Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2025 Watch Tower Bible and Tract Society of Pennsylvania
JANUARY 5-11
BISIMPI BYA SEHO BYA MU LIJWI LYA NJAMBI ISAYA 17-20
“Mutamba wa Baje Bali na Kutwibila”
“Bumwene Bwange Kesi bwa Hano ha Kaye Embwe”
16 Kukala na futisi yaibwa kwapwa kwakubwa manene. Mbimbiliya inesekesa banu ku mankimba a mema a kalunga aje ali na kungwanjanga simbu yoshe. (Isaya 17:12; 57:20, 21; Kujo 13:1) Nameme biñanda bya bupolitiki bili na kutepa banu, oloni yetu tuli na kutwalelelaho kulikwatasana na kuyoya mu kwoloka. Co Yehova akalizibi manene kubwaha mwakamono banu balikwatasana nameme bali muno mu kaye ka kulitepa.—Tandeni Zefaniya 3:17.
Kujeneka Kulikobelesa mu Biñanda bya Kaye ka Kulyangununa
4 Tunasa kuyoya mu mutambela muje banu kubasa kutusindiya kulikobelesa mu bupolitiki. Oloni omwo tushwenya manene ku mamaneselelo a kaye ka Satana, citupwila cacikalu kulyangununa ku kaye. Banu matangwa ano banapu “baka-muuka” na “baka-bukenya,” co ololo balyangununa manene. (2Ti 3:3, 4) Bandolome betu bamo bali mu bukalu mwafwa ya biñanda bya bupolitiki bili na kutenguluka–tenguluka mu mafuti abo. Netu, mukemwo tunapande kulibwahesela kulyangununa ku kaye, nameme byuma bikaluwa. Tucisimutwiyeni ha byuma biwana bije bitwasa kulinga mangana tulibwahesele.
ip-1 198 ¶20
Yehova Anangula Baka-mafuti
20 Bika byatundilemo? Isaya ngwendi: “Mangwezi balijujukila. Simbu kanda kukye kubakalako lalo. Ou ukewo mutamba wa baje bali na kutwibila Na fweto ya baje bali na kutupukula.” (Isaya 17:14) Banu babangi bakapukula banu ba Yehova na kubayandesa, co lalo kubesi kubamwesa kasingimiko mwafwa kubesi kulikwatasana na bulombelo bwa makuli. Co baka-kulwisa baka-Kristu ba busunga bakasinganyeka ngwabo baka-kristu kubesi nou wa kubakwasa. Banu ba Njambi banakulahela ngwabo “litangwa” litukahwa tuyando twabo lili na kushwena muyehi manene.—2 Tesalonika 1:6-9; 1 Pita 5:6-11.
Kutondesesa Bisimpi bya Seho
w06 12/1 11 ¶1
Bisimpi bya Kulitila bya mu Mukanda wa Isaya—I
20:2-5—Kuma cili bene Isaya wakele na kwenda mutotototo ha myaka itatu ndi? Cisholoka Isaya washulwile lika cizalo cendi ca helu, co wakele na kwenda oku ‘nazala lika cizalo ca kuhwalala.’—1 Samwele 19:24, futunoti.
JANUARY 12-18
BISIMPI BYA SEHO BYA MU LIJWI LYA NJAMBI ISAYA 21-23
Bitulilongesa ku Byuma Byalingiwile Kuli Shebina
Njambi Akanyanyamesa Baje Bazema
7 Tucisimutwiyeni ha myanja ya banu babali baje banyanyamesele Yehova mangana tuzibisise mwamubwa seho ya kunyanyamesa. Wakulibanga wapwile Shebina uje wayoyele mu simbu ya Mwene Hezekiya. Wamucibali unapu mwanja wa ndolome Graham wa mu simbu yetu. Ha kupwa “mukulunu wa ku njubo ya mwene,” hamo Shebina bamwanene moko. Ou mwene hamo wapwile Hezekiya. (Isaya 22:15) Oloni washangumukile kulyalesa. Co lalo walicokwelele mbumbo, co wakele na kulonda mu ‘matemba a kulyalesa nawo.’—Isaya 22:16-18.
8 Omwo Shebina walyalesele, Njambi ‘wamunyekele bipangi byendi’ na kwingisaho Elyakime. (Isaya 22:19-21) Njambi wangwile Elyakime ha simbu ije Mwene Senakelibi washakele kulwisa Jelusalema. Simbu imo ou mwene watumine baka-kunangula bendi ku Jelusalema kukajujwisa Bajuda na Hezekiya mangana balite. (2Bi 18:17-25) Elyakime mwaile na kutambula baka-kunangula ba mwene, kaile likalyendi. Waile na banu babali. Umo hali aba banu, wapwile Shebina uje wapwile muka-kusoneka ha simbu ije. Eci cimwesa ngwabo Shebina hamo kalubalele, co walikehesele na kutambula cipangi cibamwanene nameme capwile manene ca kwisi. Bika bitulilongesa kuli Shebina? Tucisimutwiyeni ha byuma bitatu bitulilongesa kuli ikeye.
9 Cakulibanga Shebina bamunyekele cipangi cendi. Eci cimwesa ngwabo “kulyalesa manene kutwala munu ku kunyonga.” (Pro 16:18) Nga banamyana bipangi bimo bya kulitila mu cikungulukilo, mukeseka mumwasela mwoshe kutwalelelaho kupwa ba kulikehesa ndi? Mukakandelela kuli Yehova ha byuma bimuli nabyo na ha bipangi bimunafwitangana ndi? (1Kr 4:7) Kapositolo Paulu wasonekele ngwendi: “Njili na kwendeka kuli yeni boshe ngwange, kesi muliyongole yeni babenya kupwa bakama manene kutubakana omu mumunapu. Oloni munapande kulikehesa mu biyongola byeni.”—Loma 12:3
Njambi Akanyanyamesa Baje Bazema
10 Camucibali, omwo Yehova wanyanyamesele Shebina, wakulahelele ngwendi asa kutenguluka. (Pro 3:11, 12) Eci cinapu cilongesa cakama manene kuli baje babanecelesa bipangi bimo mu munga ya Njambi. Kubapandele kulubala na kuteketa, oloni banapande kweseka mubasela mwoshe kutwalelelaho kupangela Yehova Njambi na kumona ngwabo wabazema omwo nabanyanyamesa. Anukeni ngweni Tate yetu atubezikisa nga tutwalelelaho kulikehesa kuli ikeye. (Tandeni 1 Pita 5:6, 7.) Njambi mwakatunyanyamesa mu cizemo akatumungu, ngeci tutwaleleniho kupwa buma bwa kubotsiya mu maboko endi.
