Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2023 Watch Tower Bible and Tract Society of Pennsylvania
JANUARY 1-7
BISIMPI BYA SEHO BYA MU LIJWI LYA NJAMBI | YOMBI 32-33
Zembelekeni Baje Bali na Kulifwita na Bishoti
it-1 710
Elihu
Elihu kakele na kangu, co kashangalele munu. Wazibukile ngwendi nendi watunda ku likungu ngeci lika mwa Yombi, co Ishamatanga yabo wapwa umolika uje wapwa Muka-nzili yoshe. Elihu kashakele kuzibisa Yombi lyoba. Ngeci, wasimutwiyiye nendi mwamubwa ha kupwa kabusamba kendi. Watumbwile na Yombi ha lizina nameme Elifaze, Mbilendande na Zofale kubalingile ngoco.—Yom 32:21, 22; 33:1, 6.
w14 6/15 25 ¶8-10
Kuma Mukamono Buzeye bwa Bakweni Ngwe Mwakabumwena Yehova ndi?
8 Twasa kuzibila bakwetu ngozi nga twanuka ngwetu bandolome na bandokazi betu bamo banazeye mwafwa ya bukalu bubali na kuliwana nabwo bwakufwa ngwe kubinja, kuyoya mu naanga ije kuyalemesele Yehova nambe kulifwita na bishoti. Simbu imo netu tunasa kuliwana na bukalu bwakulifwa. Simbu kanda bakobele mu Lifuti lya Cikulaheso, Baisalele bamo bapwile tuhutu, co bazeyele mubakele mu lifuti lya Ijipiti. Ngeci Njambi wabalekele ngwendi ‘keti bakabyane kukwasa’ bakwabo baje bali mu bukalu. Yehova washakele ngwendi bamone tuhutu kupwa ba seho na kubakwasa.—Kwi 15:7, 11; Lev 25:35-38.
9 Kutwapandele kusompa bakwetu baje bali na kuliwana na bukalu, oloni tunapande kubazembeleka na kubakwasa ku sipilitu. (Yom 33:6, 7; Mat 7:1) Cakumwenako, nga muka-kwendesa honda nabulumuka mwafwa ya monde ya ha tapalo co bamutwala kucipatela, kuma bandotolo bakatondesesa tahi bamone indi ikeye nanene bukalu ndi? Embwe, bandotolo bakalingi bwasi-bwasi mangana basake uje munu nabulumuka. Mu ngila imolika, nga mukwetu muka-Kristu nazeye ku sipilitu mwafwa ya byuma byali na kuliwana nabyo, co tunapande kumukwasa ku sipilitu mangana akanyame.—1 Tesolonika 5:14.
10 Nga tuwana simbu ya kusinganyekesesa ha byuma bibali na kuliwana nabyo bandolome na bandokazi betu, co tumona buzeye bwabo mu ngila inapande. Acisinganyekeni ha bandokazi baje banatwalelelaho kukolesa nameme bali na kubalwisa kuli baka-naanga yabo. Bamo banasa kusholoka kuzeya na kumoneka ngwe kubasa kukolesa mu bukalu. Oloni kuma kukolesa kwabo kukumwesa ngwabo bali na likulahelo lya kukanyama ndi? Mumukamono ndokazi aija na bana bendi ku biwano simbu yoshe, kuma likulahelo na kulongwa kwendi kubyesi kumizibisa kubwaha ndi? Batico mumukamono babaha batwalelelaho kupwa ba kulongwa nameme bali na kuliwana na byeseko ku sikola? Aba banu banasa kusholoka ngwe ba kuzeya “oloni banafuku mu likulahelo” ngwe mwabamo betu baje kubesi na kuliwana manene na bukalu.—Jms 2:5.
Simbu Muka Yaibwa Itunapande Kwendeka?
17 Munalume wa mu ciwana uje wezile kuli Yombi wapwile Elihu, kabushoko ka Abilahama. Watolililile Yombi na baje banalume batatu mubakele na kwendeka. Cili bene watolililile mwamubwa, mwafwa wanangwile Yombi mu ngila yaibwa ije yamwesele ngozi, co wamukwasele atengulule bisinganyeka byendi. (Yombi 33:1, 6, 17) Cuma ca seho kuli Elihu capwile kwana kasingimiko kuli Yehova keti kulyana kasingimiko ikeye babenya nambe kwana munu weka. (Yombi 32:21, 22; 37:23, 24) Byalingile Elihu byatulongesa ngwabyo kuli simbu ya kwoloka oku tutolililila. (Yako 1:19) Twalilongesa lalo ngwetu nga tunangula bakwetu, cuma ca seho cinapu kwana kasingimiko kuli Yehova keti kuli yetu embwe.
18 Tumwesa kukandelela ku bwana bwa kwendeka nga tupangesa binangulo bya mu Mbimbiliya bije bitukwasa tuzibuke simbu ya kwendeka nomu mwakwendekela. Mwene Solomoni wasonekele ngwendi: “Lijwi lyalibwa libendeka ha simbu yaibwa, linapu ngwe maepo a ngolinde abanaka mu lilonga lya siliba.” (Visi 25:11, NWT) Nga tutolilila mwamubwa omwo bakwetu bendeka na kusinganyeka simbu kanda twendeke, co majwi etu apwa amabwa, ngwe aje maepo a ngolinde. Nga tulinga ngoco, co bitwendeka bitunga bakwetu na kuzibisa Yehova kubwaha. (Visi 23:15; Efeso 4:29) Eyi inapu ngila yaibwa yakumweselamo kukandelela ku bwana bwa kwendeka bwanatwana Njambi.
