Twabandamena Kwija kwa Alamagidoni

1-2. (a) Mwafwa bika twabandamena kwija kwa Alamagidoni? (b) Bihula muka bitusimutwiya muno mu cilongesa?

BANU bamo bamona ngwabo kaye bakakanyongesa ku mandunduma na bimbomba bya nyukiliya. Oloni Mbimbiliya kuyendekele ngoco. Inamwesa ngwayo ololo kukala nzita ije inena byuma byabibwa. Eyi nzita ikeyo Alamagidoni. Co biinendeka Mbimbiliya ha nzita eyi bituzibisa kubwaha. (Kujo 1:3) Nzita ya Alamagidoni kuikanyongesa banu boshe, oloni ikobola banu bamo. Ikabobola mu ngila muka?

² Mbimbiliya inamwesa ngwayo nzita ya Alamagidoni ikobola banu omwo ikanyongesa biyulo bya banu. Ikobola lalo banu omwo ikanyongesa banu bababi na kuseza baje bababwa. Co lalo ikobola banu omwo ikanyongesa baje bali na kubiisa kaye. (Kujo 11:18) Tusimutwiyeni ha bihula biwana mangana tuzibisise mwamubwa eyi ñanda. Alamagidoni yapwa ika? Bika bikalingiwa simbu kanda Alamagidoni ishangumuke? Bika bitunapande kulinga mangana tukoboke ha Alamagidoni? Twasa kupwa bati ba kulongwa omwo tubandamena Alamagidoni ije ili muyehi?

ALAMAGIDONI YAPWA IKA?

3. (a) Lijwi lya Alamagidoni lilumbununa bika? (b) Kwesekesa na Kujombolola 16:14, 16, bika bitwendekela ngwetu Alamagidoni keti mwela mpundu wa hano hasi?

³ Tandeni Kujombolola 16:14, 16. Lijwi lya Alamagidoni liwaniwa lumolika mu Mbimbiliya, co lyatunda ha lijwi lya Cihebelu lije lilumbununa “Munkinda wa Megido.” (Kujo 16:16; ftn. NWT) Megido yapwile nganda ya mu Isalele. (Yosh 17:11) Alamagidoni kuyapwile mwela mpundu wa hano hasi. Oloni inapu simbu ije ‘bimyene ba hano hasi’ bakalikungulula mu kulwisa Yehova. (Kujo 16:14) Muno mu cilongesa, tupangesa eli lijwi lya Alamagidoni kutalesa ku nzita ije ikaija omwo bimyene ba hano hasi bakalikungulwila hamo. Tuzibuka bati ngwetu Alamagidoni inapu mwela wa cifwisa lika? Ca kulibanga, munkinda wa Megido kuwakeleko. Ca mu cibali, mwela wa Megido unapu waundondo, ngeci ‘bimyene ba hano hasi hoshe’ kubasa kufwaho hamo lika na maswalale babo na bitwa byabo bya nzita. Ca mu citatu, ngwe mutumwena muno mu cilongesa, nzita ya Alamagidoni ikashangumuka omwo ‘bimyene ba hano hasi’ bakalwisa banu ba Njambi baje bali mu mitambela ya kulisezaseza.

4. Mwafwa bika Yehova naluku nzita yendi yakama kutunda ha lijwi lya Megido?

⁴ Mwafwa bika Yehova naluku nzita yendi yakama kutunda ha lijwi lya Megido? Ku Megido na ku cinema ca Njezelele bakele na kulwilako manene binzita. Ha bisimbu bimo, Yehova wakwasele banu bendi bahyane mu nzita. Cakumwenako, kuyehi na mema a ku Megido, Yehova wakwasele Mbaluke uje wapwile lyaako mu Isalele ahyane maswalale ba Bakanana baje babatwamenenene kuli Sisela. Mbaluke na Ndembola bashangazalele Yehova omwo wabakwasele bahyane mu nzita. Ngeci bembile ngwabo: “Co bingongonosi byalwile mwilu. . . byalwisile Sisela. Co libazi lya mu Kishone lyabakupwile.”​—Maako 5:19-21.

