou ndi? 4 Nga muli na biñanda bimo, kuma mubitwala bakabisungamese kuli banu baje kubesi na mwela mu cikungulukilo ndi? 5 Shwamwa imikole. Mwa busunga hali umo hakati keni uje ali na mana asa kusungamesa ñanda eyi hakati ka baka-Yesu. 6 Oloni hakati keni umo muka-Yesu aya ku mbanja na kusompesa mukwabo, co ecela baka-kujeneka kukulahela basompe ije ñanda. 7 Ngeci bene, omwo yeni muli na biñanda hakati keni cimwesa ngeci munonwa. Bika kumutabela bamilinge mwamubi? Bika kumutabela ngeci bamibile? 8 Oloni muli na kulibiisila yeni babenya umo na mukwabo, nakulibila umo na mukwabo, nameme musamba wobe bene. 9 Mwa busunga mwazibuka ngeci baka-bubi kubakaswana Bumwene bwa Njambi. Kesi mulikwise yeni babenya, baka-bukwizi nambe baka-kulemesa tumponya nambe baka-bupangala nambe baka-bundei 10 nambe baka-kwiba nambe baka-cipululu nambe baka-kupenda nambe baka-kushaula nambe bezi, kubakaswana Bumwene bwa Njambi. 11 Bamo beni mwafwile ngacije. Oloni banamijelesa ku bubi, banamikundika kuli Njambi, banamipwisa baka-busunga ku mesho a Njambi hali Mwene Yesu Kilistu na hali Munzinzime wa Njambi yetu. 12 Umo endeka ngwendi, “Bananjitabesa kulinga byuma byoshe.” Eyo, oloni kesi byuma byoshe binapu byabibwa kuli yobe embwe. Njasa kwendeka ngwange bananjitabesa kulinga byuma byoshe, oloni kunjitaba ngeci cuma cimo cinjipwise ndungo embwe. 13 Weka endeka ngwendi, “Byakulya byapwa bya lifu, co lifu lyapwa lya byakulya.” Eyo, oloni Njambi akanyongesa byoshe bibali. Mubila wa munu kubapandele kupangesa ku bupangala, oloni wapwa wa kupangela Mwene, co Mwene ana bije bishakiwa ku mubila. 14 Njambi wasangwile Mwene ku batsi, co ikeye lalo akatusangula na nzili yendi.