Bakele oni na Mwana wa Munalume

Abrahamu na Sala bakele mu bulo ha myaka yaingi. Basezele njibo yabo yaibwa mu nganda ya Ule na kukakala mu bitenti. Oloni Sala kayayabalele mwafwa wakulahelele Yehova.

Sala washakele manene kukala na mwana, ngeci walekele Abrahamu ngwendi: ‘Nga ngamba yange Hagale akita mwana, co owo mwana apwa ngwe munange.’ Mu kwita kwa simbu, Hagale wakitile mwana wa munalume. Lizina lyendi Ishimaele.

Munima ya myaka yaingi, Abrahamu na Sala batambwile bangenzi batatu. Ha simbu ei, Abrahamu wakele na myaka 99, Sala ikeye wakele na myaka 89. Abrahamu walombele baje bangenzi batumame mwisi ya muti mangana bahwimeko, co wabanenelele byakulya. Baje bangenzi bapwile beya? Bapwile tungelo. Balekele Abrahamu ngwabo: ‘Mungolosika ha simbu ino bene, yobe na munakazi wobe mukakala na mwana wa munalume.’ Sala uje wakele mu tenti wakele na kutolilila mubakele na kusimutwiya ebi biñanda. Ngeci, wajolele na kulyendekesa ngwendi: ‘Kuma njasa kukita mwana okuni njakulubala ndi?’

Mwaka wateleko, Sala wakitile mwana wa munalume ngwe mubendekelele tungelo ba Yehova. Abrahamu walukile munendi lizina lya Isaki, lije lilumbununa “Tujolo.”

Isaki mwakele na myaka 5, Sala wamwene Ishimaele ashendumuna Isaki. Sala washakele kunyungilila munendi, ngeci waile na kuleka Abrahamu ngwendi asheke Hagale na munendi Ishimaele. Hakulibanga Abrahamu kashakele kulinga ngoco. Oloni Yehova walekele Abrahamu ngwendi: ‘Tolilila byakuleka Sala. Munobe Ishimaele njimunyunga. Oloni bikulaheso byange bikalishulisilila kwitila muli Isaki.’