Mukapanga Ngwe Lime Ndi?

Chipangi chetu chapwa cha theho manene. Oloni vanu vamo kuvachimwene ngocho. Nameme vanu vashaka kuthzivuka viyendeka Mbimbiliya, oloni vakathinganyeka ngwavo kukwethi theho ya kulilongetha netu Lijwi lya Njambi.

Va Gavin vanapu chakumwenako. Vakele na kuya ku Njuvo ya Vumwene thimbu yoshe, oloni kuvashakele kuvendethela chilongetha cha Mbimbiliya. Va Gavin ngwavo kuvathzivukile mwamuvwa Mbimbiliya, ngechi kuvashakele ngwavo vanu vathzivuke ngocho. Vatewele ngwavo mpamo vavaleka valikwatathane netu, cho vakevo kuvashakele kuvongumuna. Muthinganyeka vati? Kukwatha Gavin kwapwile kwakwathi ndi? Thinganyekeni omwo vilongetha vya Mbimbiliya vyatha kukwathelamo munu? Yehova walekele vaIsalele ngwendi: “Majwi ange apwe ngwe nyondthzi ije isukulwila ha vimbuto vya njovolwethzi.” (Kwituluka mu Mashiko 32:2) Tuthimutwiyeni ha lime na kulyetheketha ku chipangi chetu mangana tumone mutwatha kukwathela “vanu voshe.”—1 Timateo 2:3, 4.

CHIPANGI CHETU CHALIFWA VATI NA LIME?

Lime likatonola. Mbundu ya mwilu muikasulwila ha vimbuto, ikeyo ikapu lime cho likandweke. Majwi a Yehova apwile vati “ngwe nyothzi” ije isukulwila ha vimbuto? Wathimutwiyiye na vanu vendi mu ngothzi na mema ku mbunge. Twatha kumutembwinina nga tuthingimika vivakulahela vanu. Tukavakwatha lika kuthzivithitha mwamuvwa mangana vakevo vavenya valyangwile vya kulinga. Nga tuthingimika vanu mu ngila eyi, cho vashuvuluka kutambula muthzimbu, na chipangi chetu cha kwambulula chitwendela mwamuvwa.

Lime likakanyametha Vimbuto. Chipangi chetu cha kwambulula chithzembeleka vanu nga twetheka vingila vya kulithethza thethza mu kuvalongetha vuthunga. Ndolome Chris uje washakele kushangumuka kulilongetha Mbimbiliya na va Gavin, kavathindiyiye. Wethekele vingila vya kulithethza thethza vyakuvalingitha vashake kulilongetha Mbimbiliya. Ndolome Chris walekele va Gavin ngwendi mu Mbimbiliya mwakala muthzimbu wa theho manene, cho kuthzivuka owo muthzimbu kuvakwatha vathzivithithe mwamuvwa ku viwano. Ndolome Chris wendekele ngwendi vupolofweto vwa mu Mbimbiliya vunamukwatha atave ngwendi Mbimbiliya yapwa ya vuthunga. Omwo wendekele ngocho, vathimutwiyiye ha vupofweto vwavungi vunalishulithilila. Kuthimutwiya chavo chathzivithile va Gavin kuvwaha, ngechi vatavele kuvalongetha Mbimbiliya.

Lime likana mwonyo. Mu Isalele, nyondthzi kuyakele na kunyoka ha vingonde vyavingi vya ntondwe. Omwo kukwakele lime, vimbuto vyakele na kuma. Yehova wendekele ngwendi mu matangwa etu, kukapwa lika ngwe kuli lilanga, kulumbununa ngwavo vanu vakakala na lihwila lya “lijwi lya Shukulu Kalunga.” (Amose 8:11) Wakulahethele ngwendi vanu va kuvwavetha vakapwa “ngwe lime lya kutunda kuli Shukulu Kalunga” omwo vambulula muthzimbu wauvwa wa Vunwene, mu kuvakwatha kuli “vimanga veka.” (Mika 5:7; Yowano 10:16) Muthzimbu utukambulula, nawo unapu ngila imo yali na kupangetha Yehova mu kwana vuyoye kuli vaje vali na lihwila lya kushaka kuthzivuka vuthunga. Twamona ou muthzimbu kupwa wa theho ndi?

Lime lyapwa vwana vwa kutunda kuli Yehova. (Kwituluka mu Mashiko 33:13) Chipangi chetu cha kwambulula chinatha kupwa vwana kuli vaje vatambula muthzimbu. Chilongetha cha Mbimbiliya chapwile vwana kuli Gavin, mwafwa chamukwathele kuwana vikumbululo ku vihula vyoshe vyakele navyo. Wakolele vwathi ku sipilitu, cho vamumbwitikile. Matangwa ano ali na kulikuwa kwambulula muthzimbu wauvwa hamo lika na munakathzi wendi, Joyce.

MONENI CHIPANGI CHENI KUPWA CHA THEHO

Kwetheketha chipangi chetu cha kwambulula ku lime, kutukwatha lalo tumone ngwetu kulifwita kwa munu na munu mu lihya kethi kwa ngocho. Mu ngila muka? Limbathe limo lika lya mema kulyatha kujulitha, oloni mambathe amangi ajulitha livu. Mu ngila imo lika, tunatha kumona ngwetu vyakapanga munu umo lika mu lihya kuvyethi na theho. Oloni kulifwita kwa munu umo hamo lika na vangamba va Yehova vavangi, kulingitha vukaleho vwete “ku miyati yoshe.” (Mateo 24:14) Chipangi chetu cha kwambulula chipwa vwana vwa Yehova kuli vakwetu ndi? Eyo, muthzimbu wetu upwa ngwe lime lije likatonola na kukanyametha na kwana mwonyo.