Pweni va Kulongwa Kuli Umo na Mukwavo

Yehova washaka ngwendi tumwethe “chithzemo chije kuchethi kutenguluka.” (Mika 6:8) Munapande kulinga ngocho mu vulo vweni, mwafwa kumwatha kulikulahela nga kumwethi mu va kulongwa. Mwatha lika kulithzema nga mulikulahela umo na mukwavo.

Matangwa ano, vanu kuvethi va kulongwa mu malo. Nga mushaka kunyungilila vulo vweni, cho lingeni vyuma vino vivali.

1 AKENI VULO VWENI KULUTWE

VYUMA VIYENDEKA MBIMBILIYA: ‘Anguleni vyavivwa’ manene. (Filipu 1:10) Vulo vweni vunapu chuma chimo cha kulema manene mu kuyoya kweni. Munapande kuvwaka kulutwe.

Yehova ashaka ngwendi mwake kulutwe muka-njuvo yeni na ‘kuvwahelela’ nendi. (Muka-kwambulula 9:9) Njambi nalumbununa vwino ngwendi kumwapandele kuyengula muka-limbo lyeni. Oloni ngwendi muwane vingila vije vyatha kunena kuvwahelela mukati keni. (1 Kolinte 10:24) Muka-njuvo yeni napande kulithziva ngwendi mwamuthzema.

VYUMA VIMWATHA KULINGA:

• Munapande kuwanako thimbu ya kukala hamo lika na muka-njuvo yeni, na kuthimutwiya nendi

• Munapande kumwaka mu vithinganyeka vyeni mu vyuma vyoshe vimushaka kulinga

2 NYUNGENI MBUNGE YENI

VYUMA VIYENDEKA MBIMBILIYA: “Woshe akenga shwi munakazi na lishungu nalingi laja nendi vupangala mu mbunge yendi.” (Mateo 5:28) Nga munu athinganyeka manene kulinga vupangala, cho kapwile wa kulongwa kuli muka-njuvo yendi.

Yehova nendeka ngwendi “nyunga viyongola vyove.” (Vithimo 4:23; Njelemiya 17:9) Mwatha kulinga ngocho nga munyunga mesho eni. (Mateo 5:29, 30) Kavangeyeni mwanja wa Yombi, uje walikutile chikumiyo na mesho endi ngwendi kakakenge mumbanda na kumulehwila mate. (Yombi 31:1) Jenjukeni ku kuyongola vikupulo vya mushelengwa. Cho jenjukeni lalo ku kulikwata vuthamba na munu uje kapwile muka-njuvo yeni.

VYUMA VIMWATHA KULINGA:

• Mwetheni vakweni ngweni mwaka manene mbunge muka-njuvo yeni

• Thinganyekeni hali muka-njuvo yeni, na kumanetha vuthamba vuje vwatha kuluvaletha muka-njuvo yeni