Njambi Akanyanyamesa Baje Bazema
11 Camucitatu, bakulunu mu cikungulukilo na bisemi, basa kulilongesako cilongesa cakama ku byuma byalingile Yehova kuli Shebina. Bika bibalilongesa? Kunyanyamesa kwa Yehova kukamwesa ngwabo wazinda bubi, oloni kukamwesa lalo ngwabo kesi kumbila kuti baje banalingi bubi. Nga mu bisemi nameme mu bakulunu mu cikungulukilo, mukatembwinina ngila yakanyanyameselamo Yehova ndi?—Juda 22, 23
Kutondesesa Bisimpi bya Seho
w06 12/1 11 ¶2
Bisimpi bya Kulitila bya mu Mukanda wa Isaya—I
21:1—Mutambela muka ubanatumbula ngwabo “mambo ya kalunga-ndonga”? Ou mutambela unapu Babiloni. Nameme Babiloni kuyakele kuyehi na kalunga-ndonga, banaitumbula mu ngila ei mwafwa ya ndonga ya Yufuleti na Tigrisi bije bikajalela manene mwaka na mwaka na kulingisa ou mutambela ukale na mema amangi.
JANUARY 19-25
BISIMPI BYA SEHO BYA MU LIJWI LYA NJAMBI ISAYA 24-27
“Ou Ikeye Njambi Yetu!”
cl 15 ¶21
“Taleni! Ou Ikeye Njambi Yetu!”
21 Kuma mwamonaho laja mwanike eleka bakwabo banike oku nabwahelela ngwendi: “Bakebo batate baje”? Omu mukemwo mubanapande kulizibila banu ba Njambi hali Yehova. Mbimbiliya inendeka ngwayo kulutwe tangwa banu ba kulongwa bakatambeka ngwabo: “Taleni! Ou ikeye Njambi yetu!” (Isa 25:8, 9) Nga mutwalelelaho kuzibuka bifwa bya Yehova, co oku kumikwasa mutwaleleleho kuliziba ngweni muli na Ishweni wamubwa manene.
Bitulilongesa ku Cikomokeso ca Yesu ca Makende
14 Yesu mwatulongesele ngwendi tulombe “byakulya byetu bya litangwa lya lelo” watulekele lalo ngwendi tulombe cizango ca Njambi cilingiwe hano hasi. (Mate 6:9-11) Musinganyeka ngweni buyoye bukafwa bati Njambi mwakashulisilila cizango cendi? Mbimbiliya imwesa ngwayo cizango ca Njambi cinambateselela kukwasa banu bakale na byakulya byabibwa. Kwesekesa na mukanda wa Isaya 25:6-8, Bumwene bwa Njambi mubukayula kano kaye kukakala byakulya byabingi. Mukanda wa Samu 72:16 wendeka ngwawo: “Bimbuto bikatuma ha lifuti-libu. Bikashula na ha malundu hoshe.” Kuma mwashungwiya kukapangesa ebi bimbuto mu kuteleka byakulya byabibwa manene bije kanda mutelekeho ndi? Acisinganyekeni kubwahelela kumukakala nakwo mu mukakuna lihya lyeni lya bushuka bwa binyu na kulikuwabyo. (Isaya 65:21, 22) Banu boshe baje bakakalako ha simbu oyo bakalikuwa ebi byuma byabibwa.
Cizemo ca Yehova Citukwasa Bati?
11 Acisinganyekeni mubukafwila buyoye bweni mu paradaisi hano hasi. Kumukalishoshomwena lalo bya kubinja nambe kutsa. (Isaya 25:8; 33:24) Yehova akamyana byuma byoshe byabibwa bimutonda. Byuma muka bimushaka kukalilongesa? Kuma mushaka kukalilongesa bya tusitu, kwimba nambe kusona ndi? Kukakala bamanjinela na baka-kutunga na bandimi. Co lalo kukakala banu baje bakakuna na kubwahesa byakulya na kupanga bikwata byakupangesa na kulima bitungu na kubinyunga. (Isaya 35:1; 65:21) Mumukayoya myaka yoshe mukawana simbu yaingi ya kulinga byuma byoshe bimutonda.
12 Tukabwahelela manene mutukatambula baje banatsi mu bakasanguka. (Bili 24:15) Acisinganyekeni kubwahelela kumukala nakwo mu mukalilongesa bya Yehova kwitila mu byuma byabingi byanatanga. (Samu 104:24; Isaya 11:9) Mumukayoya myaka yoshe kumukalingi lalo bubi. Ngeci, mukapangela Yehova kwa kujeneka kulomba kumikonekela. Kuma munapande kubyana buyoye bwabubwa bwa cifweci na kulyangwila “kulikuwa senga ya bubi ha simbu yaindondo” ndi? (Hebe 11:25) Embwe. Bibezikiso bitukalikuwa mu kaye kakaha binapu byabibwa kutubakana byuma byoshe-byoshe bitwasa kutambula ha simbu ino. Anukeni ngweni kaye kakaha kakaija, co kali muyehi. Co byoshe ebi bikalingiwa mwafwa Yehova watuzema manene mukemwo watumine munendi mangana akututsile.
