CILONGESA 02

Mbimbiliya Imikwasa Mulabelele Byuma Bija Kulutwe

Libulu lya Kupulinta

Banu mu kaye bali na kuliwana na bukalu bwa kuliseza-seza buje buli na kubanenela bishoti, nambe kubayandesa na kubonowesa kupwa ba kubwahelela. Neni munaliwana na bukalu buje bwaminenela bishoti ndi? Hamo muli na kubinja mushongo umo, indi hamo kuli kabusamba nambe kabushoko keni uje natoko. Ngeci, munasa kulihula ngweni, ‘Kuma kuli simbu itukakala kwa kujeneka bukalu ndi?’ Mbimbiliya inakumbulula mwamubwa oco cihula.

1. Byuma biinatukulahesa Mbimbiliya bitukwasa bati?

Mbimbiliya inendeka byuma bili na kunena tuyando mu kaye. Oloni inendeka lalo ngwayo byuma byabibi bibali na kuliwana nabyo banu binapu bya simbu yaindondo lika, co ololo bihwa. Byuma byanatukulahesa Njambi “kulutwe” bitukwasa tukale na lilabelelo. (Tandeni Njelemiya 29:11, 12.) Bitukwasa lalo tukolese omwo tuliwana na bukalu. Co lalo bitukwasa tumone byuma mu ngila yaibwa na kupwa ba kubwahelela myaka yoshe.

2. Bikulaheso muka bili mu Mbimbiliya?

Mbimbiliya ngwayo kulutwe “kukukakala kutsa nambe busiwa nambe kulila nambe kukemanga.” (Tandeni Kujombolola 21:4.) Byuma bya kufwa ngwe buhutu, bilinga bya kuhenga, kubinja na kutsa, kubikakalako lalo. Ebi byuma bikebyo bili na kulingisa buyoye bumoneke kukaluwa ano matangwa. Mbimbiliya ngwayo banu bakalikuwa kuyoya myaka yoshe mu Paradaisi hano hasi.

3. Bika bimilingisa mukulahele ngweni byuma biinendeka Mbimbiliya bikalingiwa?

Kuli byuma bimo bibakakulahela banu ngwabo bilingiwa, oloni kukapwa muje obyo byuma kubilingiwa. Oloni biinendeka Mbimbiliya bikalishulisilila bene. Nga ‘tulilongesa Bisoneka,’ co tukulahela manene biinendeka Mbimbiliya. (Vilinga 17:11) Omwo mulilongesa Mbimbiliya, yeni babenya mulimwena ngweni byuma biinendeka bikalishulisilila.

TONDESESENI

Byuma muka biinendeka Mbimbiliya bije bikalingiwa kulutwe? Kuzibuka ebi byuma kuli na kukwasa bati banu ano matangwa?

Bikupulo: Bikupulo bimwesa byuma bili na kulingiwa ano matangwa nomu mubikafwila kulutwe ngwe muimwesela Mbimbiliya. Banabilukila-ilukila.

4. Mbimbiliya ngwayo byuma byoshe bikakala mwamubwa, co banu bakayoya myaka yoshe

Mbimbiliya inamwesa ngwayo byuma bili mwisi bikalingiwa kulutwe. Bili bimushaka manene kukamona? Mwafwa bika?

Tandeni cisoneka na cisoneka cili mwisi na kusimutwiya ha bihula binatako:

Eci cisoneka cimitakamesa bati? Casa kutakamesa bati baka-naanga yeni nambe babusamba beni?

MU KAYE KAKAHA NAUMO WAHI . . .	MU KAYE KAKAHA BANU BOSHE . . .
akaziba kubabala, akakulubala nambe kutsa.—Isaya 25:8.	bakamona babusamba na babushoko bwabo mubakasanguka na kuyoya hano hasi.—Yowano 5:28, 29.
akabinja nambe kupwa ciyanga.—Isaya 33:24; 35:5, 6.	bakalikangula na kukala na nzili.—Yombi 33:25.
ibakalinga mwamubi.—Isaya 32:16, 17.	bakakala na byakulya byabingi, binjibo byabibwa na bipangi byabibwa.—Myaso 72:16; Isaya 65:21, 22.
akayanda mwafwa ya nzita.—Myaso 46:9.	bakakala mu kwoloka.—Myaso 37:11.
akaziba kubabala ku mbunge mwafwa ya byuma bya kunima.—Isaya 65:17.	bakayoya mwamubwa myaka yoshe.—Myaso 37:29.