Kutondesesa Bisimpi bya Seho
Twaleleleniho Kushwena kuli Yehova
10 Mu ngila imolika, kukwabihile kulishoshomwena ha sholokesi yetu. Oloni oku kukulumbununa ngwabo tunapande kutengulula sholokesi yetu mangana tumoneke kupwa ngwe tubabaha. Bimweso bya bukulukazi, bikamwesa ngwabyo munu nakolo, nalisingimika na kumwesa bubwa bwa mukati. Cakumwenako, Mbimbiliya yendeka ngwayo: “Bwele bunapu cilongo ca bumpau, cije banazala banu baje banakala na kuyoya mu busunga.” (Vis 16:31) Mukemwo mwakatumwena Yehova. Ngeci netu tunapande kulimona ngwe mwakatumwena Yehova. (1 Pita 3:3, 4) Kuma kunapu kwa seho kushakazeka bukwasi ku cipatela nambe kutonda mambanda aje atulingisa tumoneke ngwe tubabaha ndi? ‘Kubwahelela kwa kutunda kuli Yehova’ kukekwo kukanene bubwa bwa mukati nambe munu na kulubala indi ali na kubinja. (Neh 8:10) Kubanga mu kaye kakaha lika mukemwo mutukalikangula na kupwa na mibila yaiha. (Yom 33:25; Isa 33:24) Ha simbu ino, tunapande kukala na mana na likulahelo lije litukwasa tushwene kuyehi na Yehova na kupangesa mwamubwa simbu yetu nameme twakulubala.—1 Ti 4:8.
JANUARY 8-14
BISIMPI BYA SEHO BYA MU LIJWI LYA NJAMBI | YOMBI 34-35
Nga Byuma Kubyesi na Kutwendela Mwamubwa mu Kuyoya
Bifwa Muka Byakala Nabyo Njambi?
Njambi akalingi byabibwa simbu yoshe. Mbimbiliya ngwayo: “Njambi kesi kulinga bubi nambe kamandondo, co Muka-nzili yoshe kesi kulinga bubi embwe.” (Yombi 34:10) Akasompo mu busunga, mukemwo muka-kwimba myaso wendekele kuli Yehova ngwendi: “Yobe ukasompo banu mu busunga.” (Myaso 67:4) Wai asa kukwisa Yehova, mwafwa ikeye ‘akamono mu mbunge’ ya munu, co akamono busunga bwa ñanda na kusompa mu ngila yaibwa. (1 Samwele 16:7) Kutundaho lalo, Njambi akamono bilinga byoshe bya kangu bili na kulingiwa hano hasi, co nakulaesa ngwendi akanyongesa “baka-bubi mu lifuti.”—Visimo 2:22.
Bika Bibakanyongesa Omwo Bumwene bwa Njambi Bukaija?
5 Yehova akalinga bika? Ha simbu ino, Yehova atonda ngwendi baka-bubi batenguluke. (Isa 55:7) Kanda acibasompe. Byuma byabibi bili muno mu kaye bikebyo bibakanyongesa. Bika bikalingiwa kuli banu baje babyana kutenguluka, baje bacitwalelela kulinga byuma byabibi ndo na ku simbu ya ñababa yakama? Yehova nakulahesa kwakutundisa kaye ka banu bababi. (Myaso 37:10.) Banu bababi banasa kuliziba ngwe kubakanyongo. Banu babangi banalilongesa mwakushwekela milonga yabo, co muno mu kaye bakasholoka ngwe banatewe kubana kashitiko nambe kukobela mu bukalu. (Yom 21:7, 9) Oloni Mbimbiliya itunangula ngwayo: “Mesho endi [Njambi] ali na kukenga mu bingila bya banu. Kukwesi lisusulungu lya kuzibala bwii lyasa kushweka muka-bubi ku mesho a Njambi.” (Yom 34:21, 22) Nacimo cuma cahi casa kulishweka ku mesho a Yehova Njambi. Baka-manseno kubasa kumukwisa; nambe kukale lisusulungu lya kuzibala manene bwii, hanga bene Njambi acasa kumona bibalinga banu. Hanima ya Alamagidoni tukanuka kubakele banu bababi, oloni kubakakalako. Boshe bakanyonga njwa.—Mya 37:12-15.
Kuma Mutabesa Byuma Bimo Bimyonowese Kukabangeya Yesu Ndi?
19 Obu bukalu kubucili na matangwa ano indi? Eyo. Banu babangi ano matangwa batuzinda mwafwa kutwesi kulikobelesa mu bupolitiki. Bakatondo ngwabo netu tubote. Oloni yetu tuzibuka ngwetu nga twangula munu ngwetu atuyule, co tunabyana Ciyulo ca Yehova. (1 Sam 8:4-7) Co lalo, banu bakasinganyeka ngwabo tunapande kutunga masikola na bipatela na kulingako bipangi bimo bije bikwasa banu ba mu citingitingi mutwakala. Kubatushakele mwafwa tunaka lika mbunge ku kwambulula muzimbu waubwa keti ku kumanesa bukalu bubali na kuliwana nabwo banu muno mu kaye.
20 Tunapande kulinga bika mangana tutwaleleleho kukala na likulahelo? (Mateo 7:21-23.) Tunapande kwaka mbunge ku cipangi catushikile Yesu ngwendi tulinge. (Mat 28:19, 20) Kutwapandele kulikobelesa mu bupolitiki nambe kuzezama mu kulinga bipangi bya kushaka tumanese bukalu bubali na kuliwana nabwo banu muno mu kaye. Twazema banu, co kutwesi kuliziba mwamubwa mubakaliwana na bukalu. Oloni tuzibuka ngwetu ngila yaibwa yakukwaselamo bakwetu inapu kubalongesa bya Bumwene bwa Njambi na kubakwasa balikute busamba na Yehova.
