Yehova Nabezikisa Baje Baneluka mu Mafuti Abo

BANDOLOME na bandokazi babangi baje bajalukilile ku mafuti eka na kutonda bimbongo baneluka mu mafuti abo. Kuzema Njambi na banu kunabalingisa bajalukile ku mitambela kuje kuli bujene bwa baka-kwambulula bya Bumwene. (Mateo 22:37-39) Balyanene bati, co Yehova nababezikisa bati? Tusimutwiyeni ha byuma binalingiwa mu lifuti lya Cameroon lije lyakala ku mulauko wa Africa.

MWELA WAUBWA WA KWAMBULWILA

Mu 1998 ndolome wa lizina lya Onésime wajalukile mu Cameroon. Wakayoyele ku lifuti lyeka ha myaka 14. Litangwa limo mwakele ku biwano, ndolome umo wendekele cakumwenako cije cakundamene ku cipangi ca kwambulula. Ou ndolome wendekele ngwendi: “Nga banu babali bali na kutsiya bisi mu mitambela ya kuliseza, co umo wabo aziba ngwendi mukwabo ali na kutsiya bisi babangi, kuma kajalukila kuje ku mutambela kuli na kutsa bisi babangi ndi?”

Eci cakumwenako calingisile Onésime asinganyeke bya kwiluka ku Cameroon kuje kwakele banu babangi baje bashakele kulilongesa Mbimbiliya. Oloni walishoshomwenene ngwendi hamo kakasa kuyoyamo mwamubwa mwafwa wakakele ku lifuti lyeka ha myaka yaingi. Bika byalingile? Onésime wakasikamene mu Cameroon ha bingonde 6 mangana amone indi asa kuyoyamo. Co mu 2012 wajalukile.

Onésime ngwendi: “Njapandele kwizilila yoyesi ya mu lifuti lyetu. Cakumwenako, njapandele kwizilila kushaluka kwa mu lifuti lyetu na kutumbama ha bitumbamo bya kujeneka masofa mu Njubo ya Bumwene. Oloni kutolilila manene ku biwano kwanjikwasele njibale bya bitumbamo bya masofa binjakele na kutumbama.”

Mu 2013 Onésime walyambatele na Géraldine uje welukile mu Cameroon kutunda ku France kuje kwakayoyele ha myaka 9. Bibezikiso muka bibanawana mwafwa ya kwaka byuma bya ku sipilitu mu mutamba wa kulibanga mu kuyoya kwabo? Onésime ngwendi: “Twakobelele Sikola ya Baka-kwambulula bya Bumwene na kupangela ha Mbetele. Mwakawali, banu baje bakele na kulilongesa Mbimbiliya ba kupwa 20 ba mu cikungulukilo cetu babambwitikile. Njalimwena ngwange ha simbu ino njili mu mwela waubwa wa ‘kujebela banu’” nambe ngwetu wa kwambulwila. (Mako 1:17, 18) Géraldine ngwendi: “Njinawana bibezikiso byabingi bije kunjasinganyekele ngwange njasa kubiwana.”

KUBWAHELELA KUNATUNDU MU KUPWISA BANU BANDONGESI

Judith wajalukilile ku America, oloni washakele kulinga byabingi mu cipangi ca kwambulula. Wendekele ngwendi: “Simbu yoshe munjakele na kwiluka ku America kutunda ku Cameroon mu kumona baka-naanga yange, njakele na kulila mwafwa njakele na kuseza banu babangi baje banjashangumukile kulilongesa nabo Mbimbiliya.” Judith washakele kwiluka ku Cameroon oloni wakele na kukwata-kwata ku masinde. Wakele na cipangi cije cakele na kumuwanesa bimbongo byabingi, co wasele kulandela baishe bumbanda na byuma bikwabo bibatondele mubakele na kubinja. Oloni kukulahela Yehova kwamukwasele eluke kwimbo lyabo ku Cameroon. Wendekele ngwendi byuma bimo bije byakele na kulikuwa ku America mu Cameroon byahimo. Walombele Yehova amukwase kwizilila buyoye bwa mu Cameroon, co lalo kanyungi wa kuzenguluka na munakazi wendi bamutakamesele.

