Tushitiko 6 Twateleko

Mosesa na Aloni baile na kukaleka Falo muzimbu watundile kuli Njambi, ngwabo: ‘Nga kuutabesa banu bange ngwobe baye, njikutumina mazimbe.’ Co mazimbe bashulile mu binjibo bya baka-Ijipiti, ipwe mu binjibo bya tuhutu nambe mu binjibo bya baka-kufuka. Ku mutambela kwakele baka-Ijipiti kwashulile mazimbe, oloni ku mutambela wa Gosheni kuje kwakele baIsalele kubakeleko. Aka kashitiko na tushitiko twateleko, twakele na kwija lika kuli baka-Ijipiti. Co Falo walombele ngwendi: ‘Lambeleleni Yehova atundise aba mazimbe. Co mwasa kuya.’ Yehova mwatundisile baje mazimbe, Falo watengulwile biyongola byendi. Kuma Falo wasele kulilongesako bimo ndi?

Yehova wendekele ngwendi: ‘Nga Falo katabesa banu bange baye, co bimuna ba baka-Ijipiti babinja na kutsa.’ Litangwa lyateleko bimuna bashangumukile kutsa. Oloni bimuna ba baIsalele kubatsile. Nameme ngoco, Falo wakaluwisile mbunge yendi, co kabapatwile.

Co Yehova walekele Mosesa ngwendi elukile kuli Falo na kukasha lito mu lihunzi. Lito lyatengulukile kupwa likungu, co lyapekumukilile kubakele baka-Ijipiti. Lije likungu lyanenele bimbandu bya masina kuli baka-Ijipiti na bimuna babo. Nameme ngoco, Falo wabyanene kutabesa baIsalele baye.

Yehova watumine lalo Mosesa kuli Falo mangana akamuleke ngwendi: ‘Kuma ucili na kubyana kupatula banu bange mangana baye ndi? Imene nyonzi ya mamanya inyoka mu lifuti lyoshe lya Ijipiti.’ Co litangwa lyateleko Yehova watumine mihyato na nyonzi ya mamanya na tuhya. Ije nyonzi te kanda icikaleko mu lifuti lya Ijipiti. Miti yoshe na bimena byabihile, oloni mu lifuti lya Gosheni kumwanyokele nyonzi ya mamanya. Co Falo wendekele ngwendi: ‘Lambeleleni Yehova emike ei mihyato na nyonzi ya mamanya, co njimitabesa muye.’ Oloni ije nyonzi ya mamanya muyalikelele lika kunyoka, Falo watengulwile biyongola byendi.

Co Mosesa wendekele ngwendi: ‘Imene bimbimba balya bimena bije binoboka ku nyonzi ya mamanya.’ Bimbimba babangi-bangi balile byoshe bije byasalele mu mahya na ku miti. Falo walambelelele ngwendi: ‘Lombeni Yehova atundise aba bimbimba.’ Co Yehova watundisile baje bimbimba. Nameme ngoco, Falo anga wacikaluwisile mbunge yendi.

Yehova walekele Mosesa ngwendi: “Olwela liboko lyobe mwilu.” Co haje bene mu lifuti lya Ijipiti mwakele lisusulungu lyakama. Ha matangwa atatu, baka-Ijipiti kubakele na kulimona umo na mukwabo nambe kumona cuma coshe-coshe. Oloni kuje kubakele baIsalele kukekwo kwakele ceke.

Falo walekele Mosesa ngwendi: “Yeni mukapangele Yehova. Bimanga na bingombe beni lika bakebo basala.” Co Mosesa wendekele ngwendi: ‘Tunapande kwambata bimuna betu mangana tukabapangese mu kulemesa Njambi.’ Falo mwazibile cikumbululo ca Mosesa, walubalele manene. Co wamutenukilile ngwendi: ‘Tunda hano! Litangwa liwakusholoka kuli yange, co kwobe ngu.’