Kutondesesa Bisimpi bya Seho
Sipilitu Yeni ya Kulyana Ishangazale Yehova
3 Yehova katenukilile Elihu omwo wehwile Yombi ngwendi: “Nga u muka-busunga bika ukamwana [Njambi]? Cuma na cimo cahi cashaka Njambi kuli yobe.” (Yom 35:7) Kuma Elihu wamwesele ngwendi bipangi byetu kuli Njambi byapwa byangoco ndi? Embwe. Walumbunwine ngwendi nambe tulikela kulemesa Yehova, yetu tuyandelamo. Wapwa muka-nzili yoshe. Kutwasa kumufukisa nambe kumukanyamesa. Oloni bubwa bwoshe bu tuli nabwo na cashu na nzili, byoshe byatunda kuli Njambi, co akamono mutukabipangeselamo.
JANUARY 15-21
BISIMPI BYA SEHO BYA MU LIJWI LYA NJAMBI | YOMBI 36-37
Mwafwa Bika Twasa Kukulahela Ngwetu Njambi Akatwana Mwonyo wa Myaka Yoshe?
Kuma Twasa Kuzibuka Mwamubwa Njambi Ndi?
NJAMBI WAKALAKO KU MYAKA YOSHE: Mbimbiliya ngwayo, wapwa Njambi wa “ku myaka yoshe.” (Myaso 90:2) Mu ngila ikwabo, twasa kwendeka ngwetu Njambi kakele na mashangumukilo, co kakela na mamaneselelo. Ha kupwa banu kutwasa “kulaba bwingi bwa myaka yendi.”—Yombi 36:26.
Mukutukwasela: Njambi na kulahesa kwana mwonyo wa myaka yoshe kuli boshe baje balilongesa byendi na kweta ha kumuzibuka. (Iwano 17:3) Ngwe Njambi ka kakalako ku myaka yoshe ngwe eci cikulaheso ca ngoco. Kubanga “Mwene wa myaka yoshe” ikeye asa kushulisilila eci cikulaheso.—1 Timothi 1:17.
Kuma Tukakandelela ku Byuma Byanatwana Njambi Ndi?
6 Tuli na mema hano ha lifuti-libu, mwafwa kulyesi kulako manene nambe kuyehi manene na litangwa. Ngwe lifuti-libu lyashwenene lika kamandondo kuyehi na litangwa, ngwe mema oshe anomu cau, co ngwe nacimo cahi ciyoyaho. Co lalo, ngwe lifuti-libu lyashondolokele lika kamandondo ku litangwa, ngwe mema oshe anakondo na kupwisa lifuti-libu ngwe limunga. Yehova wakele lifuti-libu ha mutambela unapande mukemwo tuli na mema, co awa mema ali na kukwasa byuma bya kuyoya. Litanya likatwila ha mema a hano ha lifuti-libu, co mema akakakumukila mwilu na kupwa mashelwa. Ha mwaka na mwaka, mema akakakumukila mwilu akapu amangi manene kutubakana mema a mu mashali oshe a hano hasi. Awa mema akanyoko munima ya matangwa 10 kutunda hawakakumukila mwilu. Co akelukila lalo mu tulunga-ndonga na mu bindonga na mu mashali. Ebi bimwesa ngwabyo Yehova ali na mana na nzili.—Yombi 36:27, 28; Kwambu 1:7.
Twaleleleniho Kukanyamesa Lilabelelo Lyeni
16 Njambi natwana lilabelelo lya seho manene lya kukayoya myaka yoshe. Twabandamena kukayoya mwamubwa kulutwe, co twakulahela ngwetu Njambi akashulisilila byanakulahesa. Lilabelelo lyetu lyapwa ngwe cimikiso ca bwato mwafwa likatukwasa tukolese omwo tuliwana na byeseko nomwo batuyandesa, co lalo likatukwasa tujeneke kutewa kutsa. Lyapwa ngwe tepa ya cikubo mwafwa likanyungilila bisinganyeka byetu mangana tulinge byuma byabibwa na kujeneka kulinga byuma byabibi. Eli lilabelelo libanendeka mu Mbimbiliya likatukwasa tulikute busamba na Njambi na kuzibuka mwatuzemena. Kutwalelelaho kukanyamesa lilabelelo lyetu kutukwasa manene.
Kutondesesa Bisimpi bya Seho
it-1 492
Mizimbu
Mu bisimbu bya mu Mbimbiliya banu bakele na kutambula mizimbu mu bingila bya kuliseza-seza. Banu bakele na kutambula manene mizimbu ya mu lifuti lyabo nambe ya mu lifuti lyeka kwitila mu kusimutwiya. (2 Sam 3:17, 19; Yom 37:20) Kwakele baka-kwenda baje bakele na kwenda manene ha byendo. Aba baka-kwenda mubakele na kweta ha myela imo bakele na kuhwima mangana balyeko byakulya nambe kunwa mema nambe kulingako byuma byeka. Bakele na kwetesa mizimbu ya byuma binalingiwa mu kaye ku mitambela ya kuliseza-seza. Lifuti lya Palestine lyakele ha mutambela wa kulitila kuyehi na Asia, Africa na Europe. Co kwakele na kuwaniwa banu babangi baka-kwenda ha byendo bakutunda ku mafuti akulako. Ngeci banu ba mu Palestine kwabapwililile kwakwasi kutambula mizimbu ya byuma byakama binakele na kulingiwa mu mafuti akwabo. Kakangi ei mizimbu bakele na kuizibila ku myela ya kulandesela mu bimbongi.
JANUARY 22-28
BISIMPI BYA SEHO BYA MU LIJWI LYA NJAMBI | YOMBI 38-39
Kuma Mukawanako Simbu ya Kukenga bya Kutanga Ndi?
Kuma Mutwalelelaho Kubandamena Kuli Yehova Ndi?