Mwanike wa mukwenje uje nakala na kubinja nalikangula, co abumbateya baina.

Munalume uje nakulubalele nelukila ku bukwenje, co ali na kusindumuna wilibala ije inashulu na bisapasapa.

5. Bikulaheso bili mu Mbimbiliya byasa kutukwasa

Banu babangi bakazeye nambe kulubala mwafwa ya bukalu bubakaliwana nabwo. Co bamo bakanene lwozi mu kushaka kutengulula byuma ngwabo bikale mwamubwa. Oloni Mbimbiliya yatukulahesa ngwayo byuma bikakala mwamubwa. Eci cikulaheso cili na kukwasa bati banu ano matangwa? Kengeni VIDIO na kusimutwiya ha bihula binatako.

VIDIO: Njatondele Ngwange Banu Boshe Babalinge Mwamubwa (4:07)

Bikupulo: Cikupulo ca mu vidio ya ‘Njatondele Ngwange Banu Boshe Babalinge Mwamubwa.’ 1. Rafika wakele na kuteja kotoni na banu ba muyati wendi te acili mwanike. 2. Rafika nabwahelela kumona banu ba miyati ya kuliseza-seza banakunguluka hamo ku ciwano ca Bakaleho ba Yehova.

Byuma muka byabibi bibakele na kulinga banu bamo ku bakwabo bije byazibisile Rafika kubihya ku mbunge?
Mbimbiliya yamukwasele bati nameme banu batwaleleleleho kulinga bakwabo mwamubi?

Byuma biinendeka Mbimbiliya bije bikalingiwa kulutwe bitukwasa tukolese omwo tuliwana na bukalu. Tandeni Visimo 17:22 na Loma 12:12. Kutundaho, simutwiyeni ha bihula binatako:

Mumona bati, kuma byuma biinendeka Mbimbiliya bije bikalingiwa kulutwe byasa kutengulula buyoye bweni ndi? Mwafwa bika?

BAMO BAKENDEKA NGWABO: “Byuma biinendeka Mbimbiliya ngwayo bikalingiwa kulutwe, kubikalingiwa.”

Bika bimunapande kutondesesela bukaleho buje bumwesa ngwabwo byuma biinendeka Mbimbiliya bikalingiwa bene?

SIMPI YAKAMA

Byuma byabibwa biinendeka Mbimbiliya bije bikalingiwa kulutwe bitukwasa tukale na lilabelelo na kukolesa omwo tuliwana na bukalu.

Kwitulukamo

Mwafwa bika banu banapande kuzibuka byuma byanakulahesa Njambi?
Mbimbiliya ngwayo byuma bikafwa bati kulutwe?
Kukala na lilabelelo lya byuma bikalingiwa kulutwe kumikwasa bati ha simbu ino?

Litangwa licinahu cilongesa:

Cilengo

Tandeni bisoneka bibanamwesa omu mu cilongesa mangana muzibuke bikulaheso byabingi bili mu Mbimbiliya.

Cilengo Cikwabo:

Your other goal

WANENI BIKWABO

Tandeni biñanda bikwabo bije bimwesa seho ya kukala na lilabelelo.

“Bika Bitukwasa Tukale na Lilabelelo?” (Toneni! ya April 22, 2004)

Tandeni biñanda bije bimwesa ngwabyo kukala na lilabelelo kukwasa munu uje ali na kubinja mushongo uje kuwesi kwola.

“Kuma Mbimbiliya Yasa Kukwasa Munu Ali na Kubinja Mushongo Uje Kuwesi Kwola Ndi?” (Ñanda ya ha webusaiti)

Omwo muyongola ei vidio ya mwaso, lingeni ngwe yeni na naanga yeni muli na kulikuwa kuyoya mu Paradaisi ngwe muinakulahesela Mbimbiliya.

Acisinganyekeni Bikalingiwa Kulutwe (3:37)

Tandeni ñanda ije imwesa mwatengulukilile muka-kulwila bibatonda banu omwo wazibukile bikulaheso bili mu Mbimbiliya.

“Hano Kunjesi na Kuliziba Ngwange Njinapande Kutengulula Kaye” (Kaposhi ka Kukengela ka July 1, 2013)