Makina Asa Kunena Bukalu Muka Mukati Keni Na babusamba Beni?
Makina ali na kukwasa banu balitumine tumizimbu nambe kusimutwiya oku bali na kulimona, nameme ou ali ku lifuti lyeka, ou ali ku lifuti lyeka. Bamo bali na kulikwasesa makina mu ngila yaibwa.
Oloni baje balinga busamba bwabo bwemana lika ha makina . . .
kubesi kuzibila manene babusamba babo mema ku mbunge.
bakazibi manene buli na kuliziba ngwe bangoco.
bakaka manene mbunge ku byabo kesi ku bya bakwabo.
BIMUNAPANDE KUZIBUKA
MEMA KU MBUNGE
Nga tushaka kuzibisisa mwamubwa mubali na kulizibila bakwetu, tunapande kuwana simbu ya kusinganyekesesa ha byuma bibali na kuliwana nabyo. Oloni kulinga ngoco keti kwakwasi nga tunazezama kulitumina tumizimbu na kutanda mizimbu ya ha intaneti.
Nga munu natambula tumizimbu twatwingi manene, kukumbulula tumizimbu twa babusamba bendi kunasa kumoneka ngwe citele. Nga munu atambula tumizimbu twatwingi, cilengo cendi cipwa lika ca kutanda bwasi-bwasi tumizimbu tubanamutumina, co hamo kasa kumona na kumona indi kuli kabusamba kendi atonda bukwasi.
BYAKUSINGANYEKESESA: Twasa kumwesa bati ngozi nambe mema ku mbunge omwo tupangesa makina mu kusimutwiya na bakwetu?—1 PETULU 3:8.
KULIZIBA KUPWA WANGOCO
Baka-kutondesesa bamo banawana ngwabo banu babangi kubesi kupwa ba kubwahelela munima ya kulitumina tumizimbu, kukenga bikupulo na bikwabo ha intaneti. Co lalo aba baka-kutondesesa ngwabo kulinga ngoco kunasa kulingisa munu alizibe ngwe byahi byanalingi.
Kutundaho, kukenga bikupulo ha intaneti kunasa kulingisa bamo balyesekese ku bakwabo na kuliziba ngwe bangoco. Kulinga ngoco kunasa kulingisa banu bamo balizibe ngwabo bakwabo bali na kulikuwa kuyoya.
BYAKUSINGANYEKESESA: Mwafwa bika kutwapandele kulyesekesa ku bakwetu nga tupangesa intaneti?—NGALATIYA 6:4.
KWAKA LIKA MBUNGE KU BYETU
Mulongesi umo wanangukile ngwendi bana ba sikola bamo bakaka lika mbunge ku byabo, co bakashaka lika babusamba baje babalingila bibatonda. Busamba bwa cifwa oco bunemana lika ha byuma byashaka munu. Munu nasa kumona babusamba bendi ngwe makina aje alinga asa kuwashoka simbu yoshe-yoshe nambe kuwashukumisa ha simbu yashaka kuwapangesa.
BYAKUSINGANYEKESESA: Kuma binjikaka ha intaneti bimwesa ngwabyo njashaka kuhyana bakwetu nambe kwaka mbunge ku byange lika ndi?—NGALATIYA 5:26.
BIMWASA KULINGA
ILULENI MUMULI NA KUPANGESELA MAKINA
Nga mupangesa mwamubwa makina, co amikwasa mukanyamese busamba bweni na bakweni.
CINANGULO CA MU MBIMBILIYA: “Cizemo kucesi kulitondela byaco cikeco babenya.”—1 KOLINTE 13:4, 5.
Fundikeni hamunapande kupangela, nambe kusoneka bimunayongola kulinga.
Kusimutwiya na banu kutubakana kubasonekela lika tumizimbu
Kwaka likina lyeni kumukulo nambe kutepulula ku cilumo omwo musimutwiya na bakweni
Kutepulula ku simbu imukakenge byuma ha intaneti
Kupwa muka-kutolilila wamubwa
Kutuminako kabusamba keni ali mu bukalu