Mukukafwa Kuyoya mu Kaye Kakaha ka Kwoloka
Muli nakuthziva vati ku mbunge yeni hakutala ha vikupulo vili hano ha tilakiti? Kumwethi nakushaka kukakala mu lifuti lya kwoloka, lya vanu vakuvwahelela, cho lalo lya vufuko ngwe omu mumunamwena ndi? Chili vene mushaka kukakalamo. Munakulahela ngweni vyuma vyakufwa ngechi vikakalako hano hathi, ndi vinapu lika vilota?
Vanu vavangi vathinganyeka ngwavo mpamo vyapwa vilota. Matangwa ano kuli vindthzita, na vutothzi, na njala, na mishongo, nakukuluvala na vyuma vyeka lalo. Oloni tunapande kukala na lilavelelo. Mbimbiliya yatuleka vyakulutwe ngwayo “tuvandamena vije vyanakulaesa Njambi, vikevyo, lilu lyaliha na kaye kakaha, muje mukakala vushunga.”—2 Petulu 3:13; Isaya 65:17.
Kwetheka nomu yendeka Mbimbiliya, eli “lilu lyaliha” kethi lilu lyaliha halyo embwe, cho lalo “kaye kakaha” kethi kaye kakaha hako embwe. Kaye hako nalilu halyo vavitangele vyakulumbunuka vwino, cho Mbimbiliya lalo yendeka ngwayo evi vyuma vikakalako myaka yoshe. (Myaso 89:36, 37; 104:5) Oloni “kaye kakaha,” kanemanenako mbunga ya vanu vakuthungama vaje vakayoya hano hathi. Cho “lilu lyaliha,” linemanenako vumwene vwa mwilu vwakulumbunuka, nambe fulumende yije yikayula mbunga ya vanu vakuthungama hano hathi. Kukulahela ngwetu “kaye kakaha” kakakalako kunapande ndi?
Munapande kutanekeya ngweni Njambi washakele ngwendi vanu vayoye mwamuvwa hano hathi. Wakele vanu vakulivanga vavali mu lihya lyalivwa lya Endeni, cho wavanene lalo chipangi chachivwa hakuvaleka ngwendi: “Kiteni, ngeci vatekulwila veni vakatume ano asi oshe.” (Kushangumuka 1:28) Njambi washakele ngwendi vakite vana, nakwametha Palandaisi yavo yete kwayita kaye koshe. Nambe vatengulukilile Njambi nakwonowa kuyoya myaka yoshe, oloni Njambi katengulwile viyongola vyendi vyayongwele hakulivanga. Vyuma vyoshe vyayongwele akavilinga mu kaye kakaha!—Isaya 55:11.
Nga mupangetha majwi a mu lilombelo livathana ngwavo Lilombelo lya Mwene hakulomba Vumwene vwa Njambi vwije hano hathi, cho muli nakulomba fulumende ya mwilu mangana yije nakutunditha vyuma vyavivi hano hathi, nakuyula kaye kakaha. (Mateo 6:9, 10) Tunapande kukulahela ngwetu Njambi akakumbulula kulomba kwetu, mwafwa watukulahetha mu Lijwi lyendi ngwendi: “Vaka-vushunga vakakala mu lifuti, co vakayoyelamo ku myaka yoshe.”—Myaso 37:29.
Mukukafwa Kuyoya mu Kaye Kakaha ka Njambi
Vumwene vwa Njambi vukanena vyuma vya theho manene, nakulinga vyuma vyavivwa vije Njambi wayongwele hakulivanga ngwendi vanu vakalithzivithevyo kuvwaha hano hathi. Vithzindo na vulumbi kuvikakalako. Vanu voshe hano hathi vakapwa vavuthamba vavuthunga ku munu woshe. Njambi watushika mu Mbimbiliya ngwendi “amanesa vinzita ano asi oshe.” Wandeka lalo ngwendi: “Miyati ya vanu kuvakalilwisa umo na mukwavo lalo na vimoko vya mikwale, kuvakalivwaesela lalo kulwa nzita embwe.”—Myaso 46:9; Isaya 2:4.
Hathi hoshe hakatenguluka kupwa Palandaisi. Mbimbiliya yendeka ngwayo: “Mambo na lifuti lya kuma vikajolela, na vishani vikashamwina mu mambo. . . . Vana va vindonga vakaita mukati ka mambo, lisheñavu lyakwenya likemuka lishali, co lifuti lyakuma likashula na masima a tuvwelu-vwelu.”—Isaya 35:1, 6, 7.