Omwo wanukile byuma byalingiwile mwetele mu Cameroon, Judith wendekele ngwendi: “Mu myaka itatu lika, njakwasele banu bawana bete ha kubambwitika, co njabwahelelele.” Judith wapwile painiya wa kulitila, co ha simbu ino ali na kupangela hamo na munalume wendi Sam-Castel uje wapwa kanyungi wa kuzenguluka. Bika byalingiwile kuli baishe ya Judith? Judith na baka-naanga yendi bawanene cipatela ca mu lifuti lyeka cije calitabelele kufwetela baishe mangana babatabule. Co babatabwile kwa kujeneka bukalu.

YEHOVA NATUKWASA

Ndolome wa lizina lya Victor wajalukilile ku Canada. Munima ya kutanda ñanda imo ya mu Kaposhi ka Kukengela ije yendekele bya kuya ku masikola akama, wasinganyekesesele ha kosi yendi. Co watundile ha Yuniveziti na kukalilongesa kosi imo ya bipangi bya maboko. Wendekele ngwendi: “Eyi kosi yanjikwasele njiwane bwasi cipangi na kulinga bupainiya buje bunjatondele kulinga.” Mu kwita kwa simbu Victor walyambatele na Caroline, co baile ku Cameroon na kusikama. Co lalo omwo bakasikamene ha munango, babashongangeyeye ngwabo bapangele mu Cameroon nga citaba. Victor ngwendi: “Kukwesi byuma byasele kutwonowesa mwafwa te tunasiwisa laja buyoye bwetu. Ngeci, twatabele.” Nameme Caroline kalikangwile mwamubwa, oloni bajalukile.

Victor na Caroline bashangumukile kulinga bupainiya mangana bambulwile banu babangi baje bashakele kulilongesa Mbimbiliya. Ha kulibanga, kubatondele bipangi mwafwa batulikile bimbongo bya kupwamo. Mu kwita kwa simbu baile ku Canada na kukapanga ha bingonde byabindondo lika, co basele kwiluka lalo ku Cameroon na kukatwalelelaho kulinga bupainiya. Yehova nababezikisa bati? Bakobelele Sikola ya Baka-kwambulula bya Bumwene, bapwile bapainiya ba kulitila, co ha simbu ino bali mu cipangi ca kutunga. Victor ngwendi: “Twasezele buyoye bwetu bwabubwa ngeci twapandele kukulahela Yehova ngwetu atukwase, co natukwasa.”

KUBWAHELELA KUNATUNDU MU KUKWASA BANU BALIKUNDIKE KULI YEHOVA

Mu 2002, Alain uje wakele ha Yuniveziti imo ya ku Germany watandele ka tilakiti ka Ba Banca—Bupilo Bwa Mina mu ka bu Sebelisa Kwañi? Biñanda byatandelemo byamukwasele alyakele bilengo byeka. Mu 2006 waile ku Sikola ya Kulilongesa Bipangi bya mu Munga ya Njambi, co bamutumine kukapangela ku lifuti lyendi ku Cameroon.

Mwaketele ku Cameroon wakawanene cipangi ca kupanga matangwa amo mu calumingo. Mu kwita kwa simbu, wawanene cipangi cije ciwanesa bimbongo byabingi, oloni walishoshomwenene ngwendi hamo cimwonowesa kupanga mwamubwa cipangi ca kwambulula. Co mubamulombele ngwabo apwe painiya wa kulitila, watabele. Bakulunu ku bipangi byendi bamukulahesele ngwabo babwezelela ku bimbongo byakele na kutambula, oloni ikeye wabyanene. Mu kwita kwa simbu, Alain walyambatele na Stéphanie uje wakakele ku France ha myaka yaingi. Bukalu muka bwaliwanene nabwo Stéphanie mwajalukilile ku Cameroon?