7 Mbimbiliya inamwesa ngwayo Yehova “wayongwele seteko ya kaye,” wemikile “bimanda bije byakwata kaye” na kujala “limanya lya mu mbango ya kaye.” (Yomi 38:5, 6) Co lalo, wawaneneko simbu ya kusinganyekesesa ha byuma byanatanga. (Kus 1:10, 12) Tungelo balizibile bati omwo bamwene Yehova atanga kaye kamandondo-kamandondo? Babwahelelele manene. Ngeci, “batambekele na kujolela.” (Yombi 38:7) Bika bitulilongesako? Yehova watangele byuma ha myaka yaingi, oloni omwo wabilwile, wamwene ngwendi, “binabwaha manene.”—Kus 1:31.
Kusanguka Kumwesa Mana na Cizemo ca Njambi na Mbunge ya Kubandamena
2 Yehova wabangele kutanga Munendi Yesu. Co wapangesele ou Munendi wa ntwatwa mu ‘kutanga byuma byoshe,’ kwambatesela na tungelo babangi. (Kol 1:16) Yesu wabwahelelele kupangela hamo na Ishe. (Vis 8:30) Tungelo nabo babwahelelele. Bakele na kumona Yehova na Yesu uje wapwa Ngangula mu Kupanga oku bali na kutanga melu na kaye. Tungelo balingile bika? “Batambekele na kujolela” omwo Njambi wamanesele kutanga kaye. Babwahelelele lalo Yehova mwatangele byuma bikwabo kwambateselela na banu. (Yom 38:7; Vis 8:31) Cuma na cuma canatanga Yehova cimwesa ngwaco wakala na cizemo na mana.—Mya 104:24; Lom 1:20.
Lilongeseni Byabingi Hali Yehova ku Byuma bya Kutanga
8 Twasa kukulahela Yehova. Yehova wakwasele Yombi mangana amukulahele manene. (Yom 32:2; 40:6-8) Njambi mwakele na kusimutwiya na Yombi wendekele ha byuma byabingi byanatanga kwambateselela na bingongonosi, mashelwa na mihyato. Yehova wendekele lalo ha tusitu ba kufwa ngwe mpakasha na kabalu. (Yom 38:32-35; 39:9, 19, 20) Ebi byuma byoshe bimwesa ngwabyo Njambi wakala manene na nzili, co lalo wakala na cizemo na mana. Kusimutwiya na Yehova kwakwasele Yombi amukulahele manene. (Yom 42:1-6) Mu ngila imolika, kusinganyekesesa ha byuma bya kutanga kutukwasa twanuke ngwetu Yehova wakala manene na nzili kutubakana yetu. Co akamanesa bukalu bwetu bwoshe mwafwa ali na nzili ya kulinga ngoco. Kuzibuka obu busunga kutukwasa tumukulahele manene.
Kutondesesa Bisimpi bya Seho
it-2 222
Muka-kwana Mashiko
Yehova Wapwa Muka-Kwana Mashiko. Yehova ikeye lika Njambi wa busunga muka-kwana mashiko mwilu na hano hasi. Ikeye akana Mashiko aje endesa byuma byakutanga bya mwilu nebi bya hano hasi. (Yom 38:4-38; Mya 104: 5-19), na byuma byoshe bya kuyoya. (Yom 39: 1-30) Munu bamutangele kuli Yehova, ngeci ali mwisi ya mashiko a Yehova aje endesa byuma bya mwilu na hasi. Co lalo ha kuwana ngwe munu wakala na mana na cashu ca kwangununa byabibwa ku byabibi, co lalo ali na lishungu lya kushaka kuzibuka Ishamatanga yendi, kunapande kuli ikeye kukala mwisi ya Mashiko a Njambi. (Lom 12:1; 1 Kor 2: 14-16) Kutundaho, mashiko a Njambi akatwamenena lalo tungelo.—Mya 103:20; 2 Pit 2:4, 11.
Kutwasa kwonowesa mashiko a Njambi aje endesa byuma bya mwilu na hasi. (Nje 33:20, 21) Byuma bya mwilu na hasi bije bitwasa kumona bimwesa ngwabo twasa kukulahela awa mashiko akabitwamenena, co baka-sayansi baje banalilongesa muwakapangela awa mashiko, bakaapangesa mu kumona mubyendela bingongonosi, ma pulaneti, ngonde hamolika na byuma bikwabo bya mwilu. Munu uje apokola mashiko aje endesa byuma bya mwilu na hasi aliwana na bukalu oho bene. Mu ngila imolika, mashiko a Njambi nawo kuwesi kutenguluka, co lalo woshe uje aajomboka aliwana na bukalu. Kutwasa kujomboka mashiko aje endesa byuma bya mwilu na hasi. Mu ngila imolika, mashiko a Njambi nawo nga tuajomboka, co tuliwana na bukalu nameme kusholoka ngwe kwita simbu. “Keti bamyungumune kucitaba kukwisa Njambi mwafwa byoshe byakuna munu bikebyo bya teja.”—Gal 6:7; 1 Tim 5:24.
JANUARY 29–FEBRUARY 4
BISIMPI BYA SEHO BYA MU LIJWI LYA NJAMBI | YOMBI 40-42
Bitulilongesa ku Byuma Byaliwanene Nabyo Yombi
“Iya Nazibuka Bisinganyeka Bya Yehova?”
4 Omwo tusinganyekesesa ha byuma byanalingi Njambi, kutwapandele kumusompa kwesekesa nomu mutumwenamo byuma. Bikebyo biwendeka mukanda wa Myaso 50:21, kuje kwanendeka Yehova ngwendi: “Yobe wayongwele ngeci yange njafwa ngwe yobe.” Myaka 175 kunima, muka-kulilongesa bya Mbimbiliya umo wendekele kutalesa kuli ei ñanda ngwendi: “Banu bashaka kusompa Njambi kwesekesa nomu mubakamwenamo byuma, co bakasinganyeka ngwabo Njambi akalingi byuma ngwe mubakabilingila bakebo.”
