Vasonekele vya Vuyoye vwa Yesu

Unamono ava vanalume vali aha ha chikupulo ndi?— Mathzina avo awa: Mateo, Mako, Luka, Yowano, Petulu, Yakomba, Yunda, na Paulu. Ava vanalume voshe, vayoyele muthimbu ya Yesu cho nawa vasonekele vya vuyoye vwendi. Vandamena tuchililongethe vyavo.

Miluwa vamo vatatu mukati kava vanalume, vambulwile na Yesu. Uthzivuka mathzina ava miluwa vatatu ndi?— Mateo, Yowano, na Petulu. Muluwa Mateo na Yowano, vathzivukile Yesu mwamuvwa cho umo na umo wasonekele livulu lya vuyoye vwa Yesu. Muluwa Yowano wasonekele nawa livulu vathana ngwavo Kujombolola na mikanda itatu vathana mukanda Wakulivanga wa Yowano, mukanda Wamuchivali wa Yowano, na mukanda Wamuchitatu wa Yowano. Muluwa Petulu wasonekele mikanda ivali ije yakala mu Mbimbiliya. Eyi mikanda vaithana ngwavo mukanda Wakulivanga wa Petulu, na mukanda Wamuchivali wa Petulu. Mu mukanda wendi wamuchivali, Petulu wasonekele vya thimbu ije wendekele Yehova kutunda mwilu hali Yesu ngwendi: ‘Ou ikeye munange. Njamuthzema, na kuvwahelela hali ikeye.’

Ava vanalume vakwavo vali ha chikupulo, vatulongetha lalo vyavingi vya Yesu kutundilila mu mavulu avasonekele. Umo wavo ikeye Mako. Chasholoka ngwe, mpamo naikeye kwakele muvakutile Yesu cho wamwene vyoshe vyakele nakulingiwa. Mukwavo wapwile Luka. Wapangele chipangi cha vundotolo. Luka wapwile muKilisitu hanima ya kuthsa kwa Yesu.

Vakwavo vavali vasonokele Mbimbiliya vali aha ha chikupulo, vapwile vishongo va Yesu. Uthzivuka mathzina avo ndi?— Vapwile Yakomba na Yunda. Ha kulivanga, kuvakulahelele Yesu embwe. Thimbu imo vamuthinganyekelele ngwavo mpamo nathzaluka. Oloni hakwita kwa thimbu, vakulahelele Yesu nakupwa vaKilisitu.

Wamamanethelelo yiumona aha ha chikupulo hali vaje vasonekele Mbimbiliya, ikeye Paulu. Thimbu kanda apwe muKilisitu, lithzina lyendi lyapwile Saulu. Wathzindile manene vaKilisitu cho washakele kuvathsiya voshe. Uthzivuka vyanenethele ngwavo Paulu apwe muKilisitu ndi?— Litangwa limo omwo Paulu wakele nakuya ku Ndamasiku, wathzivile lijwi limwendeketha kutundilila mwilu. Yesu ikeye wamwendekethele! Cho Yesu wehwile Paulu ngwendi: ‘Vika ulinakuyandethela vaje vanakulahela kuliyange?’ Haje vene, Paulu watengulukile nakupwa muKilisitu. Paulu wasonekele mavulu a Mbimbiliya akupwa 14. Kuputuka na mukanda wa Loma kweta ku mukanda wa vaHevelu.

Tukatanda Mbimbiliya tangwa na tangwa ndi vati?— Kutanda Mbimbiliya kutukwatha kulilongetha vyavingi vya vuyoye vwa Yesu. Vati, ushaka lalo kulilongetha vyavingi vya Yesu ndi?—