Kuzibuka Indi Kwakala Ishamatanga Kunapu Bati kwa Seho?
Mwafwa bika kunapu kwa seho kuzibuka indi kwakala Ishamatanga? Nga bukaleho butunasimutwiya bunamilingisa mukulahele ngweni Njambi muka-nzili yoshe kwakala, co hamo mushaka kuwana bukaleho bumwesa ngwabwo Mbimbiliya yatunda kuli ikeye. Kukulahela biyendeka Mbimbiliya kumikwasa mu bingila binatako.
Kumilingisa mupwe ba kubwahelela
MBIMBILIYA NGWAYO: ‘Njambi akalingi byuma byabibwa, co akamyana nyonzi ya kutunda mwilu na bimbuto ha simbu yaibwa. Akamyana byakulya na kushulisa bimbunge byeni na kubwahelela.’—Vilinga 14:17.
BIWALUMBUNUNA AWA MAJWI: Byuma byoshe bituli na kulikuwa binapu bwana bwa kutunda kuli Ishamatanga. Kuzibuka ngweni Ishamatanga uje namyana obu bwana wamyaka mbunge, kumilingisa mukandelele manene kuli ikeye.
Muwana binangulo bije bimikwasa
MBIMBILIYA NGWAYO: “Ukazibuka byuma byabibwa mu ngila yaibwa ya kusungama. Ukazibuka bije unapande kulinga.”—Visimo 2:9.
BIWALUMBUNUNA AWA MAJWI: Ha kupwa Ishamatanga yeni, Njambi azibuka byuma bimilingisa mupwe ba kubwahelela. Kutanda Mbimbiliya kumikwasa muwane binangulo bije bimikwasa mu kuyoya kweni.
Muwana bikumbululo ku bihula bimuli nabyo
MBIMBILIYA NGWAYO: “Ukawana mana a kuzibuka Njambi.”—Visimo 2:5.
BIWALUMBUNUNA AWA MAJWI: Kuzibuka ngweni Ishamatanga kwakala kumikwasa muwane bikumbululo ku bihula bya seho bimunasa kukala nabyo bya kufwa ngwe: Bika bituli na kuyoyela? Mwafwa bika tuyando tunatumu? Bika bikalingiwa ku munu nga natsi? Mwasa kuwana bikumbululo bya busunga mu Mbimbiliya.
Mukala na lilabelelo
MBIMBILIYA NGWAYO: ‘Yange lika njazibuka matumbe njilinawo hali yeni, matumbe a kuminenela bibezikiso, kesi a kuminenela tuyando twakama embwe, matumbe a kuyoya kulutwe kuje kunashulu na lilabelelo.’—Njelemiya 29:11.
BIWALUMBUNUNA AWA MAJWI: Njambi nakulahesa ngwendi kulutwe akamanesa bubi na tuyando na kutsa. Nga mukulahela bikulaheso bya Njambi, co lilabelelo lyeni limikwasa mukolese na kupwa ba kusimpa omwo muliwana na bukalu.