Kengeni Kuli Njambi Mupwe va Kuvwahelela mu Vulo

Yehovaa Njambi ikeye washangumukile vulo vwa kulivanga. Mbimbiliya ituleka ngwayo watangele munakathzi wa kulivanga “cho wamunenele kuli. . . munalume.” Andama wavwahelelele manene, cho wendekele ngwendi: “Ou ikeye chithsiya cha ku vithsiya vyange, na maninga ange.” (Kushangumuka 2:22, 23) Yehova washaka ngwendi vaka-kulyambata vapwe va kuvwahelela.

Nga mukovela mu vulo munatha kuthinganyeka ngweni vyuma vyoshe vikala mwamuvwa. Oloni kwendeka vuthunga, nambe munalume na munakathzi vaje valithzema manene vatha kukala na vukalu mu vulo. (1 Kolinte 7:28) Eyi mbuloshuwa ili namashiko a mu Mbimbiliya aje atha kumikwatha kupwa va kuvwahelela mu vulo, nambe mu nanga, nga muwakavangeya.—Myatho 19:8-11.

1 VWAHELELENI CHIPANGI CHANAMYANA YEHOVA

VYUMA VIYENDEKA MBIMBILIYA: Munalume ikeye mutwe wa nanga.—Efeso 5:23.

Nga wambata, Yehova ashaka ngwendi unyunge vwino munakathzi wove. (1 Petulu 3:7) Njambi wamutangele kupwa mukwathi wove, cho ashaka ngwendi umuthingimike na kumuthzema. (Kushangumuka 2:18) Unapande kumuthzema manene, na kumushota mbunge kutuvakana yove vavenya.—Efeso 5:25-29.

Nga washomboka, Yehova ashaka ngwendi uthingimike manene munalume wove na kumukwatha ashulithilile chipangi chendi. (1 Kolinte 11:3; Efeso 5:33) Kethi ulwithe viyongola vyendi, oloni likwatathane nendi na mbunge yove yoshe. (Kolose 3:18) Nga ulinga ngocho, cho vuvwa vwove vupwa vwa vuthunga ku mesho a munalume wove na kuli Yehova.—1 Petulu 3:1-6.

VYUMA VIMWATHA KULINGA:

• Ihuleni muka-njuvo yeni mumwatha kupwila munalume nambe munakathzi wamuvwa. Tolilileni vwino na kupangela ha vyuma vyamileka

• Thimpeni. Hatha kwita thimbu yakama ha kulinga ngwavo mutanekeye mwakuthzivithila kuvwaha muka-njuvo yeni

2 AKENI MANA KU VIYONGOLA VYA MUKA-NJUVO YENI

VYUMA VIYENDEKA MBIMBILIYA: Munapande kutondethetha vyuma vije vithzivitha kuvwaha muka-njuvo yeni. (Filipu 2:3, 4) Thingimikeni muka-njuvo yeni na kwanuka ngweni Yehova ashaka ngwendi vangamba vendi vathzivile ‘ngothzi vanu voshe.’ (2 Timateo 2:24) “Kwendeka majwi a lishamena avinjitha ku mbunge ngwe munu vativi moko ya mukwale, oloni majwi a kwendeka mwamuvwa akahwimitha mbunge.” Ngechi, munapande kwangula vwino majwi a kwendeka. (Vithimo 12:18) Sipilitu ya Yehova imikwatha mwendeke na ngothzi na chithzemo.—Ngalatiya 5:22, 23; Kolose 4:6.

VYUMA VIMWATHA KULINGA:

• Lombeni kuli Njambi mangana amikwathe muthimpe mbunge na kumona vyuma mu ngila yaivwa thimbu kanda muthimutwiye ha ñanda imo ya kulema na muka-njuvo yeni

• Thinganyekeni mwamuvwa vya kwendeka na mwakuvyendekela

3 LITOMBOLENI MU VIYONGOLA

VYUMA VIYENDEKA MBIMBILIYA: Nga mukovela mu vulo, mupwa “muvila umo lika” na munu imulyambata nendi. (Mateo 19:5) Oloni thinganyekeni ngweni anga munapu lika vanu vavali, cho vithinganyeka vyeni vinatha kulithethza. Ngechi, munapande kulilongetha mwakukela na viyongola vimo na vithinganyeka vimo. (Filipi 2:2) Munapande kupwa va kulikwatathana omwo mwangula vya kulinga. Mbimbiliya ngwayo: “Tambula kunangula kwakuvwa thimbu kanda utumbe vutumbe.” (Vithimo 20:18) Kavangeyeni mashiko a mu Mbimbiliya ha kwangula vyuma vimushaka kulinga.—Vithimo 8:32, 33.

VYUMA VIMWATHA KULINGA:

• Lekeni muka-njuvo yeni viyongola vyeni, kethi kwendeka lika majwi a hakamwa embwe

• Thimutwiyeni na muka-njuvo yeni vyuma vimushaka kulinga thimbu kanda muvilinge