Bihula bya Baka-Kutanda

Cipangi ca kwambulula cikahwa tangwalika?

Yesu wendekele ngwendi: “Ou muzimbu waubwa wa Bumwene bakawambulula hasi hoshe, mangana upwe bukaleho ku mafuti oshe asinoni mamaneselelo akaija.” (Mate 24:14) Lijwi lya Cigriki libananungulula ngwabo “mamaneselelo” omu mu vesi na mu vesi 6 na 13 lyapwa teʹlos. Eli lijwi, linatalesa ku mamaneselelo a kaye ka Satana ha nzita ya Amagidoni. (Kujo 16:14, 16) Oku kulumbununa ngwabo tutwalelelaho kwambulula muzimbu waubwa wa Bumwene kweta noho mamaneselelo akahwa simbu kanda Amagidoni ishangumuke. Oku kunatengulula mutwakele na kuzibisisila ha kulibanga.

Kunima, twakele na kuzibisisa ngwetu tukecela kwambulula muzimbu waubwa kayando kakama mukakashangumuka mubakanyongesa Babiloni Wakama. (Kujo 17:3, 5, 15, 16) Twakulahelele ngwetu kayando kakama mukakashangumuka, Yehova kakana banu simbu ya kutenguluka. (Isaya 61:2) Twakulahelele lalo ngwetu baje bakoboka kayando kakama banapu banu baje batwalelelaho kupangela Yehova mu kulongwa simbu kanda kayando kakama kashangumuke. Co twabesekesele kuli baJuda baje bobokele kunyonga kwa Jelusalema mu 607 B.C.E. Aba banu babakele cizibukiso ca kwoboka mwafwa balemesele Yehova na kuzinda byuma byabibi. (Ezeki 5:11; 9:4) Oloni oku kukulitombola na majwi a Yesu aje ali ku mukanda wa Mateu 24:14, aje amwesa ngwawo banu banasa kukakala na simbu ya kutenguluka ha simbu ya kayando kakama kweta na ku mamaneselelo simbu kanda Amagidoni ishangumuke.

Oku kuzibisisa kwakuha kwa mukanda wa Mateu 24:14, kutulingisa tutengulule lalo mutuli na kuzibisisila mukanda wa Kujombolola 16:21, uje wapolofwetele bya muzimbu wa nyonzi yakama ya mamanya. Munima ya kutondesesa manene tunawana ngwetu, ei mikanda inalikwatasana. Mu ngila muka? Cikumbululo cinemana ha ngila ibatambwilamo banu muzimbu waubwa wa Bumwene. Kapositolo Paulu wasonekele ngwendi, kuli “baje babali na kwobola,” ou muzimbu unapu waubwa wa “lwengo lwa kuyoya.” Oloni ku bitozi ba Njambi unapu muzimbu waubi wa “cuku ca kutsa.” (2 Kori 2:15, 16) Aba bitozi ba Njambi bazinda muzimbu wa Bumwene mwafwa uli na kumwesa ngwawo kaye kabazema kali na bubi, co bali na kukayula kuli Satana, ngeci ololo bakanyongesa.—Iwano 7:7; 1 Iwa 2:17; 5:19

Nangukeni lalo ngweni nyonzi yakama ya mamanya ibanendeka ku mukanda Kujombolola 16:21, ikapwa ‘yakama manene.’ Oku kunasa kulumbununa ngwabo ha simbu ya kayando kakama muzimbu utukambulula ukapwa wa kutewesa manene, co lizina lya Yehova bakalizibuka manene. (Ezeki 39:7) Ha simbu oyo, munima ya kunyongesa Babiloni wakama, kuma banu bamo bakatambula muzimbu ngecilika mwa lwengo lwa kutobala ndi? Eyo, byuma bya cifwoco binasa kukalingiwa. Hamo bakanuka nambe kulilongesa ngwabo ha myaka yaingi Bakaleho ba Yehova banakala na kwambulula ngwabo kunyonga kwa Babiloni Wakama kuli muyehi, co bakananguka ngwabo bali na kulimwena kulishulisilila kwebi byuma.

Ebi bikebyo byalingiwile kunima mu Ijipiti omwo Yehova watuminine baka-Ijipiti tushitiko 10. Yehova ‘mwasompele binjambi boshe ba Ijipiti,’ kwakele “mbunga ya banu ba kuliseza-seza” baje kubapwile baIsalele baje baile na baIsalele mu mambo. (Ekizo 12:12, 37, 38) Hamo ei mbunga ya banu yalyangwilile kuya na baIsalele mwafwa ya kumona tushitiko 10 twendekele Mosesa tulishulisilila.

Boshe baje bakatenguluka munima ya kunyonga kwa Babiloni Wakama, bakakala na simbu ya kukwasa nambe kukundwiya bandolome ba Kristu baje bacikakala hano hasi. (Mate 25:34-36, 40) Oloni simbu ya kubakula kupwa bimanga ikahwa simbu kanda nzita ya Amagidoni ishangumuke, omwo bakubwabesa boshe baje bacili hano hasi bakatambula cikandelela cabo ca kuya mwilu.

Oku kuzibisisa kwakuha kumwesa mwamubwa cizemo na kutetela kwa Yehova. Mwa busunga, Yehova “kashaka ngwendi kukanyonge nambe umo, oloni ashaka ngwendi boshe batenguluke.”—2 Pita 3:9.