5 Tunapande kunyanyama mangana keti tusinganyeke ngwetu Yehova akamono na kulinga byuma ngwe mutushakela yetu. Mwafwa bika kutwapandele kusinganyeka ngoco? Mwafwa omwo tulilongesa Bisoneka tunasa kumona byuma bimo byakalingi Yehova ngwe keti byabibwa mwafwa kutwalumbunukile. Bikebyo bibashangumukile kulinga Baisalele ba kunima, co kulinga ngoco kwabalingisile bamone byuma byakele na kulinga Yehova ngwe keti bikebyo bwino. Nangukeni byabalekele Yehova ngwendi: “Mwendeka ngweni bije byali na kulinga Shukulu Kalunga keti bikebyo embwe. Tolilileni kuli yange eni Baisalele. Kuma muli na kuliyongola ngweni ngila ije njili na kulingilamo byuma keti ya busunga ndi? Ngila yeni ikeyo keti ya busunga.”—Ezeki 18:25.
6 Nga tushaka ngwetu keti tusompe Yehova kwesekesa nomu mutumwenamo byuma, co tunapande kwanuka ngwetu biyongola byetu kubyapwile bya kulumbunuka, ngeci simbu imo tukamono byuma mu ngila ya kuhenga. Bikebyo byapandele kuzibuka Yombi. Washotele manene mbunge ha simbu yaliwanene na tuyando, ngeci washangumukile kwaka lika mbunge ku bukalu bwakele na kuliwana nabwo, co kakele mbunge ku byuma bya seho manene. Oloni Yehova wamukwasele amone byuma mu ngila inapande. Yehova wehwile Yombi bihula bya kutubakana 70 bije kasele kukumbulula, ngeci Yehova wamukwasele ananguke ngwendi kuzibisisa kwendi kwapwile kwakundondo. Yombi walikehesele na kutengulula biyongola byendi.—Yombi 42:1-6.
Akeni Mbunge ku Ñanda ya Seho
12 Kuma Yehova wakalukile ha kunangula Yombi munima ya kutakamena tuyando ndi? Embwe, nambe Yombi kasinganyekele ngoco. Nameme Yombi wakele mu bukalu, oloni washangumukile kwendeka byabibwa. Wendekele ngwendi: “Njinazibi shwamwa ya bije byoshe njinendeka, co njitumama mu libu na mu lito kumwesa ngeci njinatenguluka.” Yehova wanangwile Yombi mu ngila yaibwa, co Yombi watengulukile. (Yombi 42:1-6) Elihu ikeye walibangele kunangula Yombi. (Yombi 32:5-10) Omwo Yombi wononokele, na kutengulula bisinganyeka byendi, Yehova wamwesele ngozi na kuli babusamba ba Yombi omwo wakanyamenene byeseko mu kulongwa.—Yombi 42:7, 8.
‘Kulahela Yehova’
17 Kuli bangamba ba Yehova babangi baje batwaleleleho kupwa ba kusimpa na kukolesa omwo baliwanene na byeseko ngwe mwalingililile Yombi. Kapositolo Paulu wendekeleko bamo mu mukanda wasonekelele Bahebelu. Wabatumbwile ngwendi “mbunga ya bakaleho.” (Hebe 12:1) Nameme baliwanene na byeseko byakama, oloni boshe batwaleleho kupwa ba kulongwa kuli Yehova. (Hebe 11:36-40) Kuma kukolesa na kulifwita kwabo kwapwile kwa ngoco ndi? Embwe. Nameme bikulaheso bya Njambi kubyalishulisilile ha simbu ibakele na kuyoya, oloni batwaleleleho kukulahela Yehova. Bakulahelele ngwabo bakalimwena bikulaheso bya Yehova mubikalishulisilila mwafwa bazibukile ngwabo bali na kulinga byuma byabibwa. (Hebe 11:4, 5) Byuma bibalingile byasa kutukwasa tutwaleleho kukulahela Yehova.
18 Ano matangwa byuma bili na kubihya manene mu kaye. (2 Tima 3:13) Satana acili na kutwalelelaho kweseka banu ba Njambi. Nameme tukaliwane na bukalu bwakama kulutwe, tutwaleleleniho kupangela Yehova na kumwesa ngwetu ‘tunaka likulahelo lyetu muli Njambi wa kuyoya.’ (1 Tima 4:10) Byuma byalingile Njambi kuli Yombi bimwesa ngwabyo “Mwene [Yehova wapwa] muka-kutetela na mema ku mbunge.” (Yako 5:11) Ngeci, netu tutwaleleleniho kupwa ba kulongwa kuli Yehova na kukulahela ngwetu akabezikisa “baje bali na kumushakezeka.”—Bahebelu 11:6.
Kutondesesa Bisimpi bya Seho
it-2 808
Kushaula
Yombi watwaleleleho kupwa wa kulongwa nameme bakele na kumushaula. Oloni mu kwita kwa simbu, washangumukile kumona byuma mu ngila ya kuhenga, co bamunangwile. Elihu wamulekele ngwendi, ‘Yombi, munalume iyajo nalifu nendi? Uje akanu kushendumuna ngwe mema.’ (Yombi 34:7) Yombi washangumukile kulimanena na kumona ngwe wapwile muka-busunga kutubakana Njambi. (Yombi 35:2; 36:24) Baje babusamba bendi batatu mubamushawile, Yombi wamwene ngwe bashawile ikeye kutubakana kushaula Yehova. Byuma byalingile Yombi ha simbu ei byamulingisile apwe ngwe munu uje washaka manene kushaula na kucimona ngwe mema akunwa aje ali na kulikuwa. Kutundaho, Njambi walekele Yombi (mwasimutwiyiye nendi kumamaneselelo) ngwendi, baje babusamba bendi kubakele na kushaula ikeye, bakele na kushaula Yehova. (Yombi 42:7) Mu ngila imolika, Baisalele mubakele na kutonda Mwene, Yehova walekele Samwele ngwendi: “Keti yobe ibanabyana, oloni banabyana yange kupwa Mwene yabo.” (1 Sa 8:7) Yesu walekele tupositolo bendi ngwendi: “Banu bakamiyandesa na kumitsiya, co mafuti oshe akamizinda mwafwa ya lizina lyange.” (Mat 24:9) Kwanuka ebi byuma kukwasa muka-Kristu atwaleleleho kumona kushaula mu ngila inapande na kukolesa, co kulinga ngoco kumukwasa akawane cikandelela mwafwa ya kukolesa kwendi.—Luk 6:22, 23.
