Nga Kunasholoka Vukalu

Nambe mulifwita vati ngweni mupwe va kuvwahelela mu vulo na mu nanga, oloni kunatha kwija vukalu vwa kukathumuna vuje vunatha kumithzivitha kuvihya. (Muka-kwambulula 9:11) Njambi akatukwatha nga tuli mu vukalu. Nga mupangetha awa mashiko a mu Vithoneka vinatako, cho yeni, na nanga yeni mwatha kuhyana vyetheko vya kulinga na ha mesho vwi.

1 KULAHELENI YEHOVA

VYUMA VIYENDEKA MBIMBILIYA: “Akeni vukalu vweni vwoshe hali ikeye, omwo ikeye ali na kumilela.” (1 Petulu 5:7) Kethi mwane Njambi mulonga nga muli mu vyetheko. (Yakomba 1:13) Njambi amikwatha kuhyana vyetheko vyeni nga mushwenya kuyehi nendi. (Isaya 41:10) “Mulekeni vukalu vweni vwoshe.”—Myatho 62:8.

Kutanda Mbimbiliya mu litangwa na litangwa lalo kumithzembeleka. Mulimwena ngweni Yehova wapwa “muka-kututhzembeleka mu tuyando twetu twoshe.” (2 Kolinte 1:3, 4; Loma 15:4) Amikulahetha kumyana “kwoloka kwa Njambi kuje munu naumo wahi atha kuthzivithitha.” —Filipu 4:6, 7, 13.

VYUMA VIMWATHA KULINGA:

• Lombeni Yehova amikwathe muthimpe mbunge na kukala na vithinganyeka vyavivwa

• Itulukeni mu vyuma vimunayongola kulinga, cho anguleniho vije vimikwatha manene

2 LINYUNGENI NA KUNYUNGA NANGA YENI

VYUMA VIYENDEKA MBIMBILIYA: “Vaka-mana vali na chishota-mbunge cha kuthzivuka mana, cho matwi a vaka-kunyanyama ashaka mana.” (Vithimo 18:15) Tanekeyeni vimunapande kulinga. Thzivukeni vukwathi vwashaka umo na umo mu nanga yeni. Thimutwiyeni navo. Vatolilileni.—Vithimo 20:5.

Vati nga munu imwathzema nathsi? Kethi muthzive shwamwa kulila. Anukeni ngweni Yesu nendi “walilile.” (Yowano 11:35; Muka-kwambulula 3:4) Kupwa kwakuvwa nga mukala na thimbu yayingi ya kuhwima na kulala. (Muka-kwambulula 4:6) Oku kumikwatha kukala na ndthzili ya kulipika na vukalu vweni.

VYUMA VIMWATHA KULINGA:

• Lithzilitheni kuthimutwiya na vanu va mu nanga yeni thimbu kanda vukalu vusholoke. Nga kunasholoka vukalu, cho vathzituka kwendeka neni

• Thimutwiyeni na vakweni vaje vaita laja mu vukalu vumuli navwo

3 LOMBENI VUKWATHI VUMUSHAKA

VYUMA VIYENDEKA MBIMBILIYA: “Vathamba vamwetha chizemo chavo thimbu yoshe, vavushoko vanathemukila ngechi vamwene hamo tuyando.” (Vithimo 17:17) Vavuthamba veni hamo vashaka kumikwatha, oloni mpamo kuvathzivuka vukwathi vumutonda. Kethi muthzive shwamwa ya kuvaleka vimushaka. (Vithimo 12:25) Lombeni lalo vukwathi vwa ku sipilitu kutundilila kuli vaje vathzivithitha mwamuvwa Mbimbiliya. Vukwathi vwa mu Mbimbiliya vuvamyana vwatha kumikwatha.—Yakomba 5:14.

Mwatha kuwana vukwathi vumutonda nga mulikwatathana thimbu yoshe na vanu vaje vakulahela Njambi mu vuthunga na kukulahela vivethzikitho vyendi. Neni mulithzembeleka nga mukwatha vakweni vaje vashaka kuvakanyametha. Valekeni likulahelo lyeni, na vyuma vyatukulahetha Yehova. Thzethzameni mu kukwatha vakweni vaje vali mu vujene, cho lalo kethi mulyangunune ku vanu vaje vamithzema na kumyaka mbunge.—Vithimo 18:1; 1 Kolinte 15:58.

VYUMA VIMWATHA KULINGA:

• Lekeni kavuthamba keni wa ha mbunge mangana amikwathe

• Endekeni vuthunga vukwathi vumutonda