Kutondesesa Bisimpi bya Seho
Likeheseni na Kunanguka Ngweni Kuli Byuma Bimo Kumuzibuka
10Kujeneka kuzibuka byuma byakalinga Yehova kutukwasa tukale na bifwa byabibwa byakufwa ngwe kulikehesa. Co kutukwasa lalo tunanguke ngwetu bisinganyeka bya Yehova byalisezela kulako na bisinganyeka byetu. (Isaya 55:8, 9) Kutukwasa lalo tukulahele manene ngwetu Yehova atukwasa mu byuma byoshe. Tukana Yehova bumpau nga byuma bili na kutwendela mwamubwa mu cipangi ca kwambulula nambe mu cipangi ceka ca mu munga yendi. (Samu 127:1; 1 Kori 3:7) Nga byuma kubilingiwa ngwe mutunakala na kusinganyekela, tunapande kwanuka ngwetu Yehova azibuka byuma byoshe. (Isaya 26:12) Tulingeniko bitwasa na kukulahela ngwetu Yehova atukwasa simbu yoshe. Twakulahela ngwetu Yehova atutwamenena, nameme kalingi ngoco kupangesa bikomokeso ngwe mwalingililile kunima.—Bili 16:6-10.
JANUARY 26–FEBRUARY 1
BISIMPI BYA SEHO BYA MU LIJWI LYA NJAMBI ISAYA 28-29
Singimikeni Yehova na Tunwa Tweni na Bimbunge Byeni
ip-1 299 ¶23
Isaya Apolofweta bya Cipangi ca Yehova ca Kukomokesa
23 Bantwama ba bulombelo bwa Cijuda bakele na kulimona ngwe bazibuka byuma byabingi bya ku sipilitu, oloni kubakele na kwononoka Yehova. Bakele na kulongesa banu bisinganyeka byabo kutalesa ku byuma byabibwa na byabibi mu kwimanena bilinga byabo bya kujwala bije byamwesele ngwabyo kubakele na likulahelo. Co bakele na kulingisa banu balinge byuma bilingisa Njambi keti ababezikise. Kwitila mu cuma cimo cacibwa cije cinapu ‘cipangi cendi ca kukomokesa,’ Yehova akabasompa mwafwa bapwa baka-kulikwisa. Yehova wendekele ngwendi: “Aba banu bali na kunjilemesa lika na tunwa twabo na kunjisingimika na tunwa twabo, oloni bimbunge byabo bili kulako nange, co bali na kunjizibila lyoba mwafwa ya mashiko a banu abanabalongesa. Ngeci, njikalinga lalo byuma bya kukomokesa kuli aba banu, njikalinga byuma bya kukomokesa, bya kukasamesa, co mana a banu babo ba mana akanyonga, na kuzibisisa kwa banu babo ba kunyanyama kukabanda.” (Isaya 29:13, 14) Yehova wamanesele kuzibisisa na mana a Bajuda. Walingile ngoco kwitila mu bumwene bwa Babiloni buje bwapwile bwa nzili manene mu kaye koshe. Babiloni yanyongesele bulombelo bwa Cijuda buje bwapwile bwa baka-kutengulukila. Byuma bya kulifwa byalingiwile mu simbu ya baka-Kristu bakulibanga mwafwa bantwama ba bulombelo bwa Cijuda bongumwine banu. Co lalo byuma bya kulifwa bikebyo bikalingiwa mu simbu yetu ku bulombelo bwa makuli.—Mateu 15:8, 9; Loma 11:8.
Na Cimo Cahi Casa Kutanwisa Baka-busunga
7 Yesu wapayele bantwama ba bulombelo mwafwa kubakele na kukwasa banu balemese Yehova mu ngila inapande. Cakumwenako, walekele Bafaliseo ngwendi bakele na cibembulu mwafwa bashongangeyeye banu bake manene mbunge ku kutana ku maboko kutubakana kunyunga bisemi babo. (Mateo 15:1-11) Hamo majwi endekele Yesu akomokesele bandongesi bendi. Mukemwo bamwihwile ngwabo: ‘Wazibuka ngwobe biunendeka byalubalesa Bafaliseo ndi?’ Co Yesu wabakumbulwile ngwendi: “Bimbuto byoshe bije Tate wa mwilu kabikunine bakabitukula. Beceleni, kesi mulinyenge hali bakebo! Bakebo banapu bantwama ba tupuputwa batwamenena tupuputwa bakwabo. Co nga kapuputwa atwamenena kapuputwa mukwabo, boshe babali bakawila mu mbulu.” (Mateo 15:12-14) Nameme bantwama ba bulombelo balubalele, Yesu kalikelele kubaleka busunga.
Twaleleleniho Kupwa Bangenzi mu Tenti ya Yehova
8 Baje ‘bakendeka busunga mu mbunge yabo’ kubesi kulikwisa kwononoka mashiko a Njambi nga bali mu mbunga na kuwapokola nga bali ku bushweke. (Isaya 29:13) Kubesi kukwisa. Muka-kukwisa nasa kushangumuka kusinganyeka ngwendi binangulo bimo bya Yehova kubyesi kupanga simbu yoshe. (Jems 1:5-8) Nasa kujeneka kupwa wa kulongwa kuli Yehova mu byuma byamona ikeye ngwendi keti bya seho manene. Co nga amona ngwendi byahi bitundamo mu kupokola mashiko a Yehova, nasa kushangumuka kupokoloni manene mashiko a Yehova. Nameme asinganyeka ngwendi ali na kupangela Yehova. Yehova kasa kutambula kulemesa kwendi. (Ekele 8:11) Yetu tushaka kupwa baka-busunga mu byuma byoshe.