5. Nzita ya Alamagidoni inaliseze bati na nzita yalwile Mbaluke?

⁵ Mbaluke na Ndembola bamanesele kwimba mwaso wabo na majwi a kwendeka ngwawo: ‘Yehova bitozi bobe boshe bakatsa, oloni baje bakuzema bakabyazima ngwe misha ya kutuhuka kwa litangwa.’ (Maako 5:31) Mu ngila imo lika, ha Alamagidoni bitozi ba Njambi bakanyonga, oloni baje bazema Yehova bakoboka. Nzita yalwile Mbaluke inaliseze nei ya Alamagidoni. Banu ba Njambi kubakalu mu nzita ya Alamagidoni. Co kubakakala na bitwa bya nzita embwe. Oloni bakasimpa mwafwa ya kukulahela Yehova na mbunga yendi ya mwilu ya maswalale.​—Isaya 30:15; Kujo 19:11-15.

6. Yehova akanyongesa bati bitozi bendi ha Alamagidoni?

⁶ Njambi akanyongesa bati bitozi bendi ha Alamagidoni? Asa kupangesa bingila byabingi. Cakumwenako, asa kupangesa mandunduma, nyonzi ya mamanya na mihyato. (Yombi 38:22, 23; Ezeki 38:19-22) Asa kulingisa bitozi bendi balitengulukile bakebo babenya. (2 Mizi 20:17, 22, 23) Co lalo asa kupangesa tungelo mu kutsiya baka-bubi. (Isaya 37:36) Tuzibuka ngwetu Njambi akahyana mu ngila yoshe yoshe yakapangesa. Bitozi bendi boshe bakanyonga. Oloni banu bababwa boshe bakoboka.—Visi 3:25, 26.

BIKA BIKALINGIWA SIMBU KANDA ALAMAGIDONI ISHANGUMUKE?

7-8. (a) Kwesekesa na 1 Tesalonika 5:1-6, mutambi muka ubakatambeka baka-kuyula? (b) Bika bitwendekela ngwetu ou mutambi ukongumuna banu?

⁷ Simbu kanda ‘litangwa lya Yehova’ lije, bakatambeka ngwabo: “Byuma byoshe bili mwamubwa kunoloka kulu.” (Tandeni 1 Tesalonika 5:1-6.) Ku 1 Tesalonika 5:2, ‘litangwa lya Yehova’ limanena ñababa yakama. (Kujo 7:14) Tukazibuka bati ngwetu ñababa yakama ololo ishangumuka? Mbimbiliya yatuleka ngwayo kukakala mutambi uje kanda ucikaleko laja. Ukewo ukamwesa ngwawo ñababa yakama ishangumuka.

⁸ Ou mutambi banawendeka mu Mbimbiliya ngwabo: “Byuma byoshe bili mwamubwa kunoloka kulu.” Bika bikalingisa baka-kuyula bakatambeke ngoco? Kuma bantwama ba bulombelo bakalikwatasana hamo nabo ndi? Kutuzibuka mwamubwa. Oloni tuzibuka ngwetu ou mutambi wa makuli ukatunda ku bandemone. Co ukongumuna banu mwafwa bakasinganyeka ngwabo byuma byoshe bili mwamubwa oloni embwe. Ñababa yakama ikabawana, ikaija “bwasi bwasi ngwe mushongo hali munakazi ashaka kukita.” Batico bangamba ba Njambi ba kulongwa, bika bikalingiwa kuli bakebo? Basa kukakomoka kumona ñababa yakama ije ikaija mu kukasumuna, oloni kubakalijujukila mwafwa banalibwahesela.

9. Njambi akanyongesa bati kaye ka Satana?

⁹ Yehova kakanyongesa kaye ka Satana mu simbu imolika, ngwe mwalingile ha libazi lya Nowa. Oloni akanyongesa kaye ka Satana mu bisimbu bya kuliseza. Akalibanga kunyongesa Mbambilone Wakama uje napu bulombelo bwa makuli bwa mu kaye koshe. Kutundaho, akanyongesa bibunga bya bupolitiki, bya maswalale na baka-mingoso ha Alamagidoni. Tucisimutwiyeni mwakalingila ngoco.

10. Kwesekesa na Kujombolola 17:1, 6 na 18:24, Yehova akanyongesela bika Mbambilone Wakama?

¹⁰ ‘Kusompa cikwizi wakama.’ (Tandeni Kujombolola 17:1, 6; 18:24.) Mbambilone Wakama nalingisa banu babangi bajeneke kusingimika lizina lya Njambi. Co nalongesa makuli hali Njambi. Nalingi lalo bukwizi bwa ku sipilitu na baka-kuyula mwafwa nakundwiya biyulo byabo. Nayandesa banu bendi na kubanyanyamena byuma byabo. Co lalo netila maninga a banu babangi kwambateselela nawa a bangamba ba Njambi. (Kujo 19:2) Yehova akanyongesa bati Mbambilone Wakama?

