10 Kulongwa

KULUMBUNUNA VIKA?

Vana va kulongwa vavakulahela vithemi na vavuthamba na vakulunu vavo va vipangi. Ava vana vakakavangeya mashiko na kushulithilila vyuma vivakakulahetha, cho vakendeka vuthunga thimbu yoshe.

VIKWAPWILA KWA THEHO

Vanu vatha kumikulahela nga mukalingi vyuma mu vuthunga thimbu yoshe.

Sarahi ngwendi: “Nga mushaka ngweni vithemi veni vamikulahele, munapande kumwetha ngweni munakolo mu kupanga vyuma nameme vahiko.”

CHINANGULO CHA MU MBIMBILIYA: “Lyethekeni yeni vavenya na kulilula.”—2 Kolinte 13:5.

VIMWATHA KULINGA

Nga mushaka ngweni vanu vatwaleleleho kumikulahela nambe vashangumuke kumikulahela, cho lingeni evi vinatako.

Endekeni vuthunga. Vakweni kuvatha kumikulahela nga mukendeka makuli. Oloni nga mwendeka vuthunga nambe ha vyuma vyavivi vimunalingile, cho vamikulahela.

Caiman ngwendi: “Kwakwathi kupwa wa kulongwa, nga vyuma vili mwamuvwa. Oloni kwendeka vuthunga nambe ha vyuma vije vikuviyitha lithzina, cho vanu vakukulahela manene.

CHINANGULO CHA MU MBIMBILIYA: “Tushaka kulinga chuma cha vuthunga thimbu yoshe.”—Vahevelu 13:18.

Kaleni na lithzina lyalivwa. Muthzimbu umo wa ku America umwetha ngwawo nga vavenya kampani vashaka kukoveletha vanu vipangi vakatondo vanu vaje vali na lithzina lyalivwa. Kukala na lithzina lyalivwa nga munu achili mwanike, kukamukwatha omwo akola.

Sarah ngwendi: “Vithemi vange vathzivuka ngwavo njikapanga vipangi yange vavenya nameme kuvanjanukithile. Kulyanukila kupanga vipangi kukavalingitha vanjikulahele.”

CHINANGULO CHA MU MBIMBILIYA: “Njinakulahela, . . . ngwange ukalinga vyavingi kutuvakana evi njinakulombo.”—Filimoni 21.

Pweni va kuthimpa. Kwakwathi kunanguka ngweni munu ali na kukola ku muvila, oloni kwakukalu kuthzivuka ngweni munu ali na kukola mu vithinganyeka. Ngechi, munapande kupwa va kuthimpa.

Brandon ngwendi: “Kukambata thimbu na kulifwita mangana vithemi veni na vanu veka vamikulahele. Oloni vatha kumikulahela nga mutwalelelaho kulinga vyuma vyavivwa.”

CHINANGULO CHA MU MBIMBILIYA: ‘Thzaleni . . . likakateya.’—Kolose 3:12.