Bikumbululo ku Bihula bya Kukundama ku Mbimbiliya / Njambi / Bika Biyendeka Mbimbiliya ha Nzili ya Kulyangwila bya Kulinga? Kuma Njambi Ikeye Akabwahesa Byuma Bikalingiwa mu Kuyoya Kweni Ndi?
Biyendeka Mbimbiliya
Njambi natusingimika ha kutwana nzili ya kulyangwila bya kulinga, keti ikeye akatwangwila bya kulinga. Tucisimutwiyeni ha byuma biyendeka Mbimbiliya.
Njambi watangele banu mu cifwa cendi. (Genese 1:26) Twaliseze na tusitu baje bakalilingila lika byuma, oloni yetu twakala na bifwa byakala nabyo Ishamatanga yetu bya kufwa ngwe cizemo na kusompa mu kusungama. Co mu kulifwa na Ishamatanga yetu, tuli na nzili ya kulyangwila bya kulinga.
Twasa kwangula mubukafwila buyoye bwetu kulutwe. Mbimbiliya itushongangeya ‘twangule kutolilila ku lijwi lya Njambi,’ kulumbununa kwangula kwononoka mashiko endi. (Detronoma 30:19, 20) Kutwasa kulinga ngoco mona kutwesi na nzili ya kulyangwila bya kulinga. Njambi kesi na kutusindiya tulinge byatonda, oloni ali na kutuleka ngwendi: “Nga mutolilila mwamubwa ku mashiko ange, kwoloka kweni kupwa ngwe ndonga.”—Isaya 48:18.
Tunapande kupanga na nzili mangana tuwane bitutonda. Mbimbiliya ngwayo: “Byoshe biunapande kupanga na maboko obe, bipange na nzili yobe yoshe.”(Ekelesiya 9:10) Inendeka lalo ngwayo: “Matumbe a muka-kupanga na nzili abwaha.”—Provebia 21:5.
Nzili ya kulyangila bitutonda yapwa bwana bwa kutunda kuli Njambi mwafwa ikatulingisa tuzeme Njambi kutundilila kwisi ya mbunge keti mu kutusindiya.—Mateu 22:37.
Kuma Njambi ikeye ali na kwendesa byuma byoshe ndi?
Mbimbiliya ngwayo Njambi wapwa Muka-nzili Yoshe, co asa kulinga byoshe-byoshe byashaka. (Yombi 37:23; Isaya 40:26) Nameme ngoco, kekupangesa nzili yendi mu kwendesa byuma byoshe. Cakumwenako, Mbimbiliya ngwayo Njambi ‘wakwatele mbunge’ mangana keti anyongese ba Babiloni ba kusañulu baje bapwile bitozi ba banu bendi. (Isaya 42:14) Na ano matangwa, Njambi necelela banu bali na kupangesa mwamubi nzili yabo ya kulyangwila bya kulinga mangana balinge bakwabo mwamubi. Oloni ololo alingako bimo.—Bisamu 37:10, 11.