Kutondesesa Bisimpi bya Seho
Tabeseni Biyongola bya Njambi ha Bwala Bimitwamenene
Kuma kuli bukalu bwanasa kuliwana nabwo munu nga akabangeya bibakalingi banu mu cisemwa cendi omwo angula byakulinga kutalesa ku kunwa bwala ndi? Baka-Kristu bakalingi byuma bije bizibisa Yehova kubwaha nga bashaka kwangula byuma bimo bya kufwa ngwe kulya na kunwa. Mbimbiliya itwanukisa ngwayo: “Nameme muli na kulya nambe muli na kunwa nambe muli na kulinga cuma coshe-coshe, lingeni byuma byoshe mu kwana Njambi bumpau.” (1 Kori 10:31) Tucisimutwiyeni ha bihula binatako na binangulo bimo bya mu Mbimbiliya:
Kuma njikanu bwala mangana njizibise bakwetu kubwaha ndi? Mukanda wa Kutuuka 23:2 ngwawo: ‘Keti ukakabangeye banu babangi.’ Aha Yehova wakele na kunangula Baisalele ngwendi keti batembwinine banu ba bilinga byabibi. Eci cinapu cinangulo cacibwa na kuli baka-Kristu ano matangwa. Nga tutabesa binangulo bya bakwetu kututwamenena omwo twangula byakulinga kutalesa ku bwala, tunasa kwecela kupangesa binangulo bya Yehova na kutsiya busamba bwetu nendi.—Loma 12:2.
Kuma njikanu bwala mu kushaka kumwesa ngwange nji wa kukanyama ndi? Kunwa manene bwala kukwabihile mu bisemwa bimo. (1 Pita 4:3) Nangukeni biutunangula kulinga mukanda wa 1 Korinte 16:13. Ou mukanda ngwawo: ‘Toneni, kanyameni mu likulahelo, pweni ngwe banalume, kaleni na nzili.’ Kuma bwala bwasa kukwasa munu akale na nzili ndi? Embwe. Bwala bwasa kwonowesa munu kusinganyeka mwamubwa na kumulingisa ajeneke kwangula mwamubwa byakulinga. Ngeci, kunwa manene bwala kukumwesa ngwabo munu ali na nzili, oloni kumwesa ngwabo ali na buzeye. Mukanda wa Isaya 28:7 unendeka bya munu apelyangela na kutanuka mwafwa ya bwala.
Nzili ije ikatukwasa kulinga mwamubwa byuma ikatundu kuli Yehova, co tunapande kutona na kukanyama mu likulahelo. (Samu 18:32) Twasa kulinga ngoco nga tunanguka bukalu na kubujenjuka na kulinga byuma bije kubyasa kutsiya busamba bwetu na Yehova. Yesu mwakele hano hasi wakele na busamba bwa kukanyama na Yehova. Banu babangi bamusingimikile mwafwa wapwile wa kusimpa, co wakele na kulinga byuma byabibwa.
Kuma njikanu bwala mangana keti njilishoshomwene ha bukalu bunjili na kuliwana nabwo ndi? Njambi wahwimininine muka-kwimba asoneke ngwendi: ‘Omwo njalishoshomwenene manene, yobe [Yehova] wanjizembelekele na kunjihwimisa.’ (Samu 94:19) Nga mwaliwana na bukalu bumo, kulaheleni Yehova keti bwala. Mwasa kulinga ngoco nga mulombela kuli Yehova. Co lalo babangi banalimwena bubwa bwa kupangesa binangulo bya kabusamba wa kukola ku sipilitu. Kunwa bwala mu kushaka kumanesa bukalu kunasa kulingisa munu onowe kusinganyeka mwamuba na kulinga byuma byabibi. (Hosi 4:11) Daniel itunabanga kwendeka ngwendi: “Njakele na kulifwita na bishoti, co njalizibile kukala na mulonga. Njakele na kunwa bwala mu kushaka kutepulula ku bishoti. Oloni oku kwalingisile lika bukalu bulibwezelele. Banu becelele kunjisingimika.” Bika byakwasele Daniel? Ngwendi: “Njanangukile ngwange njapandele kukulahela Yehova keti bwala. Munjalingile ngoco, wanjikwasele, co njahyanene bukalu bwange.” Yehova nalibwahesela kutukwasa simbu yoshe nameme twaliwana na bukalu buje bunasa kumoneka ngwe kutwasa kubuhyana.—Filp 4:6, 7; 1 Pita 5:7.
FEBRUARY 2-8
BISIMPI BYA SEHO BYA MU LIJWI LYA NJAMBI ISAYA 30-32
Kulaheleni Ngweni Yehova Aminyungilila
w01 11/15 16 ¶7
Yehova Ikeye Butewelo Bwetu
7 Yehova ikeye butewelo bwetu. Majwi anatako akatuzembeleka. “Akufwika na mambaba endi, co utewela mwisi ya mambaba endi. Kulongwa kwendi kupwa ngwe ntelo yakama na cibumbe cije cikunyungilila.” (Samu 91:4) Njambi akatunyungilila ngwe kazila mwakanyungilila bana bendi. (Isaya 31:5) Akatufwiki mu mambaba endi akama mu kutunyungilila. Mambaba a tuzila apwa akama, co bakawapangesa mu kunyungilila bana babo. Ngwe mwa twana twa tuzila tuje tucili na kumena mambaba, Yehova ali na kutunyungilila mu mambaba endi a cifwisa mwafwa munga yendi ya baka-Kristu ba busunga inapu butewelo bwetu.—Ruthi 2:12; Bisamu 5:1, 11.
Yehova Amikwasa ha Simbu Yaikalu
13 Bika bitunapande kulinga? Lwiseni biyongola bya kushaka kukala lika kwa likalyeni. Kakangi nga munu akala lika kwa likalyendi, ashangumuka kusinganyeka lika byendi na bukalu bwali na kuliwana nabwo. Co kulinga ngoco kwasa kulingisa munu onowe kwangula mwamubwa byakulinga. (Prov 18:1) Tuzibuka ngwetu bisimbu bimo tubaboshe tukatondo kukala kwa likalyetu nga twaliwana na bukalu bumo bwakama. Oloni nga tukala kwa likalyetu ha simbu yailaha, twasa kwonowa kuwana bukwasi kwitila mu ngila yanasa kupangesa Yehova. Ngeci, nameme byuma binasa kukaluwa nga mwaliwana na bukalu, lingeni mwoshe mumwasela kutambula bukwasi bwa baka-naanga yeni, babusamba hamolika na bakulunu mu cikungulukilo. Bamoneni kupwa ngila yali na kupangesa Yehova mu kumikwasa.—Prov 17:17; Isa 32:1, 2.