Kukakala vyuma vyavingi vije vikatulingitha kupwa vakuvwahelela mu Palandaisi hano hathi. Vanu lalo kuvakathsi njala. Mbimbiliya yendeka ngwayo: ‘Vimbuto vikamena mu livu.’ (Myaso 67:6; 72:16) Vanu voshe vakalikuwa vivakakilikita na mavoko avo. Ishamatanga watukulahetha ngwendi: “Vakakuna vitungu vya mikolovozi ya vushuka vwa vinyu nakulya vushuka vwakwo. . . . co lalo kuvakakunina vakwavo veka vitungu vya mikolovozi ya vushuka vwa vinyu ngeci valye.”—Isaya 65:21, 22.
Mu kaye kakaha ka Njambi, vanu kuvakalichikinina mu Njuvo yimo ya mundandanda nambe kukala mu tunjuvo twavushaki embwe, mwafwa Njambi endeka ngwendi: “Vanu vange vakatunga vinjuvo vyavo . . . Kuvakatungila vakwavo veka vinjuvo.” Mbimbiliya yendeka lalo ngwayo: “Vipangi vyavo kuvikai mwangocho.” (Isaya 65:21-23) Vanu vakapanga vipangi vyavivwa, vyakuvathzivitha kuvwaha. Vanu kuvakathzivi vuli mu kuyoya kwavo.
Kutundaho, Vumwene vwa Njambi vukelwitha lithzivathano lije lyakele ku tuthitu, nalije lyakele mukati ka tuthitu na vanu ngwe muje mwafwile mu lihya lya Endeni. Mbimbiliya yendeka ngwayo: “Tungunga na vana va vimanga vakakala amolika mu kwoloka, na viingwe vakavutama amolika na vana va vimembe. Vana va vingombe na vana va vindumba vakalila amolika, co vanike vavandondo vakapwa tunyungi twavo.”—Isaya 11:6-9; Hoziya 2:18.
Achithinganyekeni ha chuma chino! Mishongo yoshe na vutengu kuvikakalamo mu Palandaisi. Lijwi lya Njambi lyatukulahetha ngwalyo: “Naumo wai lalo uje akayoyela mu lifuti lyetu akalinyenga a kuvinja.” (Isaya 33:24) Cho lyendeka lalo ngwalyo: “[Njambi] akasikumuna misozi yoshe ku mesho avo. Co kukukakala kutsa nambe vusiwa nambe kulila nambe kukemanga. Omwo vyuma vyalaja vineti.”—Kujombolola 21:4.
Vimunapande Kulinga Mangana Mukakalemo
Tunakulahela ngwetu munathzivi kuvwaha ku mbunge yeni hakuthzivuka vyuma vyashika Njambi hayoyethi ya mu kaye kendi kakaha kakuthungama. Vanu vamo vathinganyeka ngwavo evi vivethzikitho vyavivwa ngechi kuvikakalako. Oloni Njambi yetu wa chithzemo akatulingilavyo vene.—Myaso 145:16; Mika 4:4.
Kuli vyuma vimo vimunapande kulinga nga mushaka kukayoya myaka yoshe mu Palandaisi eyi yili nakwija. Omwo Yesu walombele kuli Njambi, wendekele chuma chakama chije chanapande kulinga munu. Wendekele ngwendi: “Co mwonyo wa myaka yoshe ukewo ou, ngeci vakuzivuke yove Njambi umolika wa vushunga, co nakuzivuka Yesu Kilistu, uje iwatumine.”—Yowano 17:3.
Ngechi, nga tushaka kukayoyela mu kaye kakaha ka Njambi, tunapande kulilongetha chithzango cha Njambi nakuchilinga. Tanekeyeni ngweni: Kano “kaye na vyuma vyoshe vilimo vije vanu vashungwiya vili nakwita, oloni vaje valinga cizango ca Njambi vakayoya myaka yoshe” mangana vakalikuwe vivethzikitho vije vyakavajukwila Njambi yetu wa chithzemo.—1 Yowano 2:17.
Vithoneka vyoshe vinatundu mu Mbimbiliya ya Livulu lya Shukulu Kalunga, oloni vije vili na NW vinatundu mu Mbimbiliya ya New World Translation of the Holy Scriptures—With References.