Viñanda Vyakushweketha Vije Vitunavwahelela Kuthzivuka

Kuli umo wakuleketheleho viñanda vyakushweketha ndi?—a Mbimbiliya yendeka ha ñanda ya kushweketha ya kulimanena ije vathana “vushunga vwakushwekesa.” Yapwa ya vusunga mwafwa yatunda kuli Njambi. Yapwa yakushweketha mwafwa vanu kuvaithzivukile. Na tungelo navo, vatondele manene kuithzivuka. Nove utonda kuthzivuka ñanda yakushweketha ndi vati?—

Kulaja, Njambi watangele munalume na munakathzi va kulivanga. Mathzina avo vapwile vakevo va Andama na Eva. Lihya lya Endeni likelyo limbo lyalivwa lya vanene Njambi. Ngwe Andama na Eva vathingimikile Njambi, ngwe vanapwithile kaye koshe kupwa palandaisi ya kulifwa na lije lihya, vakevo hamolika na vana vavo. Ngwe vanayoyele mu Palandaisi myaka yoshe. Oloni vika wanuka vivalingile va Andama na Eva?—

Ano matangwa kutwethi nakuyoya mu palandaisi, mwafwa va Andama na Eva kuvathingimikile Njambi. Oloni Njambi wendekele ngwendi akutengulula kano kaye kupwa kakavwa. Vanu voshe vakuyoyamo myaka yoshe, cho vakupwa vakuvwahelela. Atha kukalinga vati ngocho? Thimbu yailaha inetile, vanu kuvaithzivukile eyi ñanda. Yapwile yakushweketha.

Yesu mwethzile hano hathi, walongethele vanu vyavingi ha ñanda yakushweketha. Wendekele ngwendi yapwile ñanda ya Vumwene vwa Njambi. Yesu walekethele vanu ngwendi valombe ovu Vumwene kwija, mangana vwakupwithe kaye koshe kupwa palandaisi yaivwa.

Ngwetu wavwahelela muunathzivuka eyi ñanda yakushweketha, ndi vati?— Anuka ngwove mu palandaisi mukakala lika vanu vaje vathingimika Yehova. Mbimbiliya ituleketha viñanda vya vanalume na vanakathzi vaje vathingimikile Yehova. Utonda ngwove uvathzivuke, ndi vati?— Vandamena tuthzivukeko vamo, mangana tumone mutunapande kuvatembunwinamo.