Yehova Wamutumbwile Ngwendi “Muthamba Wange”

1, 2. (a) Tuthzivuka vati ngwetu vanu vatha kupwa vavuthamba va Njambi? (b) Vika vituthimutwiya muno mu chilongetha?

KUTUNDA ha kuthemuka kwetu na kweta ku kuthsa kwetu, twashaka vakwetu vatuthzeme. Vanu vashaka kuvamwetha chithzemo cha vuthunga kethi cha helu lika embwe. Vanu vavangi kuvakulahelele ngwavo vatha kulikuta vuthamba na Njambi, mwafwa ngwavo wai wamumona, cho lalo wapwa wa ndthzili manene. Oloni yetu tuthzivuka vuthunga.

² Mbimbiliya yatuleka ngwayo Njambi walikutile vuthamba na vanu. Tunapande kulilongetha vimo kuli ovo vanu. Mwafwa vika? Mwafwa kulikuta vuthamba na Njambi chikecho chuma cha theho chitunapande kulinga mu kuyoya. Ngechi tuchithimutwiyeni hali Avilahama. (Tandeni Yakomba 2:23.) Avilahama walikutile vati vuthamba na Njambi? Walikutile vuthamba na Njambi mwafwa ya likulahelo, cho vamutumbula ngwavo “ishe ya voshe vaka-kukulahela.” (Loma 4:11) Omwo tuthimutwiya hali Avilahama, lihuleni ngweni: ‘Njatha kutembwinina vati likulahelo lya Avilahama mangana njikanyamethe vuthamba vwange na Yehova?’

AVILAHAMA WALIKUTILE VATI VUTHAMBA NA YEHOVA?

3, 4. (a) Endekeni vyuma vije vyethekele likulahelo lya Avilahama. (b) Likulahelo lyakwathele vati Avilahama atave kukombelela Isake?

³ Achihinganyekeni Avilahama akanduka ha munkinda kamandondo kamandondo oku ali na myaka 125.^[1] (Kengeni viñanda vya kushongo.) Munendi Isake uje wakele na myaka 25, amukava munima. Isake nambata vikuni, Avilahama nambata moko na vyuma vikwavo vya kuvweketha tuhya. Ovu vungendthzi mpamo vukevwo vwapwile vwavukalu manene mu kuyoya kwa Avilahama. Kethi vukulukathzi vwakaluwithile vuje vungendthzi embwe. Avilahama wachikele na ndthzili. Vwakaluwile mwafwa Njambi wamulekele kukalinga chuma chachikalu. Wamulekele ngwendi akakombelele munendi.—Kushangumuka 22:1-8.

⁴ Echi mpamo chikecho chapwile chetheko chakama manene mu kuyoya kwa Avilahama. Vanu vamo vakendeka ngwavo Njambi wakalukile mwalekele Avilahama akakombelele munendi. Vamo ngwavo Avilahama watavele kuthsiya munendi mwafwa kamushakele. Vanu vakendeka vya kufwa ngachije, kuvakele na likulahelo, cho lalo kuvathzivuka vyalivungila mu kukala na likulahelo lya vuthunga. (1 Kolinte 2:14-16) Kethi vukuma vwalingithile Avilahama ononoke kuli Njambi. Wononokele kuli Njambi mwafwa wakele na likulahelo lya vuthunga. Wathzivukile ngwendi Njambi katha kumuleka alinge chuma chije chinena vukalu. Avilahama wathzivukile ngwendi nga ononoka kuli Yehova, cho amukwithula na kukwithula munendi. Vika vyalingithile Avilahama akale na likulahelo lya kukanyama ngocho? Wakele na mana, cho wathzivukile vyavingi.

5. Vika vyakwathele Avilahama athzivuke Yehova, cho awa mana amulingithile alithzive vati?

⁵ Mana. Avilahama wakolelele mu nganda ya Ule. Ishe na vanu va muje mu nganda, vakele na kulombela tulunga va makuli. (Yoshwa 24:2) Avilahahama wathzivukile vati Yehova? Mbimbiliya imwetha ngwayo Shemi muna Nowa wapwile kavushoko ka Avilahama. Avilahama mwakele na myaka 150, Shemi nendi te achiyoya. Shemi wakele na likulahelo lya kukanyama cho wakele na kulekako vavushoko vendi vya Yehova. Mpamo ikeye wakwathele Avilahama athzivuke Yehova. Vyalilongethele vyamulingithile athzeme manene Yehova na kukanyametha likulahelo lyendi.