‘Yehova Amikolesa’ Bati?
19 Bika byasa kumikwasa kukanyamesa lilabelelo lyeni? Cakumwenako, nga muli na lilabelelo lya kuyoya myaka yoshe hano hasi, co tandeni biñanda bili mu Mbimbiliya bije byendeka muikafwila Paradaisi na kusinganyekesesaho. (Isaya 25:8; 32:16-18) Singanyekeseseni mubukafwila buyoye mu kaye kakaha. Lingeni ngwe neni mumuli. Muli na kumona beya? Bilumo muka bimuli na kuziba? Muli na kuliziba bati? Taleni bikupulo bili mu mabulu etu bije bimwesa muikafwila Paradaisi nambe kukenga mavidio a myaso a kufwa ngwe Kaye Kakaha Katunabandamena, Twabandamena Paladaisi, nambe Acithinganyekeni Bikalingiwa Kulutwe. Nga tuwana-wana simbu ya kusinganyekesesa mubukafwila buyoye mu kaye kakaha, co bukalu bwetu ‘bupwa bwa simbu yaindondo lika, co lalo bupwa bwabwehu.’ (2 Kori 4:17) Lilabelelo lyanatwana Yehova lyasa kutukolesa nga twaliwana na byeseko.
Kutondesesa Bisimpi bya Seho
Pweni ba Kubwahelela Omwo Mubandamena Byanamikulahesa Yehova
Mbimbiliya ngwayo: ‘Yehova nabandamena ngeci amizibileko mema ku mbunge. Ikeye ali na kumizibila ngozi omwo simbu yoshe akalingi bya busunga. Banabezika baje bakulahela ikeye.’ (Isaya 30:18) Hakulibanga, awa majwi atalesele ku Bajuda baje kubononokele Njambi. (Isaya 30:1) Oloni Bajuda bamo bapwile ba kulongwa, co awa majwi abakwasele bakale na lilabelelo. Awa majwi akwasa bangamba ba Yehova ba kulongwa ano matangwa kukala na lilabelelo.
Ngeci, tunapande kukala na mbunge ya kubandamena ngwe Yehova. Kuli simbu yanabwahesa yakanyongesa kano kaye kakabi, co nabandamena eli litangwa na ola. (Mate 24:36) Ha simbu oyo, banu boshe hamolika na tungelo bakalimwena ngwabo Liyabolo wakutiiye Yehova hamolika na bangamba bendi byuma bya makuli. Kutundaho, Yehova akatundisako Satana na boshe baje banalikwatasana nendi, co ‘akatuzibila mema ku mbunge.’
FEBRUARY 9-15
BISIMPI BYA SEHO BYA MU LIJWI LYA NJAMBI ISAYA 33-35
“Ikeye Azameka Bisimbu Byobe”
Yehova Amikwasa ha Simbu Yaikalu
7 Bukalu. Nga twaliwana na ceseko, tunasa kwonowa kuliziba ngwe mutukalizibila, kusinganyeka ngwe mutukasinganyekela nambe kulinga byuma ngwe mutukabilingila. Tunasa kuliziba ngwe bwato buje buli na kulingwanjanga ha mema mwafwa ya lihunzi lyakama. Ndokazi Ana itunabanga kuziba ngwendi wakele na kuliziba manene busiwa ha bisimbu byabingi munima ya kutsa kwa muka-limbo lyendi. Wendekele ngwendi: “Munjakele na kuliziba ngwe nji wangoco, njakele na kuzeya manene. Co njakele na kulubala.” Ou ndokazi wakele mu busiwa, co kakangi kulinga byuma byakele na kulinga mwamubwa munalume wendi ha kupwa mutwe wa naanga kwakele na kumulubalesa. Simbu imo wakele na kuliziba ngwe ali hakati ka kalunga-ndonga oku kuli lihunzi lyakama. Yehova asa kutukwasa bati nga tuli mu bishoti bya cifweci?
8 Bika byalinga Yehova? Yehova natukulahesa ngwendi atukanyamesa. (Tandeni Isaya 33:6.) Nga kuli lihunzi lyakama, bwato bwasa kulingwanjanga manene. Nameme ngoco, mato amo akama akakala na byuma bimo bya kulifwa na matendo a bisi bibakaka ku mukulo awo bije bikakala mu mema, bije bikaakwasa kujeneka kulingwanjanga manene. Ebi binasa kulingisa bwato bujeneke kungumuka nambe kubombela na kulingisa obo balimo bajeneke kukala mu bushonde. Oloni ebi byuma bikapanga mwamubwa nga bwato buli na kwenda. Mu ngila imolika, Yehova atukwasa kukala mwamubwa nga tutwalelelaho kumupangela mu kulongwa nameme twaliwana na byeseko.
Bika Bitukwasa Tutwaleleleho Kubwahelela Omwo Tuliwana na Byeseko?
10 Byakulinga: Lombeni Yehova amyane mana. Nga tushaka ngwetu tupwe ba kubwahelela omwo tuliwana na byeseko, co tunapande kulomba Yehova atwane mana mangana twangule mwamubwa bya kulinga. (Tandeni Yakomba 1:5.) Byuma muka bitunapande kulinga nga tuliziba ngwetu Yehova kesi na kukumbulula bwasi malombelo etu? Yakomba wendekele ngwendi tunapande kutwalelelaho ‘kulombela.’ Yehova kalubala omwo tutwalelelaho kumulomba mana. Katwana kashitiko embwe. Nga tulomba Tate yetu wa mwilu, co atwana mana mangana tukolese omwo tuliwana na byeseko. (Samu 25:12, 13) Ali na kumona byeseko bituli na kuliwana nabyo, co akatuzibila ngozi. Ngeci atukwasa. Kuzibuka ngoco kutulingisa tubwahelele. Yehova akatwana bati mana?