FEBRUARY 5-11
BISIMPI BYA SEHO BYA MU LIJWI LYA NJAMBI | MYASO 1-4
Imaneneni Bumwene Bwa Njambi
‘Njikaninganga Miyati Yoshe ya Banu’
8 Banu bakalingi bati mutukabambulwila ou muzimbu? Babangi bakaubyana. (Myaso 2:1-3.) Baka-mafuti banalubala. Banabyana Mwene yanangula Yehova. Kubesi kumona muzimbu utukambulula kupwa muzimbu waubwa. Co bifulumende bimo binashoko cipangi cetu ca kwambulula. Nameme baka-kuyula babangi bakalishasha ngwabo bali na kupangela Njambi, oloni kubesi kushaka kutunda ha bitwamo byabo. Ngeci, baka-kuyula ano matangwa bali na kulwisa Mwene yanangula Yehova omwo bali na kuyandesa bandongesi bendi ngwe mubalingile baka-kuyula ba mu simbu ya tupositolo.—Bili 4:25-28.
Kujeneka Kulikobelesa mu Biñanda bya Kaye ka Kulyangununa
11 Bufuko. Nga tumona bimbongo na byuma bituli nabyo kupwa bya seho manene kuli yetu, co kutupwila kwakukalu kulyangununa ku kaye. Munima ya 1970, Bakaleho ba mu Malawi babanyekele byuma byoshe bibakele nabyo mwafwa babyanene kulikwatasana na cibunga ca baka-bupolitiki. Calubinda, bamo babyanene kuseza binjibo byabibwa. Ndokazi wa lizina lya Ruth anuka ngwendi, “Bamo batwaile nabo mu bundungo, belukile kwimbo na kukalikwatasana na baka-bupolitiki mwafwa bashakele kuyoya mwamubwa, keti kukayandela mu cilombo ca bafunge.” Oloni banu ba Njambi babangi kubafwile ngoco. Bakalyangununa ku kaye, nameme kulinga ngoco kunasa kubonowesa kukala na bimbongo byabingi, na kuzimbalesa bikwata byabo byoshe.—Hebe 10:34
Kutondesesa Bisimpi bya Seho
it-1 425
Lijungu
Bishwashwa bije bikakala helu ya bimbuto bya kufwa ngwe mbale na tiliku. Nameme Mbimbiliya kuyendekele ha lijungu mpundu, biyendeka bilumbununa byuma byakele na kulingiwa ha lijungwilo mu simbu ya kunima. Munima ya kuteja, ebi bishwashwa bya helu bya mbale na tiliku bakele na kubitundisako, co kubyapwile bya seho lalo. Ngeci, kwapandele kubyesekesa ku cuma cacehu ca kujeneka seho cije cibapandele kumbila.
Cakulibanga, kujungula kwekele na kwangununa lijungu ku bimbuto. Kutundaho, mubakele na kuleleka lijungu lyakele na kupekumuka na lihunzi ngwe likungu. Eci cimwesa mwamubwa Yehova mwakatundisila baka-Kristu ba makuli kuli baka-Kristu ba busunga nomu mwakanyongesela banu bababi na baka-kutengulukila. (Yombi 21:18; Myaso 1:4; 35:5; Isaya 17:13; 29:5; 41:15; Hozi 13:3) Njambi akapangesa Bumwene bwendi mu kutika bitozi bendi ngwe lijungu lije lyapwa lyalyasi kupekumuka na lihunzi.—Nda 2:35.
Kakangi, lijungu bakele na kulyenyeka kutewa lipekumukila lalo ha bimbuto na kubijwalesa. Mu ngila imolika, Iwano Muka-kumbwitika wendekele bya kunyonga kwa bulombelo bwa makuli kuje kuli na kwija. Muka kujungula Yesu Kristu akakungulula tiliku “oloni lijungu akalyenyeka ku tuhya tuje kutwasa kuzima.”—Mat 3:7-12; Luk 3:17; taleni KUJUNGULA.
FEBRUARY 12-18
BISIMPI BYA SEHO BYA MU LIJWI LYA NJAMBI | MYASO 5-7
Twaleleleniho Kupwa ba Kulongwa Nameme Bakweni Kubesi na Kulinga Mwamubwa
Bisoneka Bimikwasa Bati Mukolese Omwo Muliwana na Bukalu?
7 Kuma kuli byuma byanalingi kabusamba keni nambe kabushoko keni bije byamizibisa kubabala ku mbunge ndi? Nga kubili, co byuma byalingile Devidi omwo munendi Abisalome wamutengulukilile na kushaka kulipwisa mwene byasa kumikwasa.—2 Sa 15:5-14, 31; 18:6-14.
8 (1) Lombeleni. Lekeni Yehova mumuli na kulizibila ha byuma byabibi bibanamilingi. (Mya 6:6-9) Mulekeni mwoshe mumuli na kulizibila. Co mulombeni amikwase kunanguka bisimpi bije bimikwasa mukolese.