6, 7. Vika vyaliwanene vavyo Avilahama vije vyakanyamethele likulahelo lyendi?

⁶ Kuthzivuka vyavingi. Avilahama wathzivukile vati vyuma vije vyakanyamethele likulahelo lyendi kuli Yehova? Vanu vamo vakendeka ngwavo vyoshe vyakalingi munu akavithinganyeka tahi athina avilinge. Vyuma vyalilongethele Avilahama hali Yehova vyamukwatele ku mbunge, ngechi vyamulingithile athingimike manene Yehova “wa Hakamwa ya Hakamwa, uje watangele lilu na hathi.” (Kushangumuka 14:22) Mbimbiliya yatumbula kathingimiko kamwethele ngwayo “wathzivilile Njambi lyova.” (VaHevelu 5:7, NW) Tunapande kuthzivila Njambi lyova mangana tulikute vuthamba nendi. (Myatho 25:14) Kuthziva Yehova lyova kukekwo kwakwathele Avilahama amwononoke.

⁷ Njambi walekele Avilahama na Sala vathethze njuvo yavo mu Ule na kuya ku lifuti lyeka. Ha thimbu eyi te vanakolo, cho vakakala mu vimbalaka mu kuyoya kwavo kwoshe. Nameme Avilahama wathzivukile ngwendi vakakala mu vukalu, oloni wononokele kuli Yehova. Njambi wamunyungile na kumuvethzikitha mwafwa ya kwononoka kwendi. Chakumwenako, Avilahama muvamunyekele munakathzi wendi Sala, nomwo muvashakele kumuthsiya, Yehova wavavingilikiyiye voshe vavali. (Kushangumuka 20:2-7, 10-12, 17, 18) Evi vyakuliwana navyo vyakanyamethele likulahelo lya Avilahama.

8. Twatha vati kukala na mana na kuthzivuka vyavingi mangana tukanyamethe vuthamba vwetu Yehova?

⁸ Twatha kulikuta vuthamba na Njmabi ndi? Eyo twatha. Tunapande kuthzivuka tahi Yehova ngwe Avilahama. Netu twatha kukala na mana na kwatha kuthzivuka vyavingi. Twatha kuthzivuka vyavingi kutuvakana Avilahama. (Ndanyele 12:4; Loma 11:33) Mbimbiliya itukwatha tuthzivuke uje “watangele lilu na hathi.” Vitulilongethamo vitulingitha tuthzeme Yehova na kumuthingimika manene. Kumuthzema na kumuthingimika kutulingitha tumwononoke. Tumona mwatunyungilamo na kutukwithwila, cho evi vitukwatha tumuthzivuke na kukanyametha likulahelo lyetu. Nga tupangela Yehova mu kushula, tushuvuluka na kukala mu kwoloka na kupwa va kuvwahelela. (Myatho 34:8; Vithimo 10:22) Omwo tuthzivuka mwamuvwa Yehova na kumona mwali na kutuvethzikithila, vuthamba vwetu nendi vukanyama.

VYUMA VYAKANYAMETHELE VUTHAMBA VWA NJAMBI NA AVILAHAMA

9, 10. (a) Vika vyatha kukanyametha vuthamba? (b) Vika vimwetha ngwavo Avilahama wakanyamethele vuthamba vwendi na Yehova na kuvumona kupwa vwa theho?

⁹ Vuthamba vwa kukanyama vwapwa ngwe vufuko vwa theho yakama. (Tandeni Vithimo 17:17.) Kuvwafwile ngwe chuma cha ndando yakama chije chivaka mu njuvo mangana muvwahe, embwe. Oloni vwafwa ngwe vishani vije vishaka kutukumwina mema mangana vivwahe. Avilahama washakele kupwa kavuthamba ka Yehova, cho wanyungile ovu vuthamba. Walingile vati ngocho?