11. “Cikashama wa kubenga” wapwa iya? Co Njambi akamupangesa bati mu kunyongesa Mbambilone Wakama?

¹¹ Yehova akapangesa “bimbinga likumi” bya “cikashama wa kubenga” mu kunyongesa cikwizi wakama. Uje cikashama emanena munga ya United Nations. Bimbinga likumi bimanena biyulo bya bupolitiki bije bili na kukundwiya eyi munga. Co bikalwisa Mbambilone Wakama ha simbu yanangula Njambi. Ebi biyulo ‘bikamubiisa na kumuseza mushelengwa’ ha kumunyeka bufuko bwendi bwoshe na kusholola bubi bwendi ku banu. (Kujo 17:3, 16) Mbambilone Wakama akanyonga bwasi bwasi, co kukasholoka ngwe nanyongo mu litangwa limo. Boshe baje balikwatasanene nendi bakalikomokela manene, mwafwa wakele na kulishasha ngwendi: “Njinatumbama ngwe nji [mwene]. Keti njifwile embwe, kunjikazibi busiwa.”​—Kujo 18:7, 8.

12. Yehova kakatabesa baka-mafuti kulinga bika, co mwafwa bika?

¹² Njambi kakatabesa baka-mafuti banyongese banu bendi. Mwafwa bika? Mwafwa banu ba Njambi bali na kubasanesa lizina lyendi, co banononoka lishiko lyendi lya kubaleka batunde kuli Mbambilone Wakama. (Vili 15:16, 17; Kujo 18:4) Co lalo banakwasa bakwabo batunde kuli Mbambilone Wakama. Ngeci bangamba ba Yehova ‘kubakatambulako ku cihiso cendi.’ Oloni banapande kukakala na likulahelo lya kukanyama mwafwa ya byuma bikalingiwa.

13. (a) Ngonge wapwa iya? (b) Kwesekesa na Ezekiyele 38:2, 8, 9, bika bikalingisa Ngonge alwise banu ba Njambi?

¹³ Kutulwisa kuli Ngonge. (Tandeni Ezekiyele 38:2, 8, 9.) Mubakanyongesa bulombelo bwoshe bwa makuli, banu ba Njambi bakasala ngwe muti umolika uje unoboka ku libazi lyakama. Satana akalubala manene. Akasholola kulubala kwendi omwo akapangesa majwi a kujwala. Awa majwi a makuli akatunda ku bandemone, co akalingisa cibunga ca baka-mafuti cilwise banu ba Yehova. (Kujo 16:13, 14) Eci cibunga ca baka-mafuti cinapu ‘Ngonge wa mu lifuti lya Mangonge.’ Baka-mafuti mubakalwisa banu ba Yehova, co Alamagidoni ikashangumuka.​—Kujo 16:16.

14. Bika byakananguka Ngonge?

¹⁴ Ngonge akakulahela ‘nzili yendi ya bunu,’ kulumbununa maswalale bendi. (2 Mizi 32:8) Yetu tukakulahela Yehova Njambi yetu, oloni baka-mafuti bakatumona bulema. Mwafwa bika? Mwafwa bakasinganyeka ngwabo Njambi kasa kutunyungilila, ngwe omwo binjambi kubasele kwobola Mbambilone Wakama omwo banamunyongesele ku “cikashama” na ku “bimbinga likumi.” (Kujo 17:16) Ngeci, Ngonge akamona ngwendi kwakwasi manene kutunyongesa. Akalwisa banu ba Yehova ngwe muje ‘mashelwa afwika lifuti.’ (Ezeki 38:16) Oloni Ngonge akananguka ngwendi nalikobelesa mu bukalu bwakama. Akananguka ngwendi ali na kulwisa Yehova ngwe muje mwanangukile Falo ha Kalunga-ndonga wa Kubenga.​—Kutu 14:1-4; Ezeki 38:3, 4, 18, 21-23.

15. Bika byakalinga Yesu ha nzita ya Alamagidoni?

¹⁵ Kilistu na mbunga yendi ya maswalale ba mwilu bakanyungilila banu ba Njambi na kunyongesa Ngonge na maswalale bendi. (Kujo 19:11, 14, 15) Co bika bikalingiwa kuli Satana, citozi ca Yehova, uje nakwisi baka-mafuti ngeci balwise banu ba Njambi ha nzita ya Alamagidoni? Yesu akombila Satana na bandemone bendi mu mbulu ya kujeneka masima, co akabapatelamo ha myaka 1000.​—Kujo 20:1-3.

