Yehova Akanyungilila Banu Bendi

1. Mwafwa bika Yesu walombele Yehova ngwendi anyunge baka-kumukabangeya?

HA BUTSIKI bwa kwinduka litangwa libamutsiile, Yesu walombele Ishe wa mwilu cuma ca kulitila. Walombele Ishe ngwendi anyungilile baka-kumukabangeya. (Yowa 17:15, 20) Tuzibuka ngwetu Yehova akaka banu bendi mbunge na kubanyungilila. Nameme ngoco, Yesu wazibukile ngwendi baka-kumukabangeya bakabalwisa manene kuli Satana. Co wazibukile lalo ngwendi baka-kumukabangeya bakatonda bukwasi bwa Yehova mangana bakolese omwo Satana abalwisa.

2. Kwesekesa na Myaso 33:18-20, mwafwa bika kutwapandele kulishoshomwena omwo tuliwana na byeseko?

² Banu ba mu kaye kali na kutwamenena Satana, bali na kuyandesa manene baka-Kilistu ba busunga. Tukaliwana na bukalu buje bwasa kutuzeyesa nambe kutwonowesa kupangela Yehova. Oloni bitulilongesa muno mu cilongesa bimwesa ngwabyo kutwapandele kulishoshomwena. Yehova atunyungilila, ali na kumona bukalu butuli na kuliwana nabwo, co nalibwahesela kutukwasa. Tusimutwiyeni ha byakumwenako bibali bya mu Mbimbiliya bije bimwesa ngwabyo Yehova ‘akakenge hali baje bamuzibila lyoba.’—Tandeni Myaso 33:18-20.

YEHOVA ATUKWASA NGA TULIZIBA BULI

3. Bika byasa kutulingisa tulizibe buli?

³ Nameme tuli na bandolome na bandokazi babangi mu cikungulukilo, bisimbu bimo tunasa kuliziba bulika. Cakumwenako, babaha banasa kuliziba bulika ha simbu ibaleka babakakobela nabo sikola byuma bibakulahela nambe nga bajalukila ku cikungulukilo ceka. Simbu imo tunasa kuliziba kuzeya mwafwa ya kusinganyeka ngwetu kukwesi munu asa kutukwasa mu bukalu butuli na kuliwana nabwo. Tunasa kukwata-kwata ku masinde kulekesa bakwetu bukalu butuli na kuliwana nabwo mwafwa ya kusinganyeka ngwetu kubasa kutuzibisisa. Co simbu imo tunasa kuliziba ngwetu banu kubakele mbunge ku bukalu butuli nabwo. Kuliziba buli kunasa kutulingisa tulishoshomwene na kuliziba ngwetu tubangoco. Yehova kashaka ngwendi tulizibe ngoco. Bika twendekela ngoco?

4. Mwafwa bika kapolofweto Elinja wendekele ngwendi: ‘Yange lika [kapolofweto] njasalako’?

⁴ Tucisimutwiyeni hali munalume wa kulongwa Elinja. Wendele matangwa 40 mwafwa watewele Njezebele uje walisingile ngwendi amutsiya. (1 Vimye 19:1-9) Mwakele likalyendi mu linzenzengoma walekele Yehova ngwendi: ‘Yange lika [kapolofweto] njasalako.’ (1 Vimye 19:10) Kwakele tupolofweto bakwabo babangi. Cakumwenako, Obandiya wobwele tupolofweto 100 baje bashakele kutsiya Njezebele. (1 Vimye 18:7, 13) Co mwafwa bika Elinja wendekele ngwendi ikeye lika kapolofweto nasalako? Kuma wasinganyekele ngwendi tupolofweto bobwele Obandiya, Njezebele nabatsii ndi? Indi hamo walizibile ngoco mwafwa kukwesi munu washangumukile kupangela Yehova nameme balimwenenene bikomoweso byalingile ha Munkinda wa Kalemele ndi? Kuma wasinganyekele ngwendi banu kubamwakele mbunge, co kubazibukile ngwabo bashakele ku mutsiya ndi? Mbimbiliya kuyendekele mu kushula byuma byamulingisile asinganyeke ngoco. Oloni tuzibuka ngwetu Yehova wazibukile byuma byalingisile Elinja alizibe ngoco, co wazibukile na ngila yaibwa ya kumukwaselamo.