¹⁰ Avilahama watwaleleleho kuthingimika Njambi na kumwononoka. Chakumwenako, omwo waile ku Kanana na hamo na nanga yendi na vangamba vendi, wakengele kuli Yehova amutwamenene mu kwangula vya kulinga. Omwo kwathalele mwaka umo thimbu kanda Isake athemuke, Yehova walekele Avilahama mwakele na myaka 99 ngwendi atuhwithe vanalume voshe va ku njuvo yendi. Kuma Avilahama wathembulwile Yehova, nambe kuvyana kulinga vyamulekele ndi? Embwe. Wakulahelele Yehova ngechi voshe wavatuhwithile “litangwa limo.”—Kushangumuka 17:10-14, 23.

11. Mwafwa vika Avilahama walishoshomwenene ha kunyonga kwa Sondoma na Ngomola, cho Yehova wamukwathele vati?

¹¹ Vuthamba vwa Avilahama na Yehova vwakanyamene mwafwa wononokele na mu vyuma vyavindondo. Wathzitukile kuthimutwiya na Yehova. Wakele na kumwihula ha vyuma vije kathzivithithile. Chakumwenako, omwo Yehova wendekele ngwendi anyongetha Sondoma na Ngomola, Avilahama walishoshomwenene. Mwafwa vika? Wathinganyekele ngwendi hamo vanu vavavwa vavanyongethela kumo lika na vavavi. Wathinganyekele hali mwehwendi Lote na nanga yendi vaje vakele mu Sondoma. Avilahama wakulahelele Yehova “Muka-kuthompa wa hano hathi,” ngechi walekele Yehova vishoti vyendi mu kathingimiko. Yehova watolililile omwo kavuthamba kendi wendekele, cho wamuthzivilile ngothzi. Yehova walumbunwine ngwendi mwakathompo, akamono vanu vavavwa, cho kethi kuvanyongetha.—Kushangumuka 18:22-33.

12, 13. (a) Mana na kuthzivuka vyavingi chakwathele vati Avilahama? (b) Vika vimwetha ngwavo Avilahama wakulahelele Yehova?

¹² Twamono ngwetu mana na kuthzivuka vyavingi chakwathele Avilahama akanyamethe vuthamba vwendi na Yehova. Mukemwo Avilahama kavyanene omwo Yehova wamulekele ngwendi athsiye munendi kupwa ñombelo. Wathzivukile ngwendi Yehova wapwa wa wa kuthimpa na kukwata mbunge, wapwa wa ngothzi, cho lalo akanyungu. Avilahama kathinganyekele ngwendi Yehova nalimuka chikenya embwe. Vika twendekela ngocho?

¹³ Thimbu kanda Avilahama athethze vangamba vendi, wavalekele ngwendi: “Thaleni kuno hamo na chimulu. Cho yange na munange tuya kuje na kulemetha, athinoni tukeluka lalo kuli yeni.” (Kushangumuka 22:5) Avilahama walumbunwine vika? Walikwithile omwo mwendekele ngwendi akeluka na munendi okuni wathzivukile ngwendi akamukombelela ndi? Embwe. Mbimbiliya yendeka ngwayo Avilahama wathzivukile ngwendi Yehova atha kukathangula munendi Isake. (Tandeni VaHevelu 11:19.) Avilahama wathzivukile ngwendi Yehova ikeye wamwanene ndthzili mwana nameme ikeye na Sala vakuluvalele. (VaHevelu 11:11, 12) Ngechi wakulahelele ngwendi Yehova atha kulinga vyoshe vyashaka. Avilahama kathzivukile vyuma vikalingiwa kuje kwakele na kuya na munendi. Oloni wakulahelele ngwendi nga Yehova ashaka, atha kuthangula Isake mangana vikulahetho vyendi vilishulithilile. Mukemwo Avilahama vamutumbula ngwavo “ishe ya voshe vaka-kukulahela.”

