CILONGESA 8
Abrahamu na Sala Bononokele Njambi
Nganda ya Babele yakele muyehi na nganda ya Ule. Banu bakele mu Ule bakele na kulemesa binjambi beka kutubakana kulemesa Yehova. Oloni muje mu nganda, mwakele munalume umo uje wakele na kulemesa lika Yehova. Lizina lyendi Abrahamu.
Yehova walekele Abrahamu ngwendi: ‘Tunda mu lifuti lyobe na ku babushoko bwobe, uye ku lifuti linjikumwesa.’ Co lalo Njambi wamukulahesele ngwendi: ‘Njikakupwisa muyati wakama, co binaanga byoshe bya hasi bikabezika kwitila muli yobe.’
Abrahamu kazibukile kwamulekele Yehova ngwendi aye. Nameme ngoco wakulahelele Yehova. Ngeci, Abrahamu na munakazi wendi Sala na ishe Tela na Lote muna ndolome yendi balongekeyeye byuma byabo na kuya ngwe mwabalekele Yehova.
Abrahamu te ali na myaka 75 mwetele mu lifuti lyamulekele Yehova ngwendi aye na babushoko bwendi. Lije lifuti balisanene ngwabo Kanana. Mubakele kuje, Njambi wendekele na Abrahamu na kumukulahesa ngwendi: ‘Lifuti lyoshe liuli na kumona njikalyana bana bobe.’ Oloni Abrahamu na Sala kubakele na bana, co lalo bakulubalele. Ngeci Yehova wasele bati kushulisilila eci cikulaheso?
“Mwafwa ya likulahelo, Abrahamu . . . wononokele mwaile ku mwela uje wapandele kukatambula kupwa buswana. Waile nameme kazibukile kwakele na kuya.”—Bahebelu 11:8