5. Yehova wakwasele bati Elinja azibuke ngwendi kakele likalyendi?

⁵ Yehova wakwasele Elinja mu bingila bya kuliseza-seza. Walekele Elinja endeke byakele ku mbunge yendi. Co wamwihwile lubali ngwendi: “Bikajo ulinga kuno.” (1 Vimye 19:9, 13) Simbu yoshe Yehova wakele na kutolilila omwo Elinja wakele na kumuleka byakele ku mbunge yendi. Yehova watakamesele Elinja omwo wamukwasele ananguke ngwendi ali hamo nendi, co ali na nzili ya kumukwasa. Walekele lalo Elinja ngwendi kwakele Baisalele bakwabo babangi baje bakele na kulemesa Yehova. (1 Vimye 19:11, 12, 18) Elinja watakamene mwalekele Yehova byakele ku mbunge yendi na kuziba majwi a Yehova akutakamesa. Yehova wanene Elinja bipangi byabingi bya seho. Wamwanene cipangi ca kubwabesa Hazalele kupwa mwene wa Silya, Yehu kupwa mwene wa Isalele na Elisha kupwa kapolofweto. (1 Vimye 19:15, 16) Yehova wanene Elinja ebi bipangi mangana amukwase kwaka mbunge ku byuma byabibwa. Co lalo wamwanene kabusamba wamubwa Elisha. Yehova asa kumikwasa bati nga muliziba buli?

6. Bika bimwasa kwendeka mu malombelo eni nga muliziba buli? (Myaso 62:8)

⁶ Yehova ashaka ngwendi mulombele kuli ikeye. Ali na kumona bukalu bumuli na kuliwana nabo, co nakulahesa ngwendi amitolilila nga mulomba kuli ikeye ha simbu yoshe-yoshe. (1 Tesa 5:17) Washaka kutolilila ku malombelo a bangamba bendi. (Visi 15:8) Bika bimwasa kwendeka mu malombelo eni nga muliziba buli? Mulekeni mwoshe mumuli na kulizibila ngwe mwalingilile Elinja. (Tandeni Myaso 62:8.) Mulekeni bukalu bweni nomu mumuli na kulizibila. Mulekeni amikwase kuzibuka bya kulinga nga muliziba buli. Cakumwenako, nga mukazibi lyoba kwambulwila bakweni ku sikola, co lombeni Yehova amikwase kupwa wa kusimpa. Mulombeni amyane mana akulumbununa mwamubwa byuma bimwakulahela. (Luka 21:14, 15) Nga muliziba kuzeya, lombeni Yehova amikwase kupwa wa kusimpa na kulekako muka-Kilistu wa kukola ku sipilitu bukalu bweni. Mwasa kulomba Yehova akwase muka-Kilistu imushaka kuleka bukalu bweni azibisise mumuli na kulizibila. Lekeni Yehova byoshe bili ku mbunge yeni, na kumona mwakumbulwilamo malombelo eni, co lalo tambuleni bukwasi butunda ku bandolome na bandokazi beni. Nga mulinga ngoco, co kumwasa kuliziba manene kuzeya.

7. Bika bitulilongesa kuli ndolome Mauricio?

⁷ Tubaboshe Yehova natwana cipangi cacibwa. Yehova akakandelela mwakamono kufwitangana kweni mu mukapanga bipangi bya cikungulukilo na kwambulula. (Myaso 110:3) Kuzezama mu bipangi bya ku sipilitu kumikwasa bati nga muliziba buli? Tucisimutwiyeni ha cakumwenako ca ndolome Mauricio.b Mauricio mubamumbwitikile, kabusamba kendi washangumukile kutunda mu busunga kabundondo-kabundondo. Wendekele ngwendi: “Munjamwene kabusamba kange ecela kupangela Yehova, njazeyele. Njasinganyekele ngwange hamo nange njonowa kutwalelelaho kupangela Yehova. Njalizibile buli, co njasinganyekele ngwange naumo wahi asa kuzibisisa munjili na kulizibila.” Bika byakwasele Mauricio? Wendekele ngwendi: “Njazezamene manene mu cipangi ca kwambulula, kulinga ngoco kwanjikwasele njijeneke kusinganyeka manene ha bukalu bwange na byuma binjakele na kuliwana nabyo. Kupanga hamo na bandolome mu cipangi ca kwambulula kwanjikwasele njipwe wa kubwahelela na kujeneka kuliziba buli.” Nameme ano matangwa kutwasa kwambulwila hamo na bandolome na bandokazi betu ku njibo na njibo, oloni hanga twasa kupangela hamo nabo omwo twambulula kupangesa foni nambe mikanda. Byuma muka bikwabo byakwasele Mauricio? Wendekele lalo ngwendi: “Njazezamene na bipangi bya mu cikungulukilo. Njakele na kulibwahesela mwamubwa biñanda bya mu sikola na kubyendeka mwamubwa. Ebi bipangi byanjilingisile njimone ngwange Yehova hamolika na bandolome na bandokazi banjimona kupwa wa seho.”