Kulaheleni Ngweni Munawana Busunga
3 Likulahelo lyetu kulyapandele kwimana lika ha cizemo cibali na kumwesa banu ba Njambi. Mwafwa bika? Mwafwa lyasa kuzeya bwasi. Cakumwenako, tunasa kwecela kupangela Yehova nga mukwetu muka-Kilistu alinga bubi bwakama. Hamo owo nalingi bubi bwakama napu mukulunu mu cikungulukilo nambe painiya. Tunasa lalo kwecela kupangela Yehova nga mukwetu muka-Kilistu atulubalesa nambe nga tuziba muka-kutengulukila endeka ngwendi twakulahela byuma bya makuli. Bika bitulilongesa? Tulilongesa ngwetu likulahelo lyetu linapande kwimana ha busamba bwetu na Yehova asina lipwa lya kukanyama. Kuzema Yehova na banu bendi kumikwasa mukale na likulahelo. Oloni kulilongesa Mbimbiliya na kutondesesa na kuzibisisa bimulilongesa, kumikwasa mukanyamese likulahelo lyeni. Munapande kukala na bukaleho buje bumwesa ngwabwo bimulilongesa hali Yehova binapu bya busunga.—Lom 12:2.
4 Yesu wendekele ngwendi banu bamo bakatambula busunga na “kubwahelela,” oloni nga baliwana na byeseko, co likulahelo lyabo lizeya. (Mateo 13:3-6, 20, 21.) Mwafwa bika? Hamo basinganyekele ngwabo baje bakabangeya Yesu kubaliwana na byeseko. (Mat 16:24) Indi hamo basinganyekele ngwabo nga bapwa baka-Kristu, co kubaliwana na tuyando mwafwa Yehova abanyungilila. Oloni tunapande kuzibuka ngwetu tuliwana na tuyando muno mu kaye ka Satana. Byuma byasa kutenguluka mu kuyoya kwetu, co byasa kutwonowesa kupwa ba kubwahelela.—Mya 6:6; Kwa 9:11.
Kutondesesa Bisimpi bya Seho
it-1 995
Cihilo
Ku mukanda wa Loma 3:13, kapositolo Paulu nendeka majwi ali ku Myaso 5:9, kwesekesa milibu ya baka-bubi na baka-makuli ku “bihilo bije binashama.” Ngeci lika mwa cihilo cije cikashulu na batsi na kubola na milibu ya baka-makuli na baka-bubi muishokoloka kutunda majwi amabi akubola.—Esekeseni Mat 15:18-20.
FEBRUARY 19-25
BISIMPI BYA SEHO BYA MU LIJWI LYA NJAMBI | MYASO 8-10
‘Njikakushangazala Yobe Yehova’!
Zibukeni Ngweni Mwapwa mu ba Seho mu Naanga ya Yehova
6 Yehova watubwaheselele limbo lya kulitila. Simbu kanda atange munu wakulibanga, Yehova wabwahesele mwamubwa kano kaye mangana banu bayoyeho. (Yom 38:4-6; Nje 10:12) Yehova watangele byuma byabibwa bije bili na kutulingisa tulikuwe kuyoya mwafwa wapwa muka-kwana, co wakala na ngozi. (Mya 104:14, 15, 24) Mu kwita kwa simbu, wasinganyekesesele ha byuma byoshe byatangele, co “wamwene ngeci binabwaha.” (Kusha 1:10, 12, 31) Wasingimikile banu omwo wabanene cipangi ca “kuswana” byuma byoshe byabibwa bili hano hasi byanatanga. (Mya 8:6) Njambi nayongola ngwendi banu ba kulumbunuka bakalikuwe cipangi ca kunyunga byuma byoshe bya kutanga myaka yoshe. Kuma mukakandelela kuli Yehova omwo natukulahesa kukatwana eci cipangi cacibwa ndi?
Kuma Tukakandelela ku Byuma Byanatwana Njambi Ndi?
10 Tumwesa ngwetu twakandelela kuli Yehova ha kutwana bwana bwa kwendeka nga twambulwila baje kubakulahelele ngwabo Njambi kwakala. (Mya 9:1; 1Pi 3:15) Baje kubakulahelele ngwabo Njambi kwakala bashaka ngwabo netu tukulahele ngwetu byuma byalizilile bikebyo bibenya. Nga tupangesa Mbimbiliya na byuma bitunasimutwiya muno mu cilongesa, co twimanena Tate yetu wa mwilu. Co lalo tukwasa baje bashaka kuzibuka busunga bakulahele ngwabo Yehova ikeye watangele lilu na hasi.—Mya 102:25; Isa 40:25, 26.
Kuma Mukakela Bakweni Mwanja Waubwa mu ‘Endekesi Yeni’ Ndi?
13 Imbeni kutundilila kwisi ya mbunge yeni. Cuma ca seho manene citukembila myaso ya Bumwene ku biwano cinapu kushangazala Yehova. Ndokazi Sara akalizibi ngwendi wakala na malungi. Oloni washaka kushangazala Yehova mu kumwimbila myaso. Ngeci, akalibwahesela mwamubwa myaso ngwe mwakalibwahesela biwano byoshe. Kutundaho, akalizilisa ei myaso na kumona muinalikwatasanena na byuma bibakasimutwiya ku biwano. Wendekele ngwendi: “Oku kunanjikwasa njake mbunge ku majwi ali mu mwaso, keti ku malungi ange.”
