Muzibuka Ndi?
Mwafwa bika banu baje kubapwile baIsalele nabo bapwile maswalale ba Mwene Devidi?
DEVIDI wakele na maswalale baje kubapwile baIsalele mu cibunga cendi ca maswalale. Aba bapwile Zeleke wa Kaamoni, Uliya wa Kahiti, na Itema wa ku Moabu.a (1 Mizi 11:39, 41, 46) Mu cibunga cendi mwakele lalo baKelete, na baPelete hamolika na baka-Gathi. (2 Samwe 15:18) BaKelete, na baPelete bapwile babushoko bwa baFilisitiya. (Ezeki 25:16) Baka-Gathi batundile mu Gathi ije yapwile nganda ya baFilisitiya.—Yosh 13:2, 3; 1 Samwe 6:17, 18.
Mwafwa bika Devidi watabesele banu beka kupwa maswalale bendi? Wazibukile ngwendi bapwile ba kulongwa kuli ikeye na kuli Yehova. Dikishinali imo ya Mbimbiliya ibatumbula ngwabo The New Interpreter yendekele hali baKelete, na baPelete ngwayo, “Bapwile ba kulongwa kuli Devidi ha simbu yaikalu manene mwakele na kuyula.” Balingile bati ngoco? ‘BaIsalele mubasezele’ Mwene Devidi na kukabangeya ‘Shemba munu wa bilinga byabibi,’ baKelete, na baPelete batwaleleleleho kulikwatasana na Devidi, co bakwasele mu kwecelesa kutengulukila kwa Shemba. (2 Samwe 20:1, 2, 7) Simbu imo, muna Mwene Devidi wa lizina lya Adonaija washakele kulipwisa mwene. Oloni baKelete, na baPelete batwaleleleleho kupwa ba kulongwa kuli Devidi, co bakwasele mu kuswanesa Solomoni ha litanda mwafwa ikeye mwene yangwile Yehova kwinga Mwene Devidi.—1 Vimye 1:24-27, 38, 39.
Munalume mukwabo wapwile wa kulongwa kuli Devidi nameme kapwile kaIsalele wapwile Itai wa ku Gathi. Itai na maswalale bendi ba kweta ku 600 bakwasele Mwene Devidi omwo Abisalomu muna Devidi watengulukilile ishe na kukokweya banu batengulukile Mwene Devidi. Devidi wanukisile Itai ngwendi ha kuwana ngwe kapwile kaIsalele, kapandele kumulwila. Oloni Itai wendekele ngwendi: ‘Shukulu, njilisinga kuli yobe mu lizina lya Yehova ngeci simbu yoshe njikaya hamo nobe kwoshe kuukaya, nameme kutsa, nameme kuyoya, ngamba yobe nalibwahesela kuya hamo nobe.’—2 Samwe 15:6, 18-21.
Itai wapwile wa kulongwa kuli Devidi, mwene yabwabesele Yehova
Nameme baKelete, na baPelete hamolika na baka-Gathi kubapwile baIsalele, banangukile ngwabo Yehova ikeye Njambi wa busunga, co bashakele kupangela hamo na Devidi yabwabesele Njambi kupwa mwene. Tukulahela ngwetu Devidi wakandelelele manene kupangela hamo na baje banalume ba kulongwa.
a Ngwe mubanendekela ku mukanda wa Kwituluka mu Mashiko 23:3-6, baAmoni na baMoabu kubabatabesele kulikwatasana na baIsalele. Oloni cisholoka ngwe eli lishiko lyatalesele ku banu baje bashakele kupwa baIsalele mpundu. Kulyabindikile banu baje kubapwile baIsalele kulikwatasana nambe kukala mukati ka banu ba Njambi. Taleni libulu lya Insight on the Scriptures, Volyumu 1, lipu 95.