11 Yehova akapangesa lijwi lyendi mu kutwana mana. (Pro 2:6) Tunapande kulilongesa Lijwi lya Njambi na mabulu aje anakundama ku Mbimbiliya mangana tukale na mana a kutunda kuli Njambi. Oloni kuli byuma bikwabo bitunapande kulinga. Tunapande kupangesa bitulilongesa mu Lijwi lya Njambi. Yakomba wasonekele ngwendi: ‘Kesi mupwe baka-kuziba Lijwi lyendi lika oloni pweni baka-kulipangesa.’ (Yako 1:22) Nga tupangesa binangulo bya mu Lijwi lya Njambi tukala mu kwoloka na bakwetu, tubazibisisa na kubazibila ngozi. (Yako 3:17) Ebi bifwa bitukwasa tukolese omwo tuliwana na byeseko na kutwalelelaho kupwa ba kubwahelela.
ip-1 352-355 ¶21-22
“Kukwesi Munu Akakala mu Lifuti Akendeka Ngwendi: “Njili na Kubinja’”
21 Bupolofweto bwa Isaya buli na kulishulisilila na mu simbu yetu. Ano matangwa, Yehova ali na kukangwisa banu bendi ku sipilitu. Banabapatula ku bilongesa bya makuli bya kwendeka ngwabo munu wakala na mwonyo uje kuwesi kutsa, cilongesa ca binjambi Batatu na cilongesa ca litende lya tuhya. Co lalo bali na kutambula binangulo bya futisi ya kujela bije bili na kubakwasa kujenjuka ku bilinga byabibi na kubakwasa kwangula mwamubwa byakulinga. Mwafwa ya ndando ya kupatula ya Yesu Kristu, banu ba Njambi bapwa ba kujela ku mesho a Yehova, co lalo bali na citakutaku ca kujela. (Kolose 1:13, 14,1 Pita 2:24, 1 Iwano 4:10) Kutukangwisa ku sipilitu kuli na kutukwasa na ku mubila. Cakumwenako, kujenjuka ku bupangala na kupangesa mambanda akupendesa kuli na kunyungilila baka-Kristu ku mishongo ikaija mwafwa ya kulila na mushongo ya kansa.—Korinte 6:18; 2 Korinte 7:1.
22 Majwi ali ku Isaya 33:24 akalishulisilila mwakama munima ya Amagidoni mu kaye ka kaha ka Njambi. Mu Bumwene bwa Mesiya, banu bakabakangwisa ku mubila na ku sipilitu mu ngila ya kulitila. (Kujombolola 21:3, 4) Munima lika ya simbu yaindondo kutunda ha bakanyongesela kaye ka Satana, bikomokeso byalingile Yesu mwakele hano hasi, akabilinga mu kaye mwoshe. Tupuputwa bakamona, tusinda matwi bakaziba na biyanga bakenda. (Isa 35:5, 6) Co oku kukalingisa banu boshe baje bakoboka kayando kakama bakapangele hamo mu kupwisa kaye paradaisi.
Kutondesesa Bisimpi bya Seho
Twaleleleniho Kwenda mu “Tapalo ya Kujela”
8 Oloni bamo hamo banasa kulihula ngwabo, ‘Kuma byuma byalingiwile kuli Bajuda netu byatukundama ndi?’ Binatukundama mwafwa netu tuli na kwenda mu “Tapalo ya Kujela” ya cifwisa. Nameme tu bakubwabesa nambe tu bimanga beka, tubaboshe tunapande kutwalelelaho kwenda mu ngila ya kujela mwafwa kulinga ngoco kutukwasa tutwaleleleho kupangela Yehova ha simbu ino. Co kulutwe, Bumwene bwa Njambi mubukatengulula byuma byoshe bili muno mu kaye tukalikuwa kuyoya. (Iwano 10:16) Kushwa lika mu 1919, banu babangi, banalume, banakazi na banike banaseze Babiloni Wakama kulumbununa bulombelo bwoshe bwa makuli na kushangumuka kwenda mu ngila ya cifwisa. Twakulahela ngwetu neni munapu umo wabo. Nameme banu bashangumukile kwenda omu mu tapalo myaka ya kweta ku 100 kunima, kuli banu bamo bashangumukile kubwahesa ei tapalo simbu kanda banu bashangumuke kwendamo.
FEBRUARY 16-22
BISIMPI BYA SEHO BYA MU LIJWI LYA NJAMBI ISAYA 36-37
“Keti Uzibe Lyoba Mwafwa ya Majwi Aunazibi”
it “Hezekiya” Na. 1 ¶14
Hezekiya
Senakeribu Wonowele Kuhyana Jelusalema. Hezekiya wabandamenene ngwendi Senakeribu eja na kulwisa nganda ya Jelusalema, co bikebyo bene byalingile Senakeribu. Senakeribu mwakele na kufungulula nganda ya Lakishe ije yakele na bibumbe bya kukanyama, watumine bantwama bamo ba maswalale bendi baye ku Jelusalema mangana bakaleke Bajuda balitabele kubafungulula. Labushake ikeye wapwile muka-kwendekelako mwene haje ha cibunga ca maswalale catumine (Labushake kulyapwile lizina lyendi, oloni lyapwile lizina libamwanene ha kupwa ntwama wa maswalale.) Ou munalume wazibukile mwamubwa Cihebelu. Washendumwine Hezekiya na kushaula Yehova, co walishashele ngwendi Yehova kasa kwamena Jelusalema ngecilika binjambi bakwabo mubanonowela kwamena mafuti abo mu liboko lya mwene wa Asiria.—2Bi 18:13-35; 2Ko 32:9-15; Isa 36:2-20.