YEHOVA ATUKWASA NGA TULIWANA NA BYESEKO BYAKAMA

8. Bukalu bwakama bunasa kutulingisa tulizibe bati?

⁸ Tuzibuka ngwetu muno mu matangwa a kukotoka tunasa kuliwana na bukalu simbu yoshe-yoshe. (2 Tima 3:1) Oloni simbu imo byeseko binasa kwija mu kukasumuna. Bimbongo binasa kutuhwila. Co lalo tunasa kubinja mushongo umo mu kukasumuna indi hamo kabushoko ketu itwazema manene nasa kutsa. Bukalu bwacifwa eci bwasa kutuzeyesa maneneni nga buneja mu kulikabasana nambe nga bwoshe buneja ha simbu imolika. Anukeni ngweni Yehova ali na kumona bukalu butuli na kuliwana nabwo, co atukwasa mangana tukolese.

9. Byeseko muka byaliwanene nabyo Yombi?

⁹ Tucisimutwiyeni bya munalume wa kulongwa Yombi. Waliwanene na bukalu bwabwingi mu kulikabasana. Bimuna ba Yombi, bangamba bendi na bana bendi boshe batsile mu litangwa limolika. (Yombi 1:13-19) Munima ya kasimbu kakandondo lika, Yombi washangumukile kubinja manene. (Yombi 2:7) Mukemwo wendekele ngwendi: “Njajuka kuyoya.”—Yombi 7:16.

10. Yehova wakwasele bati Yombi mwaliwanene na bukalu? (Taleni cikupulo cili ha liputa lyakulibanga)

¹⁰ Yehova wamwene bukalu bwaliwanene nabwo Yombi. Yehova wazemene manene Yombi, ngeci wamukwasele akolese na kutwalelelaho kupwa wa kulongwa. Yehova wasimutwiiye na Yombi, co wamwanukisile ngwendi wakala na mana a kulitila co lalo akaka mbunge byuma byanatanga. Wendekele ha tusitu babang ba kukomokesa. (Yombi 38:1, 2; 39:9, 13, 19, 27; 40:15; 41:1, 2) Yehova wapangesele lalo munalume wa kulongwa Elihu mangana atakamese Yombi na kumuzembeleka. Elihu wamwanukisile ngwendi Yehova akabezikisa baje batwalelelaho kupwa ba kulongwa na kukolesa. Oloni Yehova wapangesele lalo Elihu kunangula Yombi. Elihu wamukwasele asinganyekesese hali Yehova uje watangele byuma byoshe. (Yombi 37:14) Kutundoho, Yehova wanene Yombi cipangi ca kulombelela babusamba bendi batatu baje balingile bubi. (Yombi 42:8-10) Yehova akatukwasa bati ano matangwa nga tunaliwana na bukalu?

11. Mbimbiliya ikatuzembeleka bati omwo tukaliwana na bukalu?

¹¹ Ano matangwa Yehova kesi kusimutwiya netu ngwe mwalingilile kuli Yombi, oloni akalingi ngoco kupangesa Mbimbiliya. (Loma 15:4) Akatuzembeleka mwafwa natwana biñanda bije bitukwasa tukale na lilabelelo. Tusimutwiyeniko ha Bisoneka bimo bije byasa kutuzembeleka nga tunaliwana na bukalu. Yehova natukulahesa ngwendi kukwesi cuma “casa kututundisa ku cizemo ca Njambi.” (Loma 8:38, 39) Natukulahesa lalo ngwendi “ali muyehi na banu baje boshe batambeka kuli ikeye.” (Myaso 145:18) Yehova natukulahesa lalo ngwendi nga tumukulahela twasa kukolesa na kupwa ba kubwahelela nameme tuliwana mu bukalu. (1 Koli 10:13; Yako 1:2, 12) Lijwi lya Njambi litwanukisa lalo ngwalyo byeseko bituli na kuliwana nabyo, bya kasimbu kakandondo lika, oloni bibezikiso bitukalikuwa kulutwe binapu bya myaka yoshe. (2 Koli 4:16-18) Yehova natukulahesa lalo ngwendi akanyongesa Satana uje akatunenela byeseko hamolika na banu bababi. (Myaso 37:10) Mikanda muka imwanuka ije yasa kukamizembeleka omwo mukaliwana na byeseko kulutwe?