Stéphanie ngwendi: “Njashangumukile kubinja-binja na kwecela kulya byakulya bimo, oloni kuli bumbanda bwanjikwasele.” Alain na munakazi wendi banabezika mwafwa ya kutwalelelaho kukolesa. Alain ngwendi: “Simbu imo mutwakambulwililile mu limbo lya kulako libatumbula ngwabo Katé, twawanene banu babangi baje bashakele kulilongesa Mbimbiliya. Mu kwita kwa simbu, twashangumukile kulilongesa na bamo kupangesa foni. Banu babali batwakele na kulilongesa nabo babambwitikile, co kuje ku mutambela kwakele cibunga ca baka-kwambulula.” Stéphanie wendekele lalo ngwendi: “Twabwahelela manene ha kukwasa bakwetu bete ha kulikundika kuli Yehova na kubambwitika. Co kuno kutunakupangela tunakwasa banu babangi balinge ngoco.” Ha simbu ino Alain na Stéphanie bali mu cipangi ca kuzenguluka.

“TWALINGILE BYUMA BITWAPANDELE KULINGA”

Gisèle bamumbwitikile te ali ku sikola ya bandotolo ku Italy. Mwanja wa ndolome na munakazi wendi baje bakele na kumulongesa Mbimbiliya wamulingisile asinganyeke kulinga byabingi mu cipangi ca kwambulula. Ngeci, Gisèle washangumukile kulinga bupainiya te ali ku mamaneselelo a kosi yendi.

Gisèle washakele kwiluka ku Cameroon mangana akalinge byabingi mu munga ya Yehova, oloni walishoshomweneneko byuma bimo. Wendekele ngwendi: “Njapandele kusoneka mapapelo aje amwesele ngwawo njijaluka mu Italy, co njapandele kuseza babushoko bwange na babusamba bange baje bakala mu Italy.” Nameme ngoco Gisèle welukile ku Cameroon mu May 2016. Mu kwita kwa simbu balyambatele na Léonce, co baka-munango wa Cameroon babalombele ngwabo bajalukile mu mbonge ya Ayos kuje kwakele bujene bwa baka-kwambulula bya Bumwene.

Bakayoyele bati mu Ayos? Gisèle ngwendi: “Kakangi twakele na kukala kwa kujeneka malaiti mwafwa akele na kuya ha byalumingo byabingi, co kutwasele kucajiña mafoni etu. Ngeci, kutwakele na kuwapangesa ha bisimbu byabingi. Njalilongesele kwikila ha liko, co twakele na kuya ku lishali butsiki kukatekula mema na mawilimbala na bitaci mwafwa ha simbu eyi kwakele banu babandondo.” Bika byakwasele Léonce na Gisèle? Gisèle ngwendi: “Sipilitu ya Yehova yatukwasele, co lalo twakele na kulitakamesa umo na mukwabo. Bisimbu bimo babusamba betu na babushoko bwetu bakele na kututakamesa na kutwanako kambongo ka kulikwasesa.”

Kuma Gisèle nabwahelela omwo welukile kwimbo lyabo ndi? Wendekele ngwendi: “Eyo twabwahelela manene. Ha kulibanga twaliwanene na bukalu, co twashangumukile kuzeya. Oloni mu kwita kwa simbu twakolesele, co yange na muka-limbo lyange twalizibile ngwetu twalingile byuma bitwapandele kulinga. Twakulahela Yehova, co busamba bwetu nendi bunakanyama.” Léonce na Gisèle bakobelele Sikola ya Baka-kwambulula bya Bumwene, co ha simbu ino banapu bapainiya ba kulitila ba simbu yaindondo.

Ngwe mubakasimpila baka-kutsiya bisi mangana batsiye bisi babangi, baje bakeluka ku mafuti abo nabo bakalyana mangana bakwase baka-bimbunge byabibwa baje bashaka kutolilila ku muzimbu waubwa wa Bumwene. Twakulahela ngwetu Yehova ali na kwanuka aba baka-kwambulula mwafwa ya cizemo cibanamwesa ku lizina lyendi. (Nehe 5:19; Heve 6:10) Nga mwakala mu lifuti lyeka, co muziba ngweni mu lifuti lyeni muli bujene bwa baka-kwambulula bya Bumwene, kuma mwasa kwiluka ndi? Nga mulinga ngoco, co Yehova amibezikisa manene.—Visi 10:22.