CIHULA 7
Njilinga Vati Nga Munu Anjithindiya Ngwendi Njililale Nendi?
ULINGA VATI?
Achithinganyeke ha chakumwenako echi: Mwanike wa munakathzi Heather nalithzivuka na Mike mu vingonde vivali lika, oloni alithziva ngwe valithzivukile laja. Vakalitumina majwi ha mafoni thimbu yoshe na kuthimutwiya thimbu yailaha, cho vanalithzilila manene. Oloni kuli vyeka vyashaka Mike, kethi kuthimutwiya lika ha kanwa embwe.
Ha vingonde vivali vinetimo, Mike na Heather vanakala na kulikwata ku mavoko na kulithsemba. Heather kashaka kulilala na Mike. Oloni lalo kashaka vuthamba vwendi na Mike vuthse, mwafwa akamushuvulwitha. Heather akalyendeketha mu mbunge yendi ngwendi, ‘Nange na Mike twalithzema . . .’
Ngwe yove Heather, cho lalo ushaka munu wa kulyambata nendi, ngwe unalingi vati?
THINGANYEKAHO MWAMUVWA
Kulilala kwapwa vwana vwa kutunda kuli Njambi vuvanatavetha lika vaje vali mu malo. Kulinga vupangala kunapu kuviyitha ovu vwana. Kunapu ngwe kupangetha chikovelo chachivwa chana-kwanakavuthamba kove ku kujeletha mathzilo
Nga ulonda kwilu na kulyasha mangana upulule ngwe kathzila, cho ukala mu vukalu vwakama. Mu ngila imo lika, nga wombwanetha lishiko lya mu Mbimbiliya lya “kupatuka ku vupangala,” cho ukala mu vukalu.—1 Tesalonika 4:3.
Vukalu muka vuwatha kumona nga wombwanetha eli lishiko? Mbimbiliya ngwayo: “Woshe alinga vupangala ali na kuvulumuna muvila wendi.” (1 Kolinte 6:18) Echi chilumbununa vika?
Vaka-kutondethetha vanawana ngwavo vanike valingaho laja vupangala vakaliwana na vukalu vwa kufwa ngwe ovu.
KULIVEYA. Vanike vavangi vaje valingaho laja vupangala vakaliveye maneneni hanima ya kuvulinga.
KWONOWA KULIKULAHELA. Hanima ya kulilala, vakakala mu vishoti ngwavo, ‘Hamo kuli weka lalo yalilalele nendi.’
KWOMBWA. Vanike va vanakathzi vavangi vashaka munu uje avavingilikiya, kethi uje ashaka kuvalala embwe. Cho vanike va vanalume vavangi lalo kuvethi kukulahela mwanike wa munakathzi uje valingaho laja nendi vupangala.
Viunapande kwanuka: Nga ulinga vupangala, cho ulishaula yove vavenya. (Loma 1:24) Muvila wove wapwa wa theho, kuwapandele kuujwaletha.
Mwetha ngwove uli na ndthzili ya “kupatuka ku vupangala.” (1 Tesalonika 4:3) Nga kulutwe ukambata nambe kushomboka, cho ukalilala mwamuvwa na muka-limbo lyove. Ha thimbu oyo, ukalikuwa kulilala nendi kujeneka kulishoshomwa ha vukalu vwa vungi vuje vukatundu mu kulinga vupangala.—Vithimo 7:22, 23; 1 Kolinte 7:3.
WATHINGANYEKA VATI?
Munu uje wakuthzema manene atha kukwaka mu vukalu lalo ndi?
Munu uje wakwaka mbunge atha kukushongangeya ulinge vyuma vije vithsiya vuthamba vwove na Njambi ndi?—VaHevelu 13:4.