Lemetheni Yehova Hamo na Nanga

Ngwe mumunalilongethela omu mu mbuloshuwa, Mbimbiliya ili na mashiko amangi aje atha kumikwatha na nanga yeni. Yehova ashaka ngwendi muvwahelele. Nakulahetha ngwendi nga mutwameka kumulemetha kulutwe, “cho vyoshe evi akamiwethzelelavyo.” (Mateo 6:33) Ashaka ngwendi mupwe kavuthamba kendi. Pangetheni thimbu imuli nayo mu kukanyametha vuthamba vweni na Njambi. Kulikuta vuthamba nendi kunapu kuvethzika kwakama manene. —Mateo 22:37, 38.

1 KANYAMETHENI VUTHAMBA VWENI NA YEHOVA

VYUMA VIYENDEKA MBIMBILIYA: “‘Njikapwa nji ishweni, cho yeni mukapwa vana vange va vanalume na ava va vanakathzi,’ mwanendeka Shukulu Kalunga.” (2 Kolinte 6:18) Njambi ashaka ngwendi mupwe kavuthamba kendi wa ha mbunge. Kulombela kumikwatha mupwe kavuthamba kendi. Yehova namilanya ‘kulombela thimbu yoshe.’ (1 Tesalonika 5:17) Ashaka kutolilila ku vithinganyeka na vishoti vili mu mbunge yeni. (Filipu 4:6) Nga mulombela hamo na nanga yeni, cho valimwena ngwavo mwa kulahela Njambi.

Kumwapandele kwendeka lika na Njambi embwe, oloni munapande lalo kutolilila kuli ikeye. Mwatha kulinga ngocho mu kulilongetha Lijwi lyendi na mavulu aje anakundama ku Mbimbiliya. (Myatho 1:1, 2) Thinganyekeni ha vyuma vimuli na kulilongetha. (Myatho 77:11, 12) Kukala ku viwano vya vaka-Kilisitu thimbu yoshe kusholola lalo ngwavo mwashaka kutolilila kuli Njambi.—Myatho 122:1-4.

Kuleka vakweni vya Yehova, inapu ngila ikwavo ya kukanyamethelamo vuthamba vweni na Njambi. Kulinga vyuma evi, kumikwatha mukute vuthamba nendi.—Mateo 28:19, 20.

VYUMA VIMWATHA KULINGA:

• Anguleni thimbu ya kutanda Mbimbiliya na kulombela mu litangwa na litangwa

• Akeni vyuma vya ku sipilitu kulutwe mu nanga, kutuvakana kuya na kweha nambe kulala ngocho.

2 LIKUWENI KULEMETHA KWENI KWA NANGA

VYUMA VIYENDEKA MBIMBILIYA: “Shwenyeni kuyehi na Njambi, cho na ikeye lalo akashwenya kuyehi neni.” (Yakomba 4:8) Munapande kukala na chinoneko cha kulemetha kwa nanga na kuchikavangeya thimbu yoshe. (Kushangumuka 18:19) Oloni kuli chuma chikwavo lalo. Njambi napande kukala mu vuyoye vweni vwa litangwa na litangwa. Kanyametheni vuthamba vwa vaka-nanga yeni na Njambi mu kwendeka vyendi “omo muli mu vinjuvo vyeni nambe muli na kwenda mu ngila, nambe thimbu ya kulala, nambe omo mupanga.” (Kwituluka mu Mashiko 6:6, 7) Tembwinineni Yoshwa uje wendekele ngwendi: “Oloni yange na nanga yange, tukapangela Shukulu Kalunga.”—Yoshwa 24:15.

VYUMA VIMWATHA KULINGA:

• Kaleni na chinoneko cha kulilongetha chachivwa chije chikwatha munu na munu mu nanga yeni