Kampeni ya Kulitila ya Kushangumuka Bilongesa bya Mbimbiliya mu September

Mu September, tukapanga na nzili mu kushangumuka bilongesa bya Mbimbiliya ku banu babangi kupangesa broshuwa ya Likuweni Kuyoya Myaka Yoshe! Baka-kwambulula basa kukalisonekesako bupainiya bwa kukwasa bwa maola 30. Tukapanga bati omu mu kampeni ya kulitila?

• Ha Bungenzi bwa Kulibanga: Pangeseni biñanda bili ha liputa lya mamaneselelo lyei broshuwa, na kumwesa babenya njibo mutukalilongesela Mbimbiliya nga namwesa kubwahelela. Anukeni kwendela banu bamwesele kubwahelela kunima hamolika na baje bamwendekele nabo lwakulibanga. Nameme babyanene kulilongesa Mbimbiliya, hamo babwaheleloni ngila yaiha ituli na kupangesa ku kulilongesa na banu Mbimbiliya hamolika na kupangesa broshuwa. Kumwapandele kuseza mabroshuwa ha binjibo kuhesi banu nambe kuwatumina banu kubamwesele kubwahelela. Komiti ya Bipangi bya Cikungulukilo yasa kubwaesako biwano bikwabo bya kuya mu lihya mukati ka ngonde.

• Bingila Bikwabo Byakwambulwilamo: Nga cikungulukilo ceni cikapangesa tutambo twa kusindumuna, co akeniho broshuwa ya Likuweni Kuyoya Myaka Yoshe! Lekeni baje bamwesa kubwahelela ngweni ei broshuwa tukaipangesa mu kulilongesa na banu Mbimbiliya. Co bamweseni mutukalilongesela Mbimbiliya oho bene nambe kulizibasana nabo mangana mukabamwese simbu yeka. Kanyungi wa lihya asa kwangulako baka-kwambulula bakuhya mangana baye nakwambulwila ku bitingitingi bya mingoso na kukashangumuka bilongesa bya Mbimbiliya. Co lalo mwasa kushangumuka kulilongesa Mbimbiliya na banu bamukapanga nabo nambe ku banu bamulitulukwa nabo.

Yesu watushikile ngwendi ‘tupwise banu bandongesi’ na ‘kubalongesa.’ (Mat 28:19, 20) Tushaka ngwetu ei kampeni ya kulitila itukwase kushulisilila eli lishiko lya Yesu kupangesa broshuwa ya Likuweni Kuyoya Myaka Yoshe!