VIÑANDA VIKWAVO
Tunapande Kumona Vati Munu Ivanatunditha mu Chikungulukilo?
Tukathzivi manene kuvihya nga kavushoko nambe kavuthamba ketu vanamutunditha mu chikungulukilo mwafwa ya kwonwa kutenguluka nga nalingi vuvi. Nga twononoka mashiko a mu Mbimbiliya ha ñanda eyi, cho tumwetha ngwetu twathzema Njambi na kupwa va kulongwa kuli ikeye.a Kengeni vihula vimo vitwatha kulihula ha ñanda eyi.
Tunapande kumona vati munu ivanatunditha mu chikungulukilo? Mbimbiliya ngwayo: “Kethi mulipandakane na munu uje alitumbula ngwendi napu muka-kukulahela oloni napu muka-vupangala, nambe muka-chipululu, nambe muka-kulemetha tumponya, nambe muka-kushaula, nambe muka-kupenda, nambe muka-kwiva. Kethi mutumbame na kulya na munu wangachije.” (1 Kolinte 5:11) Mbimbiliya yendeka lalo ha munu uje ‘kethi kukala mu vilongetha vya Kilisitu’ ngwayo: “Kethi mumutambule mu vinjuvo vyeni nambe kethi mwendeke kuli ikeye ngweni, Kwoloka kukale nove.’ Omwo woshe uje amukandelela mu kwoloka alitombola nendi mu vuvi vuje vwanalingi.” (2 Yowano 9-11) Kutwethi kulikwatathana na munu uje ivanatunditha mu chikungulukilo mu vyuma vya ku sipilitu nambe vya ku muvila. Kaposhi ka Kukengela ka Vundele ka September 15, 1981, liputa 25 kendekele ngwavo: “Kwindwitha munu kunapu vushangumukilo vwa kuthimutwiya nendi na kuputuka vuthamba. Ngechi kutwapandele kwendeka na munu uje vanatunditha mu chikungulukilo.”
Kuma kwakuvwa kujenjuka munu ivanatunditha mu chikungulukilo ndi? Eyo, mwafwa ya vyuma evi vitatu. Cha kulivanga, tumwetha ngwetu tu va kulongwa kuli Njambi na kwononoka Lijwi lyendi. Tukononoka kuli Yehova mu vithimbu vyoshe, vipwe vyavivwa nambe vyavikalu. Kuthzema Njambi chitulingitha twononoke mashiko endi na kutanekeya ngwetu wapwa wa vuthunga, cho mashiko endi apwa amavwa. (Isaya 48:17; 1 Yawano 5:3) Cha mu chivali, kujenjuka ku munu uje shendi kutenguluka ku vuvi vwendi, chituvingilikiya ku sipilitu na kwonwa kushawitha chikungulukilo choshe. (1 Kolinte 5:6, 7) Cha mu chitatu, kukavangeya mashiko a mu Mbimbiliya kukwatha manene munu uje ivanatunditha mu chikungulukilo. Nga tukundwiya vyuma vivanakutu vaka-komiti ya kuthompa, cho twatha kukwatha munu uje nalingi vuvi, uje nonowa kutolilila ku vyuma vivanamunangwile vakulunu. Kwonwa kulikwatathana nendi kumulingitha ‘aliyongole’ na kumona vuvi vwanalingi mangana apangeleho na kwiluka vwathi kuli Yehova.—Luka 15:17.
Indi vati nga munu ivanatunditha mu chikungulukilo napu kavushoko ketu? Kunatha kupwa kwakukalu kupwa va kulongwa kuli Yehova mwafwa munu wacho napu kavushoko ketu. Tunapande kumona vati kavushoko ketu uje ivanatunditha mu chikungulukilo? Kutwatha kuthimutwiya vyuma vyoshe vyalivungilamo, oloni tukengeni lika ha vyuma vyakama vivali.
Vithimbu vimo, kavushoko ketu uje ituli nendi mu njuvo imo vanatha kumutunditha mu chikungulukilo. Nga kavushoko ketu vanamutunditha mu chikungulukilo, kuchilumbununa ngwavo vushoko vwetu vunathsi embwe. Ngechi tunatha kupanga nendi vipangi vya mu nanga vitukalingi ha litangwa na litangwa. Oloni ngila yanangula, inamulingitha athsiye vushoko vwa ku sipilitu vwanakele na kulikuwa na vakwavo mu nanga. Ngechi vanu va mu nanga vaje vapwa va kulongwa kuli Njambi kuvapandele kulikwatathana nendi mu vyuma vya ku sipilitu. Chakumwenako, nga nanga iliwana hamo ku chilongetha chavo cha kulemetha Njambi, uje ivanatunditha mu chikungulukilo kapandele kwendekaho vimo nga nendi kwali. Nga uje ivanatunditha mu chikungulukilo napu mwanike wamundondo, cho vithemi vendi vali na chipangi cha kumulongetha na kumunangula. Ngechi vithemi vendi vanatha kumulongetha chilongetha cha Mbimbiliya.b—Vithimo 6:20-22; 29:17.
Vithimbu vikwavo lalo, kavushoko ketu uje wakala na njuvo yendi vanatha kumutunditha mu chikungulukilo. Nameme tunatha kuthimutwiya nendi ha viñanda vimo vyakama vya nanga, oloni kutwapandele kulinga ngocho kushwa kumo. Vaka-Kilisitu va kulongwa kuvapandele kutondatonda vingila vya kushaka kulikwatathanenamo na kavushoko kavo ivanatunditha mu chikungulukilo uje wakala kweka. Kupwa va kulongwa kuli Yehova na ku munga yendi, kuvalingitha vakavangeye vyuma vivendeka mu Vithoneka ha munu uje ivanatunditha mu chikungulukilo. Nga tujenjuka ku munu uje nalingi vuvi, cho vyuma vivanamunangula vyatha kumukwatha.c—VaHevelu 12:11.
a Vyuma viyendeka Mbimbiliya ha ñanda eyi vipanga lalo na ku vanu vaje vanalitunditha vakevo vavenya mu chikungulukilo.
b Nga mushaka mithzimbu ikwavo ije yendeka ha mwanike uje ivanatunditha mu chikungulukilo, kengeni Kaposhi ka Kukengela ka Silozi ka October 1, 2001, liputa 16-17, naka Vundele ka November 15, 1988, liputa 20.
c Nga mushaka mithzimbu ikwavo hali kavushoko keni uje ivanatunditha mu chikungulukilo, cho kengeni Kaposhi ka Kukengela ka Vundele ka April 15, 1988, liputa 26-31, na Chipangi Chetu cha Vumwene cha Silozi cha August 2002, liputa 3-4.