Bikumbululo ku Bihula bya Kukundama ku Mbimbiliya / Kutsa na Kuyoya / Mwasa Kuhyana Bati Lyoba lya Kutewa Kutsa?

Biyendeka Mbimbiliya

Tukatewe kutsa mwafwa capwa citozi, co tukalifwiti kunyungilila kuyoya kwetu. (1 Korinte 15:26) Nameme ngoco, lyoba lya kutubakanesa lya kutewa kutsa lije linemana ha biñanda bya makuli lili na kulingisa banu bapwe “[bindungo] mu kuyoya kwabo kwoshe.” (Bahebelu 2:15) Kuzibuka busunga ha kutsa kumikwasa mujeneke kuziba manene lyoba lije limilingisa mwonowe kulikuwa kuyoya.—Iwano 8:32.

Busunga ha ñanda ya kutsa

• Batsi na cimo cibazibuka cahi. (Bisamu 146:4) Kumwapandele kulishoshomwena ngweni mukaziba kubabala nga munatsi nambe kuyanda mwafwa Mbimbiliya inesekesa kutsa ku kulala tulo.—Bisamu 13:3; Iwano 11:11-14.

• Batsi kubasa kutubulumuna. Nameme bitozi betu baje bakele na kutulwisa kubasa kukala na nzili munima ya kutsa. (Provebia 21:16) Mbimbiliya ngwayo “cizindo cabo na cipululu cabo binanyongo.”—Ekelesiya 9:6.

• Nga tunatsi kukulumbununa ngwabo byetu binahwila bene oho. Njambi akasangula banu baje banatsi.—Iwano 5:28, 29; Bilinga 24:15.

• Njambi nakulahesa ngwendi “kutsa kucikakalako.” (Kujombolola 21:4) Mbimbiliya ngwayo ha simbu oyo, “Banu ba kusungama bakaswana lifuti-libu, co bakakalamo myaka yoshe.” Kubakazibi lalo lyoba lya kutewa kutsa.—Bisamu 37:29.