12. Yehova ashaka ngwendi tulinge bika mangana Lijwi lyendi litukwase?

¹² Yehova ashaka ngwendi tunoneke simbu ya kutanda Mbimbiliya na kusinganyekesesa ha byuma bitutanda. Nga tupangesa bitulilongesa, co likulahelo lyetu likanyama, co lalo busamba bwetu na Yehova bukanyama. Kulinga ngoco kutukwasa tukolese omwo tuliwana na byeseko. Co lalo Yehova akana sipilitu yendi ya kujela kuli baje banakulahela Lijwi lyendi. Ei sipilitu itukwasa tukale na “nzili ije itubakana nzili ya bunu” mangana tukolese omwo tuliwana na bukalu bwoshe-bwoshe.—2 Koli 4:7-10, NWT.

13. Byakulya bya ku sipilitu byakatwana “ndungo wa kulongwa na kunyanyama” bikatukwasa bati tukolese omwo tuliwana na byeseko?

¹³ Yehova ali na kukwasa “ndungo wa kulongwa na kunyanyama” abwahese mabulu, mavidio na myaso ije yasa kutukwasa tukale na likulahelo lya kukanyama na kupwa ba kutona ku sipilitu. (Mateo 24:45) Tunapande kupangesa mwamubwa ebi byuma. Ndokazi umo wa ku America wakandelelele kuli Yehova ha kutwana ebi byakulya bya ku sipilitu. Wendekele ngwendi: “Ha myaka 40 injinapangela Yehova njinaliwana na byeseko bya kuliseza-seza.” Munyau ubakele na kwendesa kuli muka-kupenda umo walyatele bakuku yowu ndokazi, co batsile. Kutundaho, bisemi bendi babinjile manene, co batsile. Co lalo ou ndokazi wabinjile mushongo wa kansa ha bisimbu bibali. Bika byamukwasele akolese? Wendekele ngwendi: “Yehova natwalelelaho kunjikwasa. Byakulya byakatwana kwitila muli ndungo wa kulongwa na kunyanyama, byanjikwasa njikolese. Ngeci, njasa kwendeka ngwe mwendekelele Yombi ngwendi: “Kunjumbila kuti kulongwa kwange kweta noho hanjikatsila.”—Yombi 27:5, NWT.

14. Yehova akapangesa bati bandolome na bandokazi mangana atukwase kukolesa mutukaliwana na byeseko? (1 Tesalonika 4:9)

¹⁴ Yehova nalongesa banu bendi kuzema na kuzembeleka bakwabo baje bali mu bukalu. (2 Koli 1:3, 4; Tandeni 1 Tesalonika 4:9.) Ngwe mwa Elihu bandolome na bandokazi betu bakatukwasa nga tuli mu bukalu mangana tutwaleleleho kupwa ba kulongwa. (Vili 14:22) Cakumwenako, bandolome na bandokazi bakwasele manene ndokazi Diane ha simbu yakele na kubinja muka-limbo lyendi. Wendekele ngwendi: “Byuma byakaluwile, oloni njalimwenenene mwatukwaselele Yehova. Bandolome na bandokazi ba mu cikungulilo cetu batukwasele manene. batwendelele, kutwimbila ma foni na kutubumbateya mangana batukwase tukolese. Kunjizibuka kwendesa munyau oloni bandolome na bandokazi banjikwasele njikunguluke na kwambulula.” Tukabwahelela manene ha kukala na bandolome na bandokazi baje batuzema.

KANDELELENI KULI YEHOVA UJE WAMYAKA MBUNGE

15. Mwafwa bika twakulahela ngwetu twasa kukolesa omwo tuliwana na bukalu?

¹⁵ Tubaboshe twasa kuliwana na byeseko. Oloni ngwe mutunabanga kusimutwiya, kutwesi likalyetu. Yehova ali na kutukengelela simbu yoshe ngwe mwakalingi cisemi wa cizemo. Ali muyehi netu, co nalibwahesela kutolilila ku malombelo etu na kutukwasa. (Isaya 43:2) Twakulahela ngwetu twasa kukolesa omwo tuliwana na bukalu mwafwa Yehova natwana byuma byoshe bije byasa kutukwasa. Natutabesa kulombela kuli ikeye, natwana Mbimbiliya, byakulya bya ku sipilitu na bandolome na bandokazi baje basa kutukwasa ha simbu ya bukalu.

16. Bika bitunapande kulinga mangana Yehova atwaleleleho kutunyungilila?

¹⁶ Twabezika manene ha kukala na Tate yetu wa mwilu uje watwaka mbunge. Ngeci “tuli na kujolela muli ikeye.” (Myaso 33:21) Nga tupangesa byuma byoshe byali na kutwana Yehova, co tumwesa ngwetu twakandelela ku byuma byali na kutwana. Oloni netu tunapande kulingako bimo mangana Yehova atunyungilile. Tunapande kutwalelelaho kwononoka Yehova na kulinga byuma byabibwa mangana atwaleleleho kutunyungilila.—1 Petu 3:12.