14. Vukalu muka vumukaliwana navwo mu kupangela Yehova, cho mwanja wa Avilahama unatha kumikwatha vati?

¹⁴ Matangwa ano, Yehova kethi kutuleka ngwendi tukombelele vana vetu, oloni ashaka ngwendi twononoke mashiko endi. Vithimbu vimo kutwethi kuthzivithitha vyatwanena mashiko amo, nameme kumona ngwetu kuwononoka kwakukalu. Neni mukemwo mumukalithzivila ndi? Vamo vamona chipangi cha kwambulula kupwa chachikalu. Hamo vakathzivi shwamwa kuthimutwiya na vanu vaje kuvathzivuka. Vamo kuvashakele kuvajola ku vakwavo vaka-vipangi nambe sikola. (Kutuhuka 23:2; 1 Tesalonika 2:2) Nga vamileka kulinga chuma chachikalu, cho thinganyekeni ha likulahelo lya Avilahama na kuthimpa kwendi. Kuthinganyeka ha likulahelo livamwethele vanalume na vanakathzi va kuthañulu, kutukwatha tuvatembwinine, na kukanyametha vuthamba vwetu na Yehova.—VaHevelu 12:1, 2.

VUTHAMBA VUJE VUMIVETHZIKITHA

15. Vika twendekela ngwetu Avilahama kaliveyele ha kwononoka kuli Yehova?

¹⁵ Kuma Avilahama waliveyele ha kwononoka mashiko a Yehova ndi? Mbimbiliya yendeka ngwavo Avilahama “wathsile mu kushuvuluka mu myaka ya vukulukathzi vwendi.” (Kushangumuka 25:8, NW) Omwo Avilahama wakele na myaka 175, washuvulukile ha kuthinganyeka ha myaka yaingi yayoyele. Mwafwa vika? Mwafwa wakele vuthamba vwendi na Yehova kulutwe. Kwendeka ngwavo Avilahama ‘washuvulukile mu vukulukathzi’ vwendi kuchilumbununa ngwavo kakele na lishungu lya kuyoya lalo.

16. Vika vikathzivitha Avilahama kuvwaha mwakakala mu Palandaisi?

¹⁶ Mbimbiliya ngwayo Avilahama “wavandamenene nganda ije Njambi yamwinikilile kumutungila, nganda ije ya luvula lwa myaka yoshe.” (VaHevelu 11:10) Avilahama wakulahelele ngwendi tangwa akamona eyi nganda, nameme Vumwene vwa Njambi muvukayula hathi. Thinganyekeni kuvwaha kwathziva Avilahama omwo akayoya mu palandaisi hano hathi na kutwalelela kukanyametha vuthamba vwendi na Njambi. Akavwahelela mwakathzivuka ngwendi likulahelo lyendi lyakwathele vangamba va Njambi ha myaka yaingi. Mwakakala mu Palandaisi, akathzivuka lalo ngwendi ñombelo yashakele kwana ha Munkinda wa Moliya yemanenene chuma chakama. (VaHevelu 11:19) Akathzivuka ngwendi vuthiwa vwathzivile ha kwana munendi Isake kupwa ñombelo kunakwatha vanu va kulongwa vavangi vathzivithithe mwathzivilile Yehova omwo wanene Munendi Yesu Kilisitu athsile vanu. (Yowano 3:16) Mwanja wa Avilahama watukwatha tuvavoshe tumone ngwetu ndando ya kupatula yapwa ya theho manene, cho yamwetha chithzemo chakama cha Njambi.

17. Vika vimwangula kulinga? Tukathimutwiya vika mu chilongetha chinatako?

¹⁷ Tuvavoshe, tutembwinineni likulahelo lya Avilahama. Netu tuthzivukeni vyavingi na kukala na mana ngwe Avilahama. Omwo tuthzivuka Yehova na kumwononoka, tumona vivethzikitho vyatwana nomwo atunyungilamo. (Tandeni VaHevelu 6:10-12.) Tulikuteni vuthamba vwa myaka yoshe na Yehova. Mu chilongetha chinatako, tukathimutwiya hali vanu va kulongwa vatatu vaje vapwile vavuthamba va Njambi.