ip-1 387 ¶10
Mwene Hezekiya Bamubezikisa Mwafwa ya Kukala na Likulahelo
10 Kutundaho, Labushake wanukisile Bajuda ngwendi bakele na maswalale babando manene. Co walishashele ngwendi: “Njikwana tubalu 2,000 tumone indi wasa kuwana baka-kulondaho ba kupwamo.” (Isa 36:8) Kuma Bajuda basele kuhyana ije nzita mwafwa ya kukala na maswalale babangi baka-kulonda tubalu ndi? Embwe, Bajuda kubakulahelele lika maswalale babakele nabo. Mukanda wa Provebia 21:31 unakanyeka ei simpi ngwawo: “Kabalu nalibwahesela litangwa lya nzita, oloni Yehova ikeye obola.” Oloni Labushake wendekele lalo ngwendi Yehova wakele na kubezikisa Baasilya keti Bajuda. Wendekele ngoco mwafwa bahyanene binganda bije byakele mu Juda.—Isaya 36:9, 10.
ip-1 388 ¶13-14
Mwene Hezekiya Bamubezikisa Mwafwa ya Kukala na Likulahelo
13 Labushake wajujwisile lalo Bajuda na majwi endi. Wabalekele ngwendi keti batabese Hezekiya abongumune nga abaleka ngwendi: “Yehova atwamena.” Labushake wanukisile Bajuda ngwendi binjambi ba Basamaliya kubasele kwonowesa miyati likumi ya bumwene bwa Isalele kuifungulula kuli Baasilya. Bati co binjambi ba mafuti eka babanafungulula kuli Asiria? Wabehwile ngwendi: “Binjambi ba Hamathi na Apadi bali kuli? Binjambi ba Sefavaimu bali kuli? Kuma banamena Samaliya mu liboko lyange ndi?”—Isaya 36:18-20.
14 Banu ba mu Samaliya balizesele na banu ba mu nganda ya Jelusalema mwakele na kuyula mwene Hezekiya mwafwa Basamaliya batengulukilile Njambi. Oloni Labushake uje wakele na kulemesa binjambi ba makuli kazibukile ei ñanda. Binjambi ba makuli ba Basamaliya kubakele na nzili ya kwamena bumwene bwa Baisalele bwa miyati likumi. (2 Bimyene 17:7, 17, 18) Oloni Hezekiya wakwasele banu bendi becele kulemesa binjambi ba makuli na kushangumuka lalo kulemesa Yehova. Banalume batatu baje bemanenene Bajuda kubalekele Labushake ebi byuma. Mbimbiliya ngwayo: “Oloni bolokele lika kulu, kubamukumbulwile, mwafwa mwene wabashikile ngwendi, ‘Keti mukamukumbulule.’” (Isaya 36:21) Co Elyakime, Shebina na Jowa belukile kuli Hezekiya na kukamuleka majwi anakala na kwendeka Labushake.—Isaya 36:22.
Kutondesesa Bisimpi bya Seho
Anukeni Ngweni Yehova Wapwa ‘Njambi wa Kuyoya
8 Netu twasa kukolesa mu byeseko nga twanuka ngwetu Yehova Njambi wa kuyoya nalibwahesela kutukwasa. (Samu 118:6) Nga tusinganyekesesa ha byuma byanatulingila Njambi kunima, co likulahelo lyetu likanyama. Tandeni biñanda bya mu Mbimbiliya bije bimikwasa kumona mobwelelemo Yehova bangamba bendi kunima. (Isaya 37:17, 33-37) Tandeni na kuyongola lalo biñanda ha webusaiti yetu ya jw.org bije bimwesa omwo Yehova ali na kukwaselamo bandolome na bandokazi. Kutundaho, singanyekeseseni ha simbu yamikwasele Yehova. Hamo Yehova kamilingilile byuma bya kukomokesa bya kufwa ngwe kumyobola ku mbeya nambe ndumba. Nameme ngoco, Yehova namilingila byuma byabingi mu kuyoya kweni. Namilanya kupwa kabusamba kendi. (Iwano 6:44) Nameme ha simbu ino, mucili mu busunga mwafwa ikeye ali na kumikwasa. Ngeci, lombeni Yehova amikwase kwanuka simbu yakumbulwile malombelo eni, kumyana byuma mpundu bimwatondele ha simbu inapande nambe kuminyungilila mu mwakele mu bukalu. Kwanuka byuma bya cifweci kumikwasa mukulahele ngweni Yehova atwalelelaho kumikwsa.
FEBRUARY 23–MARCH 1
BISIMPI BYA SEHO BYA MU LIJWI LYA NJAMBI ISAYA 38-40
“Akanyunga Butanga Bwendi Ngwe Kanyungi”
Bika Biyendeka Mbimbiliya Hali Babenyayo?
3 Tandeni Isaya 40:8. Kushwa lika kusañulu Lijwi lya Njambi linatwalelelaho kukwasa banu babangi ba kulongwa. Linasa bati kulinga ngoco? Eci cinapu cihula cacibwa, mwafwa hakulibanga biñanda bya mu Mbimbiliya babisonekele ha mabulu akuzenga aje anyongele mu kwita kwa simbu, ngeci mabulu habasonekele biñanda bya mu Mbimbiliya akulibanga ahiko ano matangwa. Oloni Yehova wakwasele banu bendi basononone Mbimbiliya. Nameme baka-kusononona kubapwile ba kulumbunuka, oloni bakele manene mbunge ku cipangi cabo. Kutalesa ku Bisoneka bya Cihebelu muka-kulilongesa umo wendekele ngwendi: “Kukwesi libulu libanasononona mu kusungama ngwe Mbimbiliya.” Kuneti simbu yakama kutunda habasonekelele biñanda byakulibanga, co lalo babisonekele ha byuma bije byasele kubihya, kutundaho banu basonwenene ebi biñanda kubapwile ba kulumbunuka. Nameme ngoco twakulahela ngwetu biñanda bituli na kutanda ano matangwa mu Mbimbiliya bikebyo byayongwele Njambi ngwendi tubizibe.
