9 Chifwa

CHILUMBUNUNA VIKA?

Chifwa cheni chilumbununa vyavingi kethi lika lithzina nambe sholwethi yeni. Chinambatethelela na vilinga na vyuma vimwakulahela na futithi yeni. Chifwa cheni chikecho chithzivukilo cheni chivamithzivuka nacho vanu.

VIKWAPWILA KWA THEHO

Nga muthzivuka chifwa cheni mwamuvwa, kumutavetha vakweni vamyendethe, oloni mwimanena vyuma vimwakulahela.

Adrian ngwendi: “Vanu vavangi vafwa ngwe vidoli vije vitukamono mu mashopu. Kuvyethi kulyangwila vya kuthzala kuvanga kuvithzika.”

Courtney ngwendi: “Njinalilongetha kwimanena vyuma vyavivwa nameme vinakaluwa. Njikathzivuka ngwange ou kavuthamba wamuvwa ha kumona mwanjambatelemo.”

CHINANGULO CHA MU MBIMBILIYA: “Kethi mulipwithe ngwe vanu va muno mu kaye, oloni echeleni Njambi atengulule viyongola vyeni.”—Loma 12:2.

VIMWATHA KULINGA

Thzivukeni hayalenga ndthzili yeni na kuthzivuka vuthzeye vweni na vyuma vimwakulahela. Mwatha kulithzivuka mwamuvwa nga mulihula evi vihula.

Ndthzili: Vwana muka vunjakala navwo, cho vika vinjilyathela? Vyuma muka vinjikalingi mwamuvwa? (Chakumwenako: Njikanyungu thimbu ndi? Njakala na mbunge ya kulivindika ndi? Njikapanga na ndthzili ndi? Njapwa muka-kwana ndi?) Vyuma muka vyavivwa vinjikalingi?

LINGENI EVI: Kukamikaluwila kwanuka vyuma vya theho vimunalingi nambe vimunendeka ndi? Ihuleni vithemi veni nambe kavuthamba keni imwakulahela amileke vyuma vyavivwa vyakamono kuli yeni. Cho vika endekela ngocho?

CHINANGULO CHA MU MBIMBILIYA: “Cho umo na umo athompe futithi yendi vavenya. Nga ikeyo inapu yaivwa, athinoni alyalethe ha vije vyanalingi, kujeneka kuvitheteka na vije vyanalingi munu weka.”—Ngalatiya 6:4.

Vuthzeye: Vuthzeye muka vunjakala navwo vunjinapande kupangelaho? Ha vithimbu muka hanjikalithzivi kukala mu chetheko cha kulinga vuvi? Mu vingila muka munjinapande kulinyunga manene?

CHINANGULO CHA MU MBIMBILIYA: “Nga twendeka ngwetu kutwethi na vuvi, tuli na kulikwitha yetu vavenya.”—1 Yowano 1:8.

Vimwakulahela: Mashiko muka anjikakavangeya, cho mwafwa vika? Njakulahela Njambi ndi? Vika vyanjilingitha njitave ngwangwe chili vene Njambi kwali? Vilinga muka vinjikamono ngwange vyavivi, cho mwafwa vika? Vyuma muka vinjakulahela ngwange vikalingiwa kulutwe?

CHINANGULO CHA MU MBIMBILIYA: “Kuthzivuka kwove na kuthzivithitha kwove vikakunyunga.”—Vithimo 2:11.