BIKA BIMUNAPANDE KULINGA MANGANA MUKOBOKE HA ALAMAGIDONI?

16. (a) Tumwesa bati ngwetu tuzibuka Njambi? (b) Kuzibuka Yehova kukatukwasa bati ha Alamagidoni?

¹⁶ Nga twashwile laja kupangela Yehova nambe twaputuka ololo, tunapande kuzibuka Njambi na “kwononoka biñanda byabibwa bya Mwene yetu Yesu” asina tukoboka ha Alamagidoni. (2 Tesa 1:7-9) Tumwesa ngwetu tuzibuka Njambi nga tuzibuka mashiko endi na byuma byazema nebi byazinda. Tumwesa lalo ngwetu tuzibuka Njambi nga tumuzema na kumwononoka na kulemesa ikeye lika. (1 Yowa 2:3-5; 5:3) Nga tuzibuka Njambi, co ‘nendi atuzibuka.’ Oku kutulingisa tukoboke ha Alamagidoni. (1 Koli 8:3) Bika bitwendekela ngoco? Mwafwa nga Njambi natuzibuka, co kulumbununa ngwabo tuli na kumuzibisa kubwaha.

17. “Kwononoka biñanda byabibwa bya Mwene yetu Yesu” kulumbununa bika?

¹⁷ “Biñanda byabibwa bya Mwene yetu Yesu” binambateselela busunga bwoshe bwalongesele Yesu buje buli mu Mbimbiliya. Twononoka biñanda byabibwa nga tubipangesa mu kuyoya kwetu. Oku kwononoka kunambateselela kutwameka Bumwene bwa Njambi mu kuyoya kwetu na kuyoya mu kulitombola na mashiko a Njambi na kwambulula bya Bumwene bwendi. (Mateo 6:33; 24:14) Tunapande lalo kukwasa bishongo ba Kilistu ba kubwabesa omwo bapanga cipangi cabo cakama.​—Mateo 25:31-40.

18. Baka-Kilistu ba kubwabesa bakamwesa bati kukandelela ku ngozi ibabamwesele bimanga beka?

¹⁸ Bangamba ba Njambi ba kubwabesa ololo bamwesa kukandelela ku ngozi ibabamwesele “bimanga beka” ha kubakwasa mu cipangi cabo. (Yowa 10:16) Bakalinga bati ngoco? Nzita ya Alamagidoni muikashangumuka, baka-Kilistu ba kubwabesa ba kupwa 144,000 co boshe banai mwilu na kupwa banu ba ku sipilitu baje bali na mibila ya kujeneka kutsa. Aba bakubwabesa bakalikumbasana na mbunga ya mwilu ya maswalale, co bakatika Ngonge na kunyungilila “mbunga yakama” ya banu ba Yehova. (Kujo 2:26, 27; 7:9, 10) Mbunga yakama ikabwahelela manene mwafwa yakwasele bangamba ba Yehova bakubwabesa ha simbu ibakele hano hasi.

TWASA KUPWA BATI BA KULONGWA OMWO KUKOTOKA KWA KAYE KULI MUYEHI?

19-20. Nameme tuliwana na bukalu, twasa kupwa bati ba kulongwa omwo tubandamena Alamagidoni ije ili muyehi?

¹⁹ Muno mu matangwa a kukotoka, bangamba ba Yehova bali na kulifwita na bukalu bwabwingi. Nameme ngoco, twasa kukolesa na kupwa ba kubwahelela. (Yako 1:2-4) Cuma citukwasa cinapu kulombela simbu yoshe. (Luka 21:36) Kutwapandele kulombela lika, oloni tunapande kwambulula na nzili, kutanda Mbimbiliya ha litangwa na litangwa na ku singanyekesesa, maneneni kutanda bupolofweto buje bumwesa byuma bili hayehi na kulishulisilila. (Myaso 77:12) Nga tulinga ngoco, co likulahelo lyetu likanyama.

²⁰ Tukabwahelela manene omwo bakanyongesa Mbambilone Wakama, nomu muikahwa Alamagidoni. Tukabwahelela lalo omwo banu boshe bakasingimika lizina lya Njambi na kwononoka ciyulo cendi. (Ezeki 38:23) Baje bazibuka Njambi na baje bali na kwononoka Munendi na baje bali na kukolesa mu bukalu, boshe banabandamena kwija kwa Alamagidoni.​—Mateo 24:13.