Kutondesesa Bisimpi bya Seho
it-1 832
Munye
Bisoneka bimwesa ngwe Njambi wakele na kupangesa munye (minye) ya cifwisa mu kulinga bipangi byendi byakufwa ngwe kusoneka Mashiko 10 ha limanya (Kut 31:18; Kwi 9:10) kulinga bikomokeso (Kut 8:18, 19) na kutanga melu (Mya 8:3). Minye ya Njambi yakele na kupangesa mu kutanga byuma inatalesa ku sipilitu ya kujela nambe nzili ngwe muumwesela mukanda wa Kushangumuka, uje unendeka mubatangelelemo byuma ngwawo, nzili ya Njambi nambe sipilitu, yakele na kwendangana kuya noku-noku helu ya mema. (Kus 1:2) Nameme ngoco, Bisoneka bya Cigriki bya baka-Kristu bitukwasa kuzibisisa mwamubwa minye ya cifwisa yapangesele Njambi. Muzimbu uli ku mukanda wa Mateu unalumbununa ngwawo, Yesu watundisile badimona kupangesa sipilitu ya Njambi. Luka nendi natuleke ngwendi walingile ngoco “kupangesa munye wa Njambi.”—Mat 12:28; Luk 11:20.
FEBRUARY 26–MARCH 3
BISIMPI BYA SEHO BYA MU LIJWI LYA NJAMBI | MYASO 11-15
Limoneni Ngwe Muli mu Kaye Kakaha
w06 5/15 18 ¶3
Bisimpi bya Kulitila bya mu Mukanda wa Myaso
11:3—Lubula muka lubananyongesa? Lubula lubalumbununa aha lunapu lubula haje habanaka mashiko baka-mafuti na kutwamenena na kwakula mu kusungama. Nga ebi byuma byahi, co kukala liwayanga na kujeneka kwakula mu kusungama. Mu bukalu bwacifweci “baje balinga mwamubwa” banapande kukulahela lika Njambi.—Myaso 11: 4-7.
wp16.4 11
Kuma Simbu Imo Tukakala kwa Kujeneka Bukenya Ndi?
Mbimbiliya imwesa ngwayo, Njambi ololo atundisako bukenya mu kaye koshe. Kano kaye kanashulu na bukenya kanabandamena “litangwa lya kusompa neli lya kunyongesa banu bakujeneka kuzibila Njambi lyoba.” (2 Pita 3:5-7) Kukukala bikenya baje bakayandesa lalo banu. Bika bitulingisa tukulahele ngwetu Njambi ashaka kutukwasa na kutundisako bukenya?
Mbimbiliya ngwayo Njambi ‘wazinda baje bazema lwozi.’ (Myaso 11:5) Ishamatanga wazema kwoloka na kwakula mu kusungama. (Myaso 33:5; 37:28) Mukemwo kakecelela baka-bubi batwaleleleho kukalako ku myaka yoshe.
Mwashaka Kukala na Mbunge ya Kubandamena Ndi?
15 Mwafwa bika Devidi walyanene kubandamena? Nakumbulula mu mukanda wa myaso muje wehwile Njambi lutanu ngwendi Shukulu Kalunga “Bisimbu bingai?” Wendekele ngwendi: “Oloni njinakulahela cizemo cobe cije kucesi kutenguluka, mbunge yange ikajolela omwo unanjobola. Njikakwimbila yobe Shukulu Kalunga, omwo unanjilingi mwamubwa.” (Mya 13:5, 6) Devidi wakulahelele cizemo ca Yehova cije kucesi kutenguluka. Wabandamenene ngwendi Njambi amwobola, co wakandelelele kuli Yehova omwo ya kumubezikisa. Devidi wamwene ngwendi kubandamena kuli Njambi kwapwa kwakubwa.
Bumwene Bushulisilila Cizango ca Njambi Hano ha Kaye.
16 Kutunyungilila. Mukwita kwa simbu, majwi amabwa ali ku mukanda wa Isaya 11:6-9 atuna banandamena ha simbu yailaha akalishulisilila mpundu. Banalume, banakazi, hamolika na banike bakaliziba ngwabo bali na kubanyungilila kwoshe-kwoshe kubakaya mu kaye. Kukwesi cikashama nambe munu akazibisa lyoba. Acisinganyekeni lika simbu imukaliziba kuzituka kukala mu kaye, muya na kutana mu bindonga, mu mashali, mu tulunga-ndonga, mulonda ha malundu na kwenda mu mwila kwa kujeneka kuziba lyoba. Nameme butsiki kumukazibi lyoba. Majwi ali ku mukanda wa Ezekiele 34:25 akalishulisilila, mangana banu ba Njambi “bakakale mwamubwa mu mahya na kulala mwamubwa mushwata.”
Kutondesesa Bisimpi bya Seho
Kuma Munatenguluka Ndi?
12 Calubinda, tuli na kuyoya na cifwa ca banu bendekele Kapositolo Paulu. Bakasinganyeka ngwabo kunapu kusalela kukabangeya binangulo na mashiko a mu Mbimbiliya. Balongesi na bisemi babangi bakatabesa na kukundwiya biyongola bya kulilingila munu na munu mwa shakela. Bakebo bakamono ngwabo byuma byoshe banapande kubyesekesa ku bikwabo. Nameme banu babangi baje bakalishasha ngwabo bakalemesa Njambi mu busunga bakalizibi ngwabo bali na lisesa lya kulinga byuma bibamona bakebo ngwabo binapande kwa kujeneka kukabangeya binangulo na mashiko a Njambi. (Mya 14:1) Baka-Kristu ba busunga bakobela mu bukalu nga bakala na biyongola byacifweci. Baka-kujeneka mana banasa kushangumuka kumona ngwe munga kuyesi kulinga byuma mu ngila inapande. Banasa kushangumuka kubyana kulikwatasana na cikungulukilo na kubyana biinangula munga bije kubilitombola na biyongola byabo. Ngeci, banasa kwombwanesa mashiko a mu Mbimbiliya aje atalesa ku byuma bya kulizima nabyo buli, kupangesa intaneti na kuya ku masikola a helu.