Mwakumanethela Vukalu

Omwo mushangumuka kuyoya hamo na muka-njuvo yeni, na vukalu navwo vushangumuka. Vukalu vwatha kutunda ha kulithethza kwa vithinganyeka, nomwo mumukalithzivila, nomwo mumwanona vyuma mu kuyoya. Vukalu vumo vunatha kwija mu kukathumuna, nambe kutunda ku vakweni.

Kutwapandele kutewa vukalu embwe. Mbimbiliya yatutakametha ngwayo tunapande kumanetha vukalu vwetu. (Mateo 5:23, 24) Mwatha kuwana vingila vya kumanethelemo vukalu vweni nga mukavangeya mashiko a mu Mbimbiliya.

1 THIMUTWIYENI VUKALU VWENI

VYUMA VIYENDEKA MBIMBILIYA: “Kuli thimbu . . . ya kuthimutwiya.” (Muka-kwambulula 3:1, 7) Munapande kuwana thimbu ya kuthimutwiya vukalu vweni. Lekeni muka-njuvo yeni mumunathinganyekela ha ñanda imo, nomwo mumuli na kulithzivila. Munapande “kwendeka vuthunga” kuli muka-njuvo yeni. (Efeso 4:25) Kumwapandele kulwa nambe nga munaluvala manene. Kukumbulula mwamuvwa kulingitha ñanda yaindondo yonowe kumitwala ku kulijokota.—Vithimo 15:4; 26:20.

Thzemeni muka-njuvo yeni na kumuthingimika nambe nga munalipyakana ha vyuma vimo. (Kolose 4:6) Manetheni vukalu vweni vwathivwathi, kethi mulikele kulyendeketha.—Efeso 4:26.

VYUMA VIMWATHA KULINGA:

• Anguleni thimbu yaivwa ya kuthimutwiya vukalu vweni

• Nga mukweni ali na kwendeka, mutolilileni, kethi mumuvatwiye. Neni thimbu yeni ya kwendeka yeta

2 TOLILILENI NA KUTHZIVITHITHA

VYUMA VIYENDEKA MBIMBILIYA: “Lithzemeni umo na mukwavo . . . , co litakametheni na kulithingimika umo na mukwavo.” (Loma 12:10) Kutolilila vwino kwapwa kwakuvwa. Ethekeni kuthzivithitha viyongola vya muka-njuvo yeni mu chithzemo na kulikehetha. (1 Petulu 3:8; Yakomba 1:19) Kethi mulikwithe kutolilila. Nga chinatha, echeni vimuli na kulinga, na kwaka mana kuli muka-njuvo yeni, nambe kumulomba muthimutwiye thimbu yeka. Nga mumona muka-njuvo yeni kupwa mukweni mumwapangela, kethi ngwe muka-kumilwitha, cho ‘kumuluvala vwathi.’—Muka-kwambulula 7:9.

VYUMA VIMWATHA KULINGA:

• Tolilileni na mbunge imo nambe nga vyuma vyali na kwendeka muka-njuvo yeni kuvyamivwahethele

• Tolilileni vithimpi vyali na kwendeka muka-njuvo yeni. Mutaleni mumone mwali na kwendekelamo, na kuthziva chifwa cha lijwi lyendi

3 LINGENI VIMULIKUMIYA

VYUMA VIYENDEKA MBIMBILIYA: “Kuundangana manene uwanaho vimo, oloni kwendeka ngoco lika na kanwa, kutwala lika ku vuhutu.” (Vithimo 14:23) Kulithzivathana lika kuchatha kumanetha vukalu. Oloni muvumanetha nga mulinga vimunalikumiya mu vuvali vweni. Munapande kupanga na ndthzili, athina mumone vuvwa. (Vithimo 10:4) Nga mupangela hamo lika, cho mwatha ‘kupanga mwamuvwa vipangi vyeni.’—Muka-kwambulula 4:9

VYUMA VIMWATHA KULINGA:

• Munu na munu athzivuke vyanapande kulinga mangana mumanethe vukalu vweni

• Nga haneti matangwa, lihuleni mumone nga muli na kuvikavangeya