4 “Cashu coshe cacibwa na bwana bwoshe bwabubwa” byatunda kuli Yehova. (Jems 1:17) Yehova natwana Mbimbiliya ije inapu bwana bwakulitila. Nga munu atwanako bwana bumo amwesa ngwendi atuzibuka mwamubwa, co lalo azibuka bujene bwetu. Mu ngila imolika, Yehova azibuka bujene bwetu mukemwo natwana Mbimbiliya. Tuzibuka mwamubwa Yehova nga tulilongesa Mbimbiliya. Tulilongesa ngwetu Yehova atuzibuka mwamubwa, co lalo azibuka bujene bwetu. Muno mu cilongesa tusimutwiya ha bifwa bitatu bya Yehova bituwana mu Mbimbiliya, ebi bifwa binapu mana, kwakula mwamubwa na cizemo. Tucisimutwiyeni ha bukaleho bwa mu Mbimbiliya buje bumwesa ngwabo Njambi wapwa muka-mana
cl 70 ¶7
Nzili ya Kutunyungilila
“Njambi ikeye butewelo bwetu”
7 Yehova nalyesekesa ku kanyungi mu kumwesa ngwendi ashaka kutunyungilila. (Ezekiele 34:11-16) Anukeni majwi ali ku mukanda wa Isaya 40:11 atunasimutwiiye muno mu libulu ha cilongesa 2. Awa majwi banapangesa mu kulumbununa mwafwila Yehova ngwabo: “Akanyunga butanga bwendi ngwe kanyungi Akakungulwila hamo bana ba bimanga na liboko lyendi, na kubambata ha nulo yendi.” Muna-manga asa kuliwana bati ha nulo ya kanyungi? Muna-manga nasa kuya kuli kanyungi na kukamumbola ku lindi, oloni kubanga kanyungi akulame na kumukakula na kumwaka ha nulo. Eci cakumwenako cimwesa ngwabo Yehova uje wapwa Kanyungi wetu Wakama ashaka kutunyungilila.
“Njambi Akakolesa Baje Banazeye”
4 Tandeni Isaya 40:26. Naumo wahi watandaho laja bingongonosi byoshe bya mwilu. Baka-sayansi bakulahela ngwabo mulalabizi umo lika wa Milky Way wakala na bingongonosi bya kweta ku 400 billion. Oloni Yehova naluku ngongonosi na ngongonosi lizina. Bika bitulilongesaho? Nga Yehova nakela mbunge kuli ebi byuma bya kujeneka kuhwima, co akalizibi bati kuli yeni muli na kumupangela na mbunge yeni yoshe, kesi ngwe mu kumisindiya, oloni mwafwa mwamuzema? (Myaso 19:1, 3, 14) Tate yetu wa mwilu amizibuka mwamubwa. Co “walaba biñambu byoshe bya ku mitwe yeni.” (Mateo 10:30) Co lalo, muka-kwimba myaso atwanukisa ngwendi: “Shukulu Kalunga akanyungu baje bamwononoka.” (Myaso 37:18) Azibuka bukalu bwoshe bu muli na kulifwita nabwo, co amyana nzili, mangana mukolese.
5 Tandeni Isaya 40:28. Yehova ikeye wapwa muka-nzili yoshe. Acisinganyekeni nzili yakatwana, ije ikatundu ku litangwa. Dabid Bodanis muka-kulilongesa bya sayansi wendekele ngwendi: “Nzili ikatundu ku litangwa mu sekondi imo lika inapu hamo na mabillion a bimbomba bya nzita. Muka-sayansi mukwabo lalo wendekele ngwendi: “Nzili ikatundu ku litangwa mu sekondi imo, . . . yasa kuyoyesa byuma byoshe bili hano hasi ha myaka 200,000.” Kuma Njambi uje nana nzili ku litangwa kasa kutwana “nzili” ya kukolesela bukalu bwoshe butuliwana nabwo ndi?
6 Tandeni Isaya 40:29. Kupangela Yehova kukatuzibisa kubwaha. Yesu walekele bandongesi bendi ngwendi: “Lilemekeni mandauluwa yange.” Wendekele lalo ngwendi: “Co mukawana kuhwima ku myonyo yeni. Omwo mandauluwa yange yayasi, na citele cange cacehu.” (Mateo 11:28-30) Awa majwi apwa a busunga. Bisimbu bimo, hamo tukalizibi kujuka nga tuya ku biwano nambe kuya na kwambulula. Oloni tukalizibi bati mutukeluka ku binjubo byetu? Tukakanyama na kuliziba ngwetu twasa kukolesela byeseko bya mu kuyoya. Cili bene, citele ca Yesu capwa cacehu.
Kutondesesa Bisimpi bya Seho
Lizina lya Yehova Lyapwa Bati lya Seho Kuli Yetu?
12Nga tukundwiya lizina lya Yehova nambe kulimanena, co tutembwinina Yesu Kristu. Isaya wapolofwetele ngwendi, kukakala umo ‘akabwahesa [nambe ‘kujelesa’] ngila ya Yehova.’ (Isaya 40:3) Obu bupolofweto bwalishulisilile bati? Iwano Muka-kumbwitika wabwaheselele ngila Yesu uje wezile mu lizina lya Yehova na kwendeka mu lizina lya Yehova. (Mate 3:3; Maki 1:2-4; Luka 3:3-6) Bupolofweto bwakulifwa bwendekele lalo ngwabwo: “Bumpau bwa Yehova bukasholoka.” (Isaya 40:5) Mu ngila muka? Yesu mwezile hano hasi wemaneneko Yehova mu kulumbunuka ngeci kwapwile lika ngwe Yehova Ikeye wezile hano